Read cisena YESAYA 34 Bible Online

YESAYA 34 - cisena bible

YESAYA 34

¹Idzani chifupi imwe madzinza onsene; veserani imwe anthu onsene! Dziko yapansi mbivesere na pyonsene pimbakhala mwenemo, dziko yapansi yonsene na pyonsene pile pimbabulukira mwenemo!

²MBUYA azhangalira madzinza onsene; ukali wache uli pana anyankhondo awo onsene. Iye anaavunga monsene mwene mbaapereka m'manja mwa anyakucheka.

³Anyakuphiwa awo onsene anatayiwa, mitembo inakhala thasa-thasa kununkha; tenepo mapiri anamwerera chiropa chawo.

⁴Nyenyezi zonsene za kuthambo zinanyunguluka; thambo inafunyika ninga mpukutu, Nyenyezimbo zinagwa ninga masamba akuunyala a mfesa, pontho ninga makuyu akubundala.

⁵MBUYA asasanya talasada kudzulu, tenepo chinchino iye anati akuwaze Edomu, anthu adalonga iye kuti akonwa pontho athema kuvungwa ale.

⁶Talasadache inasamba chiropa, pontho inakukutizwa na mafuta, chiropa cha anabira na mbuzi, pontho na mafuta a mabira amuna. Thangwi MBUYA anachita nsembe mumzinda wa Bozira; m'dziko ya Edomu munakhala kucheka kukulu.

⁷Nyati zinaphiwa nawo pabodzi pene na anamphulu achimuna na ng'ombe zimuna zikulu-zikulu, pontho dziko yawo inakhuta chiropa, pontho mataka anamwerera mafuta.

⁸Thangwi MBUYA akoya nsiku inafuna iye dzabwezera, chaka chinafuna iye dzapulumusa Zioni.

⁹Mikulo ya Edomu inasanduka upula, pontho mataka anasanduka miyala ya moto ya sulufule. Dziko yonsene inagaka ninga upula.

¹⁰Mosiku na masikati motowo nkhabe dzathimiswa tayu; tenepo utsi unaoneka penepo kwenda na kwenda. Dziko inakhala yakusowa basa mfendu mpakana mfendu. Nkhabe munthu na mbodzi ene anagwanda na mwenemo tayu.

¹¹Anyakasenera na anyankalibwatha pontho madzidzi na matangwe pinakhala m'dzikomo; MBUYA anaichitisa kukhala thando yatchetcha pontho yakudzala na miyala.

¹²Panakhala nkhabe mfumu wakutonga dzikoyo. Atongi onsene anamala kwenda.

¹³Ntcheswa zinaphopha m'nyumba zonsene, dawe na nyakhanche anaphopha m'mipanda, pontho mibinzi na madzidzi pinakhala mwenemo.

¹⁴Nyama zam'tsanga zinagumanikana na matika, pontho mbala zinachemerezana unango na mwanzache; pirombo pyakufamba mumdima pinabwerambo kweneko mbapidzagumana mbuto yakupuma.

¹⁵Madzidzi anamanga pisa pyawo mbateya mazayi; iwo anaswa mbayang'anira mwadidi anawo m'maphaphido mwawo. Malezi anagumanyikana mwenemo pabodzi pene na akazawo.

¹⁶Yang'anani mumpukutu wa MBUYA mbamuwerenge: Nkhabe pya penepi pinafuna dzasowa tayu, pontho nee na chibodzi chene chinakhala chakusowa mankhadzi tayu. Thangwi walonga ndi mulomo wa MBUYA; Mzimu wache anapidzesa pabodzi pene.

¹⁷Ndi MBUYA ule anafuna dzagawa dziko pakati pawo mbapasa kada munthu khundu yache. Iwo anakhala m'dzikomo mfendu mpakana mfendu, tenepo inakhala dziko yawo ene kwenda na kwenda.