Read cisena YESAYA 27 Bible Online

YESAYA 27 - cisena bible

YESAYA 27

¹Pansiku yeneyo MBUYA anatchunyusa, na talasadache yakugoswa, ikulu pontho yamphamvu ile, Leviatani chinyoka chakufamba mwakubzongonyoka-bzongonyoka, pontho chakupiringidzika-piringidzika chile, iye anati aphe nyangume ule.[27]

²Pansiku yeneyo MBUYA anaimba pya mundache wamfesa wakubala nsapo kuti:

³“Ine MBUYA ndine nyakuyang'anira mundawu; ine nkhabe leka kuuthirira madzi tayu. Ine ndimbaulondali mosiku na masikati ene, towera paleke khala na mbodzi ene wakuuvunga.

⁴Ine nkhabe zhangali napyo tayu. Ngakhala mwenemo mukhali ntcheswa na nyakhanche kundidzudzumisa, ine mbidathimbana napyo; ine mbidapidumika moto pyonsenepyo.

⁵Mbwenye ngakhala anyamalwanga anafuna pyakudza kuna ine dzabisala; apangeni kuti afune pyamtendere, ande, apangeni achite nane chiverano cha mtendere.”

⁶Nsiku zinadzazo Yakobo anamera mitsitsi, Israele anaphwitha mbachita maluwa, pontho anadzaza dziko yonsene yapansi na nsapo.

⁷Ayi MBUYA aating'inda ninga mudating'indira iye anyamalwa a Aisraele mule? Ayi Aisraele aphiwa ninga montho mudapherwa anthu adaaphambo ale?

⁸MBUYA adaatchunyusa mbaatumiza kudziko ya unyaperezo; iye adaapisa na muya wa ukali wache, ninga mumbakhalira ipyo pansiku imbadima mphepo yakumabulukiro dzuwa.

⁹Na thangwi ya penepi pyakudawa pya Yakobo pinalekererwa, pontho kunakhala kubulusa chadi-chadi pyakudawa pyache: iye angamala kuswa miyala yonsene ya maguwa ansembe khala ninga miyala ya ntoto kumala peyiwa, nkhabe adzimunthu a milungu Ashera, penu maguwa akufukizirapo pyakununkhira anasiyiwa tayu.

¹⁰Mzinda wakutchingwa na mpanda wasanduka madembe, mbuto yakusowa anthu yakusala yokha ninga thando yatchetcha; kweneko anamphulu ambagwedulako, mbagona pyawo tambzala, pontho kukhwadzula-khwadzula nthambi zache.

¹¹Nthambi za mitiyo zingauma, izo zimbatcholwa pontho akazi ambadza dzazilokota nkhuni. Thangwi enewa mbanthu okhonda vesa pinthu; tenepo Nyakuasasanya nkhabe kuavera nsisi tayu, pontho Nyakualenga nkhabe kuakomera mtima tayu.

¹²Pansiku yeneyo MBUYA anabubuda dziko ninga mapira kubulukira kumkulo wa Yufurate mpakana kumadire a Iguputo kugumanyisa imwe, Aisraele, mbodzi na mbodzi.

¹³Pansiku yeneyo ngoma inalizwa. Ale akhadatayika ku Asiria, pontho ale akhali pa unyaperezo ku Iguputo anabwera mbapembedza MBUYA paphiri yakupambulika[28] mu Yerusalemu.