Read cisena YESAYA 37 Bible Online

YESAYA 37 - cisena bible

YESAYA 37

¹Sindzidzi Mfumu Hezekia nkhuva penepi adang'amba nguwo zache thangwi ya kutsukwala. Iye adavala masakha mbaenda ku Nyumba ya MBUYA.

²Iye adatuma Eliakimu thubu wamkulu wa kunyumba ya mfumu, Shebina nyakulemba m'thando ya miseru na anyansembe akulu kwenda kuna mprofeti Yesaya mwana Amozi. Iwo adavalambo masakha.

³Iwo adatumwa kuna Yesaya na mphangwa kuna Yesaya zakuti: “Lero ndi nsiku ya nyatwa; tikutchunyuswa pontho tikuchitiswa manyadzo. Takhala ninga mkazi wa mimba, ule asasanyika kulekwa kwache nkhabe mphamvu.

⁴Mfumu wa Asiria atuma thubu wache wamkululetu dzatikana Mulungu wamoyo. MBUYA Mulungu wanu mbave kutikana kweneku, pontho mbatchunyuse anthu adalonga penepi ale. Natenepo pemphererani kuna Mulungu anthu asalira na moyo ale.”

⁵Pidava Yesaya mphangwa zidatumiza Mfumu Hezekia kuna iye zile,

⁶adatawira mbati, “MBUYA akukupangani kuti muleke tawirisa Aasiria kukuthuswani na pinalonga iwo kuti MBUYA nkhabe kwanisa kukupulumusani tayu.

⁷MBUYA anachitisa mfumu wa Asiria kuva mbiri, ile inafuna kumchitisa kubwerera kudziko kwache, natenepo MBUYA anamchitisa kuti aphiwe kweneko.”

⁸Thubu ule adava kuti mfumu wa Asiria akhadabuluka mu Lakishi, pontho kuti akuchita nkhondo na mzinda wachifupi na Libina; natenepo adenda kweneko kamvunza.

⁹Mbiri idaveka pakati pa Aasiria kuti gulu ya anyankhondo a ku Iguputo yakutsogolerwa na Mfumu Tirihaka wa ku Kushiikhadza dzamenyana nawo. Pidava mfumu wa Asiria penepi, adatumiza kalata kuna Hezekia

¹⁰mfumu wa Yuda kulonga kuna iye kuti, “Mulungu ananyindira iweyo akupanga kuti ine sinakwanisa kukukunda tayu, kwache penepi pileke kukunyengeza.

¹¹Iwe wava pimbachita mfumu wa Asiria kuna madziko onsene anafuna iye kuavungawo. Ayi ukunyerezera kuti unakwanisa kupulumuka?

¹²Makolo anga adavunga mizinda ya Gozani, Harani, na Rezefi mbapha anthu a ku Betedeni, akhakhala mu Telasara ale, tenepo nkhabe na mbodzi ene wa milungu yawo adakwanisa kuapulumusa tayu.

¹³Ali kupi mafumu a ku Hamati, Aripadi, Sefaravaimu, Hena, penu Iva?”

¹⁴Mfumu Hezekia adakwata kalata idadza na anyamphangwa ile mbaiwerenga. Tenepo iye adenda ku Nyumba ya Mulungu mbaikha kalata ile pamaso pa MBUYA

¹⁵mbapemphera mbati,

¹⁶“MBUYA Wamphamvu zonsene, Mulungu wa Israele, nyakukhala pampando wanu wachifumu padzulu pa pyakulengwa pyakukhala na maphaphido, imwe ene basi ndimwe Mulungu, nyakutonga maufumu onsene a padziko yapansi. Imwe mudalenga dziko yapansi na thambo.

¹⁷Chinchino MBUYA ngativesereni, pontho yang'anani pinthu pinatichitikirapi. Ngaveserani pinthu pyonsene pinalonga Senakeribu kutikana imwe, Mulungu wamoyo.

¹⁸Ife tonsene timbadziwa, MBUYA, mafumu a Asiria adavunga madzinza mazinji mbachitisa madziko awo kusanduka madembe,

¹⁹mbapisa milungu yawo, ile si milungu chadi-chadi tayu, mbwenye mifanikizo ene pyawo yamiti na yamiyala yakusasanywa na manja a anthu.

²⁰Chinchino MBUYA Mulungu wathu, tipulumuseni kuna Asiria, towera madzinza onsene a padziko yapansi apidziwe kuti imwe ene basi MBUYA ndimwe Mulungu.”

²¹Kubuluka penepo Yesaya adatumiza mphangwa kuna Mfumu Hezekia kumpanga kuti MBUYA ava kupemphera kwache,

²²mbamtawira kuti, “Mzinda wa Yerusalemu ukukuseka iwe, Senakeribu, pontho ukukululupisa.

²³Mbani akhanyerezera iwe kuti ukumtikana pontho kumsedegula ule? Iwe wandiselusa ine Mulungu, Nyakuchena wa Israele.

²⁴Iwe udatuma anyabasa dzagaya kuna ine kuti na pingolo pyako pyonsene pyankhondo iwe udakunda mapiri akulaphaletu a Lebanoni. Iwe udatumbama kuti kwene udagwandako miti yakulaphaletu yamkungudza pontho na miti yadidiletu yapaina mbufika pakatiletu pa misitu yakuphopha.

²⁵Iwe udagaya kuti udakumba michera mbumwa madzi m'madziko achilendo, pontho manyalo a anyankhondo ako adaponda mbaumisiratu mikulo ya mu Iguputo.

²⁶“Ayi chipo iwe hudapive tayu kuti kale ene ine ndidanyerezera kuchita pyonsenepi? Tenepo chinchino ndapichitadi. Ine ndidakupasa mphamvu kuchitisa mizinda yakutchingwa na mpanda kusanduka milu ya madongolomwa.

²⁷Anthu akhakhala mwenemo ale, akhali adamala khutchwa mano; iwo adaswipa mtima mbachita mantha pikulu. Iwo akhali ninga mbewu m'munda, ninga mphukira zitete pontho ziwisi, penu ninga maudzu akumera pansoyi, ale ambaunyala mbadzati kula.

²⁸“Mbwenye pyonsene pya iwe ndimbapidziwa, pimbachita iwe na konsene kwene kumbaenda iwe. Ine ndimbadziwa na ukali umbachita iwe kupokanyisana na ine.

²⁹Ine ndava pya ukali wako na kugaya kumbachita iwe, natenepo chinchino ndinati ndiikhe ngoloweko m'mphuno mwako mbandiikha simbi m'kanwa mwako ninga kavalo mbandikubweza na njira yontho idadza na iwe ile.”

³⁰Tenepo Yesaya adalonga kuna Mfumu Hezekia mbati, “Ichi ntchidzindikiro cha pinthu pinafuna dzachitika pile. Chaka chino na chamangwana munadya magoko, mbwenye chaka chamkuchono munakwanisa kubzala mbewu zanu zene mbamuvuna, pontho munabzala mbewu zamfesa mbamudya nsapo zache.

³¹Anyakusalira na moyo mu Yuda ale, anavata ninga miti, ile imbazikisa mitsitsi yache pansiletu m'mataka mbibala nsapo.

³²Panakhala anthu mu Yerusalemu na paphiri ya zioni anyakusalira na moyo ale, thangwi chipapu cha MBUYA Wamphamvu zonsene chinachitisa kuti penepi pichitike.

³³“Penepi ndiye pyalonga MBUYA pya mfumu wa Asiria: Iye nkhabe dzapita mumzinda muno, penu dzaponya tswimo na ibodzi ene tayu. Nkhabe anyankhondo akuphatira pyakugedera matswimo anabwera chifupi na mzindawu, penu kumuluka mataka kutsamira mpandawu tayu.

³⁴Iye anabwerera kwawo na njira yontho idadza na iye ile mbachimwana kupita mumzindamo. Ndalonga ndine MBUYA.

³⁵Ine ndinatchinjiriza mzindawu mbandiupulumusa, na thangwi ya chilemedzo changa pontho na kudumbira kudachita ine kuna nyabasanga Davite.”

³⁶Mngelo wa MBUYA adenda kumsasa wa Aasiria mbapha anyankhondo pikwi dzana na makumasere na ashanu. Mangwana mwache m'makalakwecha iwo akhali thasa-thasa, onsene amala kufa!

³⁷Tenepo Senakeribu mfumu wa Asiria adafudza msasache mbabwerera mumzinda wa Ninevi.

³⁸Nsiku inango pikhapembedza iye m'nyumba ya milungu yache Nisiroki, anache awiri achimuna, Adrameleki na Sharezere adampha na matalasadawo mbathawira kudziko ya Ararati. Tenepo unango mwa anache, dzinache Esarihadoni adapita ufumu m'mbuto mwache.