Read cisena YESAYA 3 Bible Online

YESAYA 3 - cisena bible

YESAYA 3

¹Yang'anani, Mbuya, MBUYA Wamphamvu zonsene ali chifupi kubulusa mu Yerusalemu na Yuda chiphedzo cha mtundu onsene chimbanyindira iwo chile: iye anaabulusira phoso yawo na madzi ene,

²anyamphamvu zawo na anyankhondo awo, anyakutonga miseru na maprofeti awo, anyakuombedza na akulu-akulu awo,

³akadamu a anyankhondo makumashanu, pontho anthu a chidzo chawo, mapungu pontho anyamatsenga awo pontho anyakukhumira aluso.

⁴Ndinachitisa aphale kukhala mathubu awo; iwo anakhala pansi pa utongi wa akachiya.

⁵Munthu anapondereza munthu mnzache, mamuna na mamuna mnzache, tsanthemba na tsanthemba mnzache. Ana anatikana akulu-akulu pontho mapupwe analulupisa anthu a chilemedzo.

⁶Munthu anaphata mbodzi wa abale ache pamsuwo pa babache mbalonga mbati, “Iwe una mkhanjo, tenepo khala mkadamu wathu; yang'anira mulu wa madongolomwawu!”

⁷Kwache pansiku yeneyo iye anakhuwa mbati, “Ine nyonyo, ndakhonda, thangwi ine nkhabe phoso penu nguwo m'nyumba mwanga tayu; lekani kundiikha kukhala mkadamu wa anthuwa.”

⁸Yerusalemu akudzedzereka, pontho Yuda akugwa pyache; na mafala pontho na mabasawo iwo atikana MBUYA wademelero mbampandukira.

⁹Makhaliro a nkhope zawo akuapokanyisa; iwo akuchita pyakudawa pakwecha okhonda kupibisa, ninga montho mudachitira anthu a ku Sodomu. Dzedze kuna iwo! Iwo apidzesera nyatwa okha ene.

¹⁰Apangeni anyakulungamawo kuti pinthu pyawo pinaafambira mwadidi, thangwi iwo anadya nsapo za mabasawo.

¹¹Dzedze kuna anyakuipa! Pinthu pyawo nkhabe dzaafambira mwadidi tayu! Iwo anabwezerwambo pinthu pyachitira iwo anango.

¹²Aphale akupondereza anthu azinji, anyakuatonga ndi akazi ene. Waa! Anthu anga, anyakukuphatani nsenji, akukuendesani m'tsanga; iwo akukubausani kubuluka m'njira.

¹³MBUYA akhala pambuto pache m'thando ya miseru; iye asasanyika kutonga mseru anthu ache.[5]

¹⁴MBUYA akutonga mseru akulu-akulu na akadamu a anthu ache mbalonga mbati: “Ndimwepo mwavunga mundanga wamfesa; pinthu pyapokosera imwe anyakutcherenga pili m'nyumba mwanu.”

¹⁵Mbuya, MBUYA Wamphamvu zonsene alonga mbati, “Pinachita imwepyo ninji kupondereza anthu anga, pontho kudyera nkope-kope anyakutcherenga?”

¹⁶MBUYA akulonga kuti, “Akazi a ku Zioni ngakutumbama pyakwanga, ambafamba khosi gonese, mbayang'ana na maso akuyengerera; iwo ambafamba mwakudewereka, mbaliza mafumba m'miyendo mwawo.

¹⁷Natenepo MBUYA anachitisa mumsolo mwa akazi a ku zioni kudzala na pironda; tsisi yawo kumala na kulakatika.”

¹⁸Pansiku yeneyo Mbuya anabulusa pakati pawo pinthu pyonsene pyakuthemesera napyo manungo awo: mafumba, mithimbalimba na mikufu,

¹⁹mphete za m'khutu, magoza na pitambaya,

²⁰madunku, pibangili, na micheka, mitete ya pyakununkhira, na pitumwa,

²¹mphete za m'chala, na nthona,

²²mikhanjo yadidi, na pipewu, pyakufinika, na pyolwa,

²³masipeyo na nguwo zakuchena, akamdedzi, na pyakumpsampsira nkhope.

²⁴M'mbuto mwa mgwadi-gwadi, panakhala ukachi-kachi; m'mbuto mwa pitambaya, nkhambala; m'mbuto mwa tsisi ya bidoo, mpala ngeti-ngeti; m'mbuto mwa nguwo zadidi, kuvala masakha; m'mbuto mwa kubalika, kuipa m'maso.

²⁵Amunako anafa na talasada, pontho anyankhondo amphamvu anafa pankhondo.

²⁶M'misuwo ya zioni panakhala kulira na kusintili; mzindawo unakhala ninga mkazi wakukhala pamataka wakusowa na chakuphata chene.