Read cisena YESAYA 35 Bible Online

YESAYA 35 - cisena bible

YESAYA 35

¹Thando na mbuto yakusowa pyakumera inati ikomerwe; pontho thando yatchetcha inati ikomerwe mbidzachita maluwa.

²Thando inaimba na kukhuwa thangwi ya kukomerwa, iyo inakhala yakukoma m'maso pyakwanga ninga mapiri a ku Lebanoni, pontho ya mataka akubalisa pinthu ninga minda ya ku Karimele na Sharoni. Munthu onsene anaona demelero ya MBUYA mbaona ukulu na mphamvu zache.

³Pasani mphamvu manja akutopa, pontho wangisani mabondo akusowa mphamvu.

⁴Pangani munthu onsene wakutaya mtima kuti, “Wangisa pontho leka chita mantha; Mulungu wako anati adze, iye anati adze kubwezera na kutchunyusa anyamalwako. Iye anadza dzakupulumusa.”

⁵Penepo maso a maboli-boli anafunguka, pontho makutu a madodo anatoma kuva.

⁶Penepo anyakulamala ananumpha-numpha ninga nyasa, alembo anyakumangika lulume anakhuwa thangwi ya kukomerwa. Madzi anatumbuka m'thando yatchetcha, pontho mikulo inakukuma m'thandomo;

⁷tchetcha yakugaka moto inasanduka nyanza, pontho mtunda wakuuma unakhala na mphuno za madzi. Mbuto zile zikhakhala mibinzi, maudzu, mitete na ululu pinameramo.

⁸Mwenemo munakhala msewu ukulu wakuchemerwa Njira Yakuchena. Nkhabe nyakudawa na mbodzi ene anagwanda na njira yeneyi tayu. Panakhala nkhabe mapupwe akudzudzumisa anthu akutewera njira yeneyi tayu.

⁹Nkhabe nkhalamu zinafuna dzakhala mwenemo tayu, nkhabe nyama zakugoswa zinagwanda na njira yeneyo, pontho nkhabe dzagumanwa mwenemo tayu. Anthu adaombolwa na MBUYA ale, anaenda na njira yeneyi.

¹⁰Ale adapulumuswa na MBUYA anabwerera. Iwo anapita mu Zioni na kusekera, kuimba na kukhuwa thangwi ya kukomerwa. Iwo anakomerwa kwenda na kwenda pontho nkhabe dzatsukwala penu kuva kupha tayu kwenda na kwenda.