Read cisena YESAYA 30 Bible Online

YESAYA 30 - cisena bible

YESAYA 30

¹MBUYA akulonga kuti, “Dzedze kuna anthu akupandukira, dzedze kuna anyakusasanya kuchita pinthu, pile nee pidabulukire kuna ine tayu, kusasanya chiphatizano okhokha pyawo nee na kufuna kwanga tayu, kupimulukira okha ene pyakudawa.

²Iwo ambaenda kudziko ya Iguputo mbakhonda chakutoma vunza nzeru kuna ine pano; iwo ambapempha chiphedzo kuna mfumu wa Iguputo kuti Iguputo akhale pakubisala pawo.

³Mbwenye kuatchinjiriza kwa mfumu wa Iguputo kunakhala kwakuchitisa manyadzo kuna imwe, mthunzi wa Iguputo unakusiyani padzuwa nyimwa.

⁴Podi kwene kuti iwo ana mathubu mu Zoani, pontho kuti aimiriri awo afika kale ku Hanesi,

⁵munthu onsene wa ku Yuda anachitiswa manyadzo, thangwi ya mtundu wa anthu akusowa basa kuna iwo, ale nkhabe dzesa nee chiphedzo penu udidi tayu, mbwenye kudzesa kwene manyadzo na kululupiswa basi.”

⁶Izi ndi mphangwa zakubulukira kuna Mulungu zakulonga pya nyama za m'thando yatchetcha ya Negebu: Aimiriri a dziko akugwanda na m'dziko ya nyatwa, pontho ya anthu akusanyika; mule muna nkhalamu zimuna na zikazi, pipiri na nyoka zakumbuluka, uku athukula mfuma zawo kumsana kwa mabulu, pinthu pyawo kumsana kwa ngamila zawo kwenda kuna anthu okhonda kuaganyalisa,

⁷kwenda ku Iguputo kule chiphedzo chache nkhabe basa na pang'ono pene tayu. Natenepo ndidamthula Rahabi, nyangume wakulebwedeka.

⁸Mulungu adandipanga kuti ndilembe penepi pamwala wakuchita kusema, kuti ndilembe penepi mumpukutu, towera nsiku zinadzazo pikhale umboni wakwenda na kwenda.

⁹Anthu enewa mbakupandukira, ana akunama, ana okhonda sasanyika kuvesera upangizi wa MBUYA.

¹⁰Iwo akulonga kuna anyakulotera pya m'tsogolo mbati, “Lekani kuonave masomphenya!” Mbalonga pontho kuna maprofeti mbati, “Lekani kutipangave masomphenya akuona! Tipangeni kwene pinthu pyakutikomera basi, longani mphangwa zakunama.

¹¹Bulukani m'njira mwathu, fedzani kutali, ife nkhabe funa kuva pontho pya Nyakuchena wa Israele ule tayu!”

¹²Natenepo Nyakuchena wa Israele akulonga kuti, “Podi imwe mwakhonda mphangwa zenezi mbamunyindira pyanu kupondereza pontho kunyindira pyanu pinthu pyakunama,

¹³kuna imwe pyakudawa penepi pinasanduka ninga fufu yakulapha, yakukhala na m'nyanja pontho yakudidimuka, ile imbagwa kabodzi na kabodzi mwakututumusa.

¹⁴Iyo inasweka ninga chitomba, chakubwededzeka mwakusowa nsisi; iyo nkhabe dzasala na dzinga ene tayu kuti munakwanisa kupalira makala a moto paguwa yansembe, penu kukupira madzi mumchera.”

¹⁵MBUYA Mulungu, Nyakuchena wa Israele, akulonga kuti, “Imwe mbamudabwerera kuna ine kufuna kupuma, mbamudapulumuka, imwe mbamudamatama na kundinyindira, mbamudakhala anthu a amphamvu. Kwache imwe mudakhonda kuchita tenepo.

¹⁶Imwe mudalonga kuti, ‘Nkhabe, ife tinati tithawe pa akavalo.’ Natenepo imwe munati muthawedi! Imwe mudalonga kuti, ‘Ife tinati tipakire akavalo akumbuluka pyakwanga.’ Kwache anyakukuthamangisaniwo anambuluka pyakwanga kupiringana imwepo!

¹⁷Anthu chikwi chibodzi kuthuswa na munthu mbodzi ene basi; na kuthuswa na anthu ashanu monsenemwe munathawa, kufikirana mwasala ninga muti wa bandera pansonga ya phiri.”

¹⁸Kwache MBUYA akufuna pyakwanga kuti akukomereni mtima. Iye ngwakusasanyika kuti akuvereni nsisi, thangwi MBUYA ndi Mulungu wachilungamo. Ngakutsanzaya anthu ambaikha chidikhiro chawo pana iye ale!

¹⁹Imwe anthu a ku Zioni, ambakhala mu Yerusalemu ale, imwe nkhabe dzalirave tayu. Iye anakukomerani mtima pyakwanga ndzidzi unalirira imwe chiphedzo! Sindzidzi iye nkhukuvani, iye anati akutawireni.

²⁰Podi kwene kuti Mbuya ambakuchitisani kuona nyatwa, pontho kukuchitisani kusanyika, afunzisi anu nkhabe dzabisala tayu; imwe munati muaone na maso anu ene.

²¹Ngakhala imwe munazungunukira kumadyo penu nkhumabzere, makutu anu anava fala ikulonga m'nduli mwanu kuti, “Njira njeneyi, fambani na yeneyi.”

²²Penepo imwe munakhonda mifanikizo yanu yakukutizwa na siliva ile, pontho milungu yanu yakukukutizwa na golidi ile; imwe munaitaya ninga pinthu pyakunyansa mbamulonga kuna ipyo kuti, “Bulukani kutali na ife!”

²³Mbuya pontho anakuvumbisirani mvula thangwi ya mbewu zanu zidabzala imwe zile, pontho phoso imbapha dziko yanu inakhala yadidi pontho yakuinjipa. Ndzidzi wenewo ng'ombe zanu zinakhala na mpovu uzinji.

²⁴Ng'ombe zimuna na mabulu anu pimbalima na imwe pile pinadya goche yadidiletu yakuikhwa munyu.

²⁵Ndzidzi wenewo panakhala kupha pikulu pene, pontho nsanja za anyamalwanu zinagwa. Mikhwawa ya madzi inafamba kubulukira pa phiri yonsene yakulapha pontho ikulu.

²⁶Mwezi unaonesa cheza ninga dzuwa, pontho cheza cha dzuwa chinachena kanomwe kupiringana muna iyomu, ninga cheza cha nsiku zinomwe kuchiphataniza pabodzi pene. Penepi pinachitika MBUYA angamanga pironda pya anthu ache, mbawangisa pironda pidaapasa iye pile.

²⁷Yang'anani, MBUYA akudza kubulukira kutali, akudza na ukali wakugaka pontho makole akukhotha ninga utsi; milomo yache yadzala na ukali, pontho lulume ikugaka moto.

²⁸Muyache wakhala ninga madzi makulu akufika mpakana m'khosi. Iye asefa madzinza kufuna kuavunga mbaadzudzumisa kuna pidanyerezera iwo kupichita.

²⁹Mbwenye imwe, anthu a Mulungu, munaimba ninga mudachitira imwe mosiku adasekera imwe phwando yakupambulika ile; mitimanu inati isekere ninga mumbachitira anthu angaenda mbaimba pitoliro paphiri ya MBUYA, Phanzwi ya Israele ule.

³⁰MBUYA anachitisa anthu kuva falache yachifumu, pontho kuona mkono wache ukutchitha pansi na kuzhangali kukulu pontho na moto wakunyekesa, pabodzi pene na njazi, chiphaliwali na matalala.

³¹Na falache MBUYA anabalalisa anthu a ku Asiria; na ndodo yache iye anaatinthimula nayo.

³²Ndzidzi onsene unafuna MBUYA dzatinthimula anyamalwache na ndodo, panakhala kuimba nyimbo na ng'oma pontho anyakatangale, ndzidzi onsene unafuna iye dzaamenya na mashoko ache.

³³Tofeti, mbuto yakupisira pyakuipa ile, yasasanywa kale kupisa mfumu wa Asiria. Dzenje yache ya moto ili zwikoo pontho ili gabu-gabu, mwenemo ili yeri-yeri moto, pontho phamu-phamu na nkhuni; muya wa MBUYA, ule wakhala ninga nthunji ya sulufule, ndiye unafuna dzagasa moto.