Read cisena YESAYA 29 Bible Online

YESAYA 29 - cisena bible

YESAYA 29

¹Dzedze kuna iwe Yerusalemu, mbuto ya guwa yansembe ya Mulungu ile, mzinda mudakhazikika Davite ule! Chaka na chaka wathimiza kusekera maphwando ako achipembedzo,

²kwache ine ndinachita nkhondo na mzindawo, ule umbachemerwa “Guwa yansembe ya Mulungu.”[31] Panakhala kusintili na kukalala pinapisa ine mzindawo ninga nsembe paguwa.[32]

³Ine ndinakuzungulira na anyankhondo anga, mbandimanga nsanja zankhondo kukuzungulira, pontho kusasanya pyakugomolera mpandako.

⁴Uku watchithiswa pansi, unalonga pansipo; falako inavekera m'mataka, falako inaluthuka pansipo ninga mzukwa, falako inavekera chapansipansi kubulukira m'mataka.

⁵Kwache anyamalwako azinji ale, anasanduka ninga fumbi, magulu a anyankhondo avinga ale, anasanduka dzungu yakumbuluka na mphepo. Kabodzi kene pontho mwakututumusa

⁶MBUYA Wamphamvu zonsene anabwera na chiphaliwali pontho chiteke-teke pontho na dungu ikulu, na chonzi na chivumbulu pontho na malulume a moto wakuvunga.

⁷Magulu a anyankhondo a madzinza onsene anamenyana na Yerusalemu, ale ambamsosa mbagwisa mpandache mbamanga msasa kumzungulira, anakhala ninga akulota, pontho ninga akuona masomphenya na mosiku.

⁸Ninga mumbachitira munthu wa njala kulota akudya, kwache iye angatutumuka njalache ile ambaiva basi; ninga mumbachitira munthu wanyota kulota akumwa, kwache iye angatutumuka, kukhosi kwache kumbakhala kakata basi. Pinakhalambo tenepo kuna magulu a anyankhondo a madzinza onsene, ambamenyana na anthu a paphiri ya Zioni ale.

⁹Dodomani pontho dzudzumikani, piphopheni kunkhope mbamusanduke maboli-boli; ledzerani, kwache okhonda kumwa na vinyu ene, dzedzerekani, kwache okhonda kumwa na bwadwa ene.

¹⁰MBUYA akuchitisani kugona chitulo chakufa nacho: Iye amyedera maso anu, imwe maprofeti; iye apha misolo yanu, imwe anyakulotera pya m'tsogolo.

¹¹Thangwi kuna imwe masomphenya enewa si pinthu tayu mbwenye mafala kumyederwa mumpukutu. Tenepo ngakhala munapasa mpukutuwu munthu unango ule anakwanisa kuuwerenga mbamulonga kuna iye kuti, “Ndaphata miyendo, werenga mpukutuwu,” iye anatawira kuti, “Ine sinakwanisa tayu, thangwi wamyederwa.”

¹²Penu ngakhala munaupasa munthu unango pontho ule hanakwanisa kuuwerenga tayu mbamulonga kuti, “Ndaphata miyendo, werenga mpukutuwu,” iye anatawira kuti, “Ine nkhabe dziwa kuwerenga tayu.”

¹³Mbuya akulonga kuti, “Anthu enewa akudza chifupi na ine na mulomo wawo mbandilemedza na m'kanwa mwawo, mbwenye mitimawo ili kutaliletu na ine. Kundipembedza kwawo nkhuteweza kwene matongero basi ambafunziswa na anthu ale.

¹⁴Natenepo kachiwiri kache ine ndinati ndidzudzumise anthu enewa na chakudodomesa pa chakudodomesa. Anthu anzeru, nzeru zawo zinaamalira, udziwisi wa anyaudziwisi unati umale kwenda.”

¹⁵Dzedze kuna anyakubisira MBUYA pinthu pidasasanya iwo kuchita pile, ale ambachita pinthu pyawo mumdima mbalonga okha ene mbati, “Mbani anationa? Anafuna kupidziwa mbani?”

¹⁶Imwe mumbazunguza pinthu. Ayi chakufunika ntchipi, nyakuumba pyombo penu dongo? Ayi chinthu chakuumbwacho chingapange nyakuchiumbayo kuti, “Hadandiumbe si iye tayu?” Ayi chitomba chingalonge kuna nyakuchiumba kuti, “Iwe nkhabe dziwa chinachita iwe?”

¹⁷Pangagwanda kwene ndzidzi wakuchepa, msitu wa Lebanoni unasanduka munda wa mataka akubalisa pinthu, pontho minda ya mataka akubalisa pinthu inasanduka msitu.

¹⁸Pansiku yeneyo madodo anati ave mafala a mumpukutu, pontho kubulukira mumdima wa ndiwe ani maso a maboli-boli anati aone.

¹⁹Kachiwiri kache anyakupichepesa anati asekere thangwi ya MBUYA; anyakusowa anati asekere, thangwi ya Nyakuchena wa Israele.

²⁰Anthu avinga nkhabe dzaonekave tayu, anyakusingirira anamaliratu, alembo ana njala kuchita pyakuipa anamala vungwa.

²¹Mulungu anatchunyusa ale ambapambizira anzawo, pontho ale ambapotoza chilungamo pamiseru. Iye anatchunyusa pontho anyakupereka umboni wakunama, towera anyakukhonda dawa aleke tongwa mwachilungamo.

²²Natenepo MBUYA adaombola Abrahamu ule, akulonga tenepa kuna pidzukulu pya Yakobo: “Yakobo, anthu anga, nkhabe dzachitiswave manyadzo tayu, nkhope zawo nkhabe dzatotave na manyadzo tayu.

²³Iwo angaona pakati pawo anawo, basa ya manjanga, anachitisa dzinanga kukhala yakuchena; iwo anatawira kuti ine ndine Nyakuchena wa Yakobo; iwo anandilemedza mbandigopa, ine Mulungu wa Israele.

²⁴Mapupwe anasanduka anyakuvesa pinthu; anyakudungunyirambo anatawira kufunziswa.”