Read cisena YESAYA 36 Bible Online

YESAYA 36 - cisena bible

YESAYA 36

¹Chaka chakhumi na chinayi Hezekia mbali mfumu wa Yuda, Senakeribu mfumu wa Asiria adasosa mizinda yakutchingwa na mpanda ya Yuda mbaipokosera.

²Tenepo iye adatuma mkadamu wa anyankhondo na gulu ikulu ya anyankhondo kwenda ku Yerusalemu kubulukira ku Lakishi kuna Mfumu Hezekia kampanga kuti aimise manja. Mkadamu ule adaimira pamsewu wakwenda ku Munda wa Nyakufula nguwo, chifupi na mgelo wakudzesa madzi kubulukira kuthawale ya kumtunda.

³Eliakimu mwana Hilikia mkadamu wamkulu wa kunyumba yachifumu; Shebina, nyakulemba m'thando ya miseru; pontho Yoa mwana Asafu, ule akhali nyakulemba pya m'dziko adadza dzagumanikana naye.

⁴Thubu wa ku Asiria ule adaapanga kuti Mfumu Senakeribu akhafuna kudziwa thangwi ikhachitisa Hezekia kuwanga mtima.

⁵Iye adalonga mbati, “Ayi imwe mukunyerezera kuti mafala okha basi anakwanisa kuphata basa m'mbuto mwa mphamvu na luso pya anyankhondo anu? Ayi mbani ananyerezera imwe kuti anakwanisa kukuphedzani kupandukira mfumu wa Asiria?

⁶Imwe mukunyindira Iguputo kukuphedzani, kwache penepyo pinakhala ninga kuphatisa basa phesi m'mbuto mwa mthondodzo; iyo inatchoka mbikutchonkhani m'manja. Mfumu wa Iguputo akhala ninga tenepo kuna munthu onsene anamnyindirayo.”

⁷Thubu wa ku Asiria ule adathimiza kulonga mbati, “Ayi mukundipanga kuti ananyindira imwe ndi MBUYA Mulungu wanu? Iye ngule mbuto zache zakupembedzerapo na maguwache ansembe zidavungwa na Hezekia, pidapanga iye anthu a ku Yuda na Yerusalemu kupembedza paguwa yansembe mu Yerusalemu mwene basi.

⁸“Ndinachita namwe betchi na dzina ya mbuyanga, mfumu wa Asiria. Ine ndinakupasani akavalo pikwi piwiri, ngakhala munagumana amuna akukwana kuapakira.

⁹Imwe munakwanisa tani kuimisana na mathubu a mfumu wa Asiria, podi na wamng'onoletu pakati pawo, podi kwene kuti mukunyindira basi kuti Aiguputo anakutumizirani pingolo na amuna akupakira akavalo?

¹⁰Ayi mukunyerezera kuti ine ndasosa na kuvunga dziko yanu mwakukhonda phedzwa na MBUYA? MBUYA makayo ndiye andipanga kuti ndiisose na kuivunga.”

¹¹Tenepo Eliakimu, Shebina pontho Yoa adalonga kuna mkadamuyo mbati, “Taphata miyendo, longani pyanu m'Chiaramu, thangwi ife timbachiva. Lekani longa m'Chiheberi thangwi anthu onsene akhala m'mafufuwa akuvesera.”

¹²Iye adatawira mbati, “Ayi mukunyerezera kuti mfumu wa ku Asiria andituma kulonga mphangwa kuna imwe na kuna mfumu yekha basi? Nkhabe, ine ndikulonga pontho kuna anthu akhala m'mafufuwa, ale athema kudya matubzi awo, pontho kumwa mitindo yawo ninga montho munafuna dzachitirambo imwepo.”

¹³Tenepo thubu ule adaimira mbalonga m'Chiheberi mwakugaluza fala mbati, “Veserani kuno pinakupangani mfumu wa Asiria.

¹⁴Iye akukucheuzani kuti muleke nyengezwa na Hezekia. Hezekia nkhabe kwanisa kukupulumusani tayu.

¹⁵Pontho lekani kumtawira kukunyengererani kuti munyindire MBUYA. Lekani nyerezera kuti MBUYA anakupulumusani pontho kuti iye anakhondesa Asiria kupokosera mzindanu.

¹⁶“Lekani vesera pinalonga Hezekia! Mfumu wa Asiria akukutongani kuti mubuluke mumzindamo mbamuimise manja. Tenepo monsene munatawiriswa kudya mfesa na makuyu a m'miti mwanu, pontho kumumwa madzi a m'michera yanu ene,

¹⁷kufikirana mfumu akukhazikiseni m'dziko sasawa ninga yanuyi, kule kuna minda ya mfesa kuti ikupaseni vinyu, pontho kuna mapira kuti mukwanise kuphika mikate.

¹⁸“Hezekia mbaleke kukunyengezani pakunyerezera kuti MBUYA anakupulumusani. Ayi ilipo milungu ya anthu anango, ile idapulumusambo madziko awo m'manja mwa mfumu wa Asiria?

¹⁹Chinchino ili kupi milungu ya Hamati na Aripadi? Ili kupi milungu ya Sefaravaimu? Ayi alipo unango adapulumusa Samaria?

²⁰Ndi lini milungu ya madziko onseneyi idatoma kupulumusa madziko awo kuna mfumu wa Asiria. Apo ninji chinakuchitisani kunyerezera kuti MBUYA anakwanisa kupulumusa Yerusalemu?”

²¹Anthu adamatama ninga montho mukhadaapangira mfumu Hezekia; iwo hadabuluse na fala ene tayu.

²²Tenepo Eliakimu, Shebina na Yoa adang'amba nguwo zawo thangwi ya kutsukwala mbaenda kapanga mfumu pikhadalonga thubu wa Asiria ule.