Read cisena YESAYA 40 Bible Online

YESAYA 40 - cisena bible

YESAYA 40

¹Mulungu wanu akulonga kuti: “Matamani, matamani, anthu anga.

²Wangisani mtima anthu a ku Yerusalemu. Apangeni kuti ndzidzi wawo wa nyatwa wamala, pontho kuti pyakudawa pyawo pyalekererwa.[38] Ine, MBUYA, ndaatchunyusa malingana na kuinjipa kwa pyakudawa pyawo.”

³Munthu unango akukhuwa m'thando yatchetcha mbati, “Msasanyireni njira MBUYA m'thando yatchetcha; ndendemezani msewu m'thandomo, towera Mulungu wathu afambemo!

⁴Maphedi onsene anafikhirwa; mapiri onsene pontho pitunda pyonsene pinasalazwa; madziko onsene amiyala anamyalaliswa.

⁵Tenepo demelero ya MBUYA inatchululwa, pontho anthu onsene anaiona. Thangwi MBUYA mwenechiro ndiye alonga kuchita penepi!”

⁶Fala ikuveka kuti, “Lalika.” Tenepo ine ndidavunza kuti, “Ninji chinafuna ine lalika?” “Anthu onsene akhala ninga maudzu, pontho demelero yawo yakhala ninga maluwa am'tsanga.

⁷Maudzu ambaunyala, maluwambo ambalakatika, thangwi muya wa MBUYA umbapepesa pana iwo. Andedi, anthu akhala ninga maudzu.

⁸Maudzu ambaunyala, maluwambo ambalakatika, mbwenye mafala a Mulungu wathu ambakhalapo kwenda na kwenda.”

⁹Imwe anyakudza na mphangwa zadidi kuna Zioni, kwirani paphiri yakulapha. Imwe anyakudza na mphangwa zadidi kuna Yerusalemu, chemerani mwakugaluza fala,[39] galuzani fala mbamukhonde chita mantha; longani kuna maluwani a Yuda kuti, “Mulungu wanu akudza!”

¹⁰Yang'anani, MBUYA Mulungu akudza na mphamvu, pontho akutonga na mkono wache. Yang'anani, akudza na mfupo wache,[40] wakuphatana na pyakupagali pyache.

¹¹Ninga makabuswa, iye ambayang'anira mwadidi mkumbi wache: iye ambagumanyisa pabodzi anabira mbaathukula m'manja mwache; iye ambatsogolera abzade mwakufulika.

¹²Chipo mbani adatoma kupima madzi a m'bara m'thavu mwache, penu kupima thambo na makhono ache? Chipo mbani adatoma kuikha mataka a dziko yonsene yapansi m'chitundu, penu kupima kulemera kwa mapiri pontho pitunda na mdida?

¹³Chipo mbani adatoma kumpanga MBUYA pyakuchita, penu munthu kukhala phungu wache?

¹⁴Nkhwa animbo kudatoma MBUYA kuvunza nzeru, mbani adatomambo kumfunzisa kuchita pyakulungama? Mbani adamfunzisa nzeru, penu kumuonesa njira zakuvesa pinthu?

¹⁵Ndimomwene kuti madzinza akhala ninga dontho ya madzi m'chitomba; iwo ambayeswa ninga fumbi pamdida; iye ambapima ntchuwa khala ninga fumbi.

¹⁶Lebanoni miti yache njakuchepa pyakwanga kuphatisira moto wa paguwa yansembe, penu nyama zonsene kukwana kuzipereka nsembe zakupyerera.

¹⁷Pamaso pache madzinza onsene si pinthu tayu; iye ambaawerengera ninga si pinthu tayu, pontho ngakusowa basa.

¹⁸Apo, mbani unango anakwanisa imwe kusangiza na Mulungu? Chinthu chache ntchipi chinakwanisa imwe kumsangiza nacho?

¹⁹Kulonga pya mfanikizo, munthu ambausasanya, nyakufula simbi ambaukukutiza na golidi, mbausasanyira mkufu wasiliva.

²⁰Nyakutcherengaletu wakuti nkhabe kwanisa kupereka nsembe ninga yeneyi, ambasankhula thabwa yakuti imbavunda ile. Iye ambasaka nyakusema waluso kusasanya mfanikizo ule nkhabe limbuka tayu.

²¹Kadi imwe nkhabe dziwa tayu? Ayi imwe mudapive tayu? Ayi imwe hamupangwe tayu kubulukira pakutoma? Ayi imwe hamudatome kuvesa tayu kutomera pakulengwa kwa dziko yapansi?

²²Iye akhala pampando wache wachifumu padzululetu pa dziko yapansi; anthu apansi pano akhala ninga nthete. Iye ambafuthula thambo ninga nguwo yakutchinga nayo, ninga khumbi yakufuna kukhalamo.

²³Iye ambachepesa ana mafumu, mbatchithisa pansi mafumu a dziko yapansi.

²⁴Iwo akhala ninga mbewu zing'ono-zing'ono kumera kwene mbazisowa mitsitsi. MBUYA angagwisa mphepo izo zimbauma, pontho chivumbulu chimbazitswaira ninga dzungu.

²⁵Mbani anakwanisa kusangizwa na Mulungu Wakuchena? Ayi pana unango pontho ninga iye?

²⁶Kwizani maso mbamuyang'ane kuthambo: Mbani adalenga pinthu pyonsenepi? Ule ambatsogolera nyenyezi ninga gulu ya anyankhondo, ule ambadziwa kuinjipa kwazo mbazichemera zonsene na madzinawo. Na thangwi ya mphamvu zache zikulu pyakwanga izo nkhabe tayika tayu!

²⁷Watani unalonga, iwe Yakobo, pontho watani unadungunya, iwe Israele kuti, “Njiranga yabisika kuna MBUYA; mseru wanga Mulungu wanga nkhabe kuuikha konta tayu”?

²⁸Ayi iwe nkhabe kupidziwa tayu? Ayi hudapive tayu? MBUYA ndi Mulungu wakukhala na kukhala; Nyakulenga dziko yonsene yapansi. Iye nkhabe topa na pang'ono pene, pontho udziwisi wache munthu nkhabe kuuvesa tayu.

²⁹Iye ambapereka mphamvu kuna anyakutopa, mbathimizira mboko kuna anyakusowa mphamvu.

³⁰Podi na aphale ene ambatopambo mbasowa mphamvu, pontho aphale ambagwegweduka mbagwa,

³¹mbwenye anyakunyindira MBUYA anapaswa mphamvu zitswa. Iwo anambuluka na maphaphido ninga mphamba; iwo anathamanga mbakhonda topa, anafamba mbakhonda komoka.