Read cisena YESAYA 31 Bible Online

YESAYA 31 - cisena bible

YESAYA 31

¹Dzedze kuna anthu ambaenda kudziko ya Iguputo kufuna chiphedzo ale! Iwo ambanyindira akavalo awo ankhondo, kuinjipa kwa pingolo pyawo pyankhondo, pontho na mphamvu za anyakupakira akavalo. Kwache iwo nkhabe nyindira Nyakuchena wa Israele, penu kupempha MBUYA chiphedzo tayu.

²Iye ana nzeru, tenepo anakwanisa kudzesa nyatwa. Iye nkhabe bweza moto tayu angalonga. Iye anatchunyusa anthu akuipa pontho anthu ambaphedza anyakuchita pyakuipa ale.

³Anthu a ku Iguputo mbanthu ene pyawo, si Mulungu tayu; akavalo awo ndi nyama zene pyazo, si mizimu tayu. MBUYA angachita pinthu, dzinza ya mphamvu inasweka nyakuphedza anagwegweduka, pontho nyakuphedzwa anagwambo, tenepo onsene uwiriawo anamala vungwa.

⁴MBUYA adalonga kuna ine mbati, “Nkhabe pinthu tayu, amakabuswa alire penu kukhuwa pyawo tani, nkhabe kwanisa kuthamangisa nkhalamu kuti ileke nyama yapha iyo kale tayu; ntchibodzi-bodzi, nkhabe na chibodzi chene chile chinakwanisa kundilekesa ine, MBUYA Wamphamvu zonsene kutchinjiriza phiri ya Zioni.

⁵Ninga mumbachitira mbalame kumbuluka-mbuluka pachisa pache kutchinjiriza anache, sasawambo ine MBUYA Wamphamvu zonsene ndinayang'anira mwadidi na kutchinjiriza mzinda wa Yerusalemu.”

⁶MBUYA adalonga mbati, “Anthu a ku Israele imwe mwandidawira pontho mwandipokanya. Mbwenye chinchino bwererani kuna ine.

⁷Ndzidzi ukudza unafuna dzataya monsenene milungu yasiliva na yagolidi, ile idasasanya imwe na manjanu akudawikawa.

⁸“Aasiria anavungwa pankhondo, kwache nee na mphamvu za munthu tayu. Iwo anathawa kunkhondo, aphale awo mbakhala mabitchu.

⁹Mfumu wawo anathawa thangwi ya mantha pontho mathubu anagoswerwa pyakwanga mwakuti anakhonda mabandera awo ankhondo. MBUYA alonga, MBUYA ule moto wache uli mu Zioni, ule dzenje yache ya moto ili mu Yerusalemu.”