Read cisena YESAYA 32 Bible Online

YESAYA 32 - cisena bible

YESAYA 32

¹Nsiku inango panakhala mfumu wachilungamo, pontho mathubu ache anatonga na chilungamo.

²Onsenewa anakhala ninga pakubisaliramo kugopa mphepo, pontho mbuto yakubisaliramo kugopa chonzi. Iwo anakhala ninga mikulo yakukuka m'thando yatchetcha, ninga mthunzi wa chimwala chikulu m'mbuto yakusowa madzi.

³Maso a anthu akuona hanafungikave tayu, pontho makutu a anthu akuva anavesera.

⁴Iwo nkhabeve dzakhala anthu okhonda pirira tayu, mbwenye anachita pinthu mwakupivesa, pontho lulume yawo ya chibubu inasudzuka mbilonga mwadidi pontho pyakuveka.

⁵Pupwe nkhabe dzachemerwa nyakulemedzwa, penu nyakuipa kupaswa chilemedzo chikulu tayu.

⁶Pupwe ambalonga pinthu pyakupupwa mbanyerezera kuchita pinthu pyakuipa. Pinthu pimbachita na pimbalonga iye mphyakutikana kuna Mulungu, pontho nkhabe pasa pyakudya anthu anjala penu kupasa pyakumwa anthu anyota tayu.

⁷Nyakuipa ambachita pinthu pyakudawika; iye ambanyerezera pyakuvungiratu anyakutcherenga na pyakunama, pontho kuachitisa kukhonda khala na ufulu.

⁸Mbwenye nyakulemedzwa ambasasanya pinthu pyachilemedzo, pontho na mabasa a chilemedzo iye ambaimira dzololo.

⁹Imwe akazi akupolola, vani mafalanga, imwe akazi akugaya, vani pinafuna ine kulonga.

¹⁰Chinchino imwe muli pakupata, kwache chaka chamangwana ndzidzi ninga uno, munati mukhale panyatwa; panakhala nkhabe mfesa penu nsapo tayu.

¹¹Tetemerani, imwe akazi akukhala pakutonthola; gedemerani na mantha imwe anyakukhala pakupata! Dulani nguwo zanu, mbamuvale masakala m'chuno mwanu.

¹²Khalani manja m'khosi nama, thangwi mataka akubalisa pinthu, pontho minda yamfesa pyamala vungwa,

¹³tenepo ntcheswa na nyakhanche pikumera m'minda ya anthu anga. Lirani imwe nyumba zonsene zile zikhadadzala na kukomerwa, pontho lirani mzinda ukhadadzala na moyo ule.

¹⁴Podi na nyumba ya mfumu ene inakhondwa pontho mzinda wakufunika unavungikiratu monsene mwene. Nsanja na mipanda pimbaatchinjiriza pile pinasanduka madembe kwenda na kwenda. Mabulu am'tsanga anafamba-famba kweneko pontho mabira anagumana mpovu wadidi.

¹⁵Mbwenye Mulungu anatitumizira Mzimu wache kubulukira kudzulu. Thando inasanduka ya mataka adidi, tenepo minda inabala pinthu pizinji.

¹⁶Chilungamo chinadzakhala m'thando yatchetcha, pontho pyakulungama pinadzakhala m'minda yonsene yakubalisa pinthu.

¹⁷Podi munthu onsene anachita pyakulungama, tenepo panakhala mtendere pontho kukhonda thuswana kwenda na kwenda.

¹⁸Anthu anga anakhala na mtendere m'nyumba zawo, pontho pakupata m'misa mwawo, mbakhonda thuswa m'mbuto zawo zakupuma.

¹⁹Podi kwene kuti matalala avunge m'misitu, pontho mzinda mbusalazwa,

²⁰munthu onsene anakomerwa pyakwanga na mbewu zidabzala iye m'khundu-khundu mwa mikulo, pontho na mpovu ponsene pene kuti mabulu na ng'ombe pikwanise kudya.