Read cisena YESAYA 28 Bible Online

YESAYA 28 - cisena bible

YESAYA 28

¹Dzedze kuna ufumu wakutumbama, madombe a ku Eferemu,[29] kuna demelero yache, ile imbasuluka ninga maluwa, mzinda ule uli panthunda ya phedi ya mataka akubalisa pinthu; dzedze kuna mzinda wakulunkuma pontho kuna anthu akuledzera vinyu ale!

²Yang'anani, Mbuya ana unango ule ngwamphamvu pontho wamboko zache. Iye, ule akhala ninga matalala pontho chonzi chakugoswa, ule akhala ninga madzi makulu akukukulula pinthu pyonsene, anaataya mwashungu kumaphedi.

³Kudungudza kwa akadamu, madombe a ku Eferemu ale, kunati kupondedzwe pansi.

⁴Mzinda ule demelero yache imbasuluka ninga maluwa ile, ule uli panthunda ya phedi ya mataka akubalisa pinthu unakhala ninga nkhuyu yakutokota ndzidzi wache mbudzati kwana; sindzidzi munthu unango nkhuiona ambatchola mbaithabiraletu.

⁵Pansiku yeneyo MBUYA Wamphamvu zonsene anakhala ninga chipewu chademelero chachifumu, ninga kamdedzi wakubalika kuna anthu ache akusalira ale.

⁶Iye anakhala na mzimu wa chilungamo kuna iye nyakukhala pampando wakutongera miseru, iye anakhala mphamvu kuna ale ambamenya nkhondo na anyamalwa pamisuwo ya mzinda.

⁷Enewambo akudzedzereka thangwi ya vinyu pontho akugwa mbamalamuka thangwi ya pyakumwa pyaukali: Anyansembe na maprofeti akudzedzereka thangwi ya bwadwa, pontho onsenene amala ledzera vinyu; iwo akugwa mbalamuka nawo bwadwa, iwo akudzedzereka thangwi ya mayezi-yezi, iwo akugwegweduka nayo miseru ya anthu.

⁸Pamathebulu pawo padzala na matapiko; pyakunyansa pili ponsene pene.

⁹Iwo akulonga kuti, “Mbani anayesa iye kufunzisa? Mbani munthu wache anapanga iye mphangwa zachezo? Ayi kuna akachiya akulekeswa kuyamwa, kuna ana ale alekeswa kwene bele?

¹⁰Iye akuyesa kutifunzisa pang'ono-pang'ono, chilemba na chilemba, mzera na mzera, chifunziso na chifunziso.”

¹¹Ndimomwene Mulungu analonga kuna anthu enewa kudzera muna anthu akudza pyawo pontho anthu a chilongero chachilendo,

¹²kuna anthu adalonga na iye ale kuti, “Mbuto ishi njakupumirapo; anyakutopa alekeni apume; ino ndi mbuto yakuwoserapo dzuwa,” kwache iwo hadavesere tayu.

¹³Ndi thangwi yache MBUYA anakufunzisani pang'ono-pang'ono chilemba na chilemba, mzera na mzera; chifunziso na chifunziso. Penepo munagwa panjira panu kukuwazika, kukweshwa na msampha mbamuphatwa.

¹⁴Natenepo veserani mafala a MBUYA, imwe anyakusingirira, ale mumbatonga anthu a mu Yerusalemu,

¹⁵Imwe mumbagaya kuti, “Ife tachita chiverano na imfa mbatichita chiphatizano na dziko ya anyakufa. Chonzi chakugoswa chidime tani pyacho, icho nkhabe kutichita pinthu tayu, thangwi kunama kwakhala ninga pakuthawira pathu pontho mbuto yathu yakubisalapo.”

¹⁶Natenepo MBUYA Mulungu akulonga kuti, “Yang'anani, ndikuikha maziko amwala mu Zioni, mwala wakutsikimizirwa, mwala wakudula wapankhomo, towera akhale maziko akukhazikika; munthu onsene ananyindirayo nkhabe dzataya mtima tayu.

¹⁷Chilungamo ndiye chinafuna dzakhala mdida wa nkhambala, pontho ungwiro ndiye unafuna dzakhala mdida wa thabwa; matalala anatswaira kunama kule mphakuthawirapo panu, pontho madzi makulu anakukulula mbuto yanu yakubisalirapo ile.

¹⁸Chiverano chidasasanya imwe na imfa chile chinamala; chiphatizano chanu na dziko ya anyakufa nkhabe dzaphatave basa tayu. Chonzi chakugoswa chingadima, chinakumenyani mbachikugwisani.

¹⁹Icho chingathimiza kudima, chinakutswairani; na machibese onsene, pontho mosiku na masikati icho chinati chidzadime basi.” Anthu angavesa mphangwa zenezi, anachita mantha pyakwanga pene.

²⁰Talimba inachepa pyakwanga kuti mukwanise kuthathamulapo, gombezambo inachepa pyakwanga kuti mukwanise kufinika.

²¹MBUYA anamenya nkhondo ninga montho mudachitira iye pa Phiri ya Perazimu, iye anazhangali ninga mudachitira iye paphedi ya Gibeoni, kuphata basache, basache yachilendo, pontho kumalisa basache, basache yakudodomesa ile.

²²Natenepo lekani kutikana kunachita imweko gopesera njema zina imwezo zinathimbiswa; Mbuya, MBUYA Mulungu Wamphamvu zonsene andipanga pya nyatwa zakugoswa zinafuna dzagwera dziko yonsene zile.

²³Fungulani makutu mbamuvesere falanga; ikhani khutu kuna pinalonga inepi.

²⁴Nyakulima angatipula kusasanyikira kubzala mbewu, ayi iye ambathimiza kwenda mbatipula basi? Ayi iye ambaenda basi mbatipula na kukumba mataka?

²⁵Apo iye angamala kusalaza mataka ayi iye hambabzala tayu safarawu,[30] penu chitowe? Ayi iye nkhabe bzala tayu tirigu m'mizera mwache, penu barele pambuto pache? Ayi iye nkhabe bzala tayu mulumbi m'madire a munda?

²⁶Mulungu wache ambampanga pontho ambamfunzisa njira yadidi.

²⁷Safarawu nkhabe bubudwa pambuwa tayu penu chitowe kumpondedzwa na magaleta; safarawu ambasadzulwa na manja, pontho chitowe chimbabubudwa na ndodo.

²⁸Mapira ambatibulwa kusasanya mkate; tenepo nkhabe munthu ambaenda mbaabubuda kwenda na kwenda tayu. Iye ambaabubuda na magaleta a chingolo chache, kwache akavalo achewo nkhabe kuapeya tayu.

²⁹Nzeru zonsenezi zimbabulukira kuna MBUYA Wamphamvu zonsene, nyakudziwa kupereka uphungu, pontho mwenechiroache nzeru.