Read cisena YESAYA 41 Bible Online

YESAYA 41 - cisena bible

YESAYA 41

¹Mulungu akulonga kuti, “Matamani pamaso panga, imwe madziko akutali! Madzinza mbachitise mphamvu zawo kukhala pontho zitswa! Mbadze patsogolo mbalonge; tendeni tikagumane kuthando yakutongerako miseru.

²Mbani adzesa nyakukunda wakumabulukiro dzuwa,[41] mbamchitisa kukunda konsene kwene kunaenda iye? Mbani ambamchitisa kukunda mafumu na madzinza? Iye ambaasanduza kukhala fumbi na talasadache, mbaabalalisa ninga dzungu na matswimo ache.

³Iye ambaathamangisa mbafamba mwakukhonda goswiwa, na njira ile manyalo ache chipo adzati pondako tayu.

⁴Mbani adachitisa penepi kuchitika, kuchemera mifendu yonsene kubulukira pakutoma pale? Ine MBUYA, nyakutoma pakati pawo, pontho nyakumalisira pakati pawo; Ine ndine pano.

⁵“Anthu a madziko akutali apiona penepi mbachita mantha; dziko yapansi ikutetemera na mantha. Iwo akudza mbafika chifupi na ine;

⁶kada munthu kuphedza mwanzache mbalonga kuna iye mbati, ‘Wangisa mbaleanga!’

⁷Nyampala matabwa ambawangisa mtima nyakufula golidi mbati, ‘Waphata basa!’ Nyakumyalalisa mfanikizo ambawangisa mtima nyakuukhoma pakulonga kuti kuotchererako nkhwadidi pyakwanga. Tenepo iye ambaukhoma na mapedego, towera uleke limbuka.

⁸“Mbwenye iwe Israele, nyabasanga, iwe dzinza ya Yakobo idasankhula ine ile, pidzukulu pya shamwalianga Abrahamu,

⁹ndidakukwatani kubulukira kumadolomero a dziko yapansi; ndidakuchemerani kubulukira kunkhomo zakutaliletu mbandilonga kuna iwe kuti, ‘Iwe ndiwe nyabasanga. Ine ndidakusankhula mbandileka kukukhonda.’

¹⁰Tenepo leka chita mantha, thangwi ndili nawe; leka taya mtima, thangwi ine ndine Mulungu wako! Ndinakupasa mphamvu mbandikuphedza; ndinakutchinjiriza na mkono wanga wamphamvu.

¹¹“Onsene anakuzhangalira ale, anati achite manyadzo mbalulupiswa, alembo anachita nawe nkhondo hanakhalave pinthu tayu, mbwenye anavungika.

¹²Anyamalwako nkhabe dzaonekave tayu, ale ambachita nawe nkhondo anafa.

¹³Thangwi ndine MBUYA Mulungu wako; ule ambakuphata pamkono mbalonga kuna iwe kuti: ‘Leka chita mantha; ndinakuphedza.’

¹⁴Leka chita mantha iwe unyoka, Yakobo, Iwe Israele wamng'onoletu, thangwi ine ndinakuphedza. Ndalonga ndine MBUYA Dombo wako, Nyakuchena wa Israele.

¹⁵Yang'ana, ndinakusandusa chakububudira tirigu, chakukhala na mano mazinji atswa pontho akutwa. Iwe unabubuda mapiri mbuaaphumudza; pitundambo unapisanduza fumbi.

¹⁶Iwe unapivuluza, mbapidzambuluswa na mphepo, chonzi chinapibalalisa. Tenepo iwe unakomerwa thangwi ya MBUYA mbaupereka demelero kuna Nyakuchena wa Israele.

¹⁷“Anyakutcherenga na anyakusowa anasaka-saka madzi, kwache nkhabe dzaagumana tayu; kukhosi kwawo kumbauma kakata na nyota. Mbwenye ine MBUYA ndinava kupemphera kwawo. Ine Mulungu wa Israele, nkhabe dzaapasa nkhodolo tayu.

¹⁸Ndinachitisa mikulo kukuka m'mapiri akupupwa, pontho mphuno za madzi kutumbuka m'maphedi. Ndinasandusa thando yatchetcha kukhala mathawale a madzi, pontho mataka akuuma kukhala mphuno za madzi.

¹⁹Ndinachitisa miti yamkungudza na kesha kumera m'thando yatchetcha, pontho na miti ya mitule[42] na olivi. Misitu inamera m'mbuto zakusowa mataka adidi, misitu ya paina, yunipari, na njale,

²⁰towera anthu apione mbapidziwa, pontho kupinyerezera na kupivesa, kuti mkono wa MBUYA ndiye wachita penepi, kuti Nyakuchena wa Israele ndiye adalenga penepi.”

²¹MBUYA akulonga kuti, “Idzani nawo kuno mseru wanu.” Mfumu wa Yakobo akulonga kuti, “Perekani umboni wanu.

²²Idzani kuno na mifanikizo yanu kuti itipange pinthu pinafuna dzachitika. Ngatipangeni pinthu pyakale pikhalinji, towera tipinyerezere mbatidziwe kuti pinamala tani penu pinafuna dzachitika m'tsogolo ninji.

²³Tipangeni kuti kutsogolo kunanji, towera tipidziwe kuti ndimwe milungu! Chitani chinthu chinango chadidi penu chakuipa, towera titaye mtima mbatichite mantha!

²⁴Mbwenye imwe, mifanikizo, si imwe pinthu tayu, pontho mabasanu ngapezi-pezi; ule adakupembedzani ngwakunyansa!

²⁵“Ine ndalamusa munthu wakubulukira kumabulukiro dzuwa;[43] uyo anadzayo. Ndinachitisa munthuyo, ule ambachemera dzinanga, kusosa kutomera kumpoto. Iye ambapondedza atongi khala ninga akupondedza matope, ninga nyakuumba pyombo kukanya dongo.

²⁶Mbani adalonga pya pinthu ninga penepi kubulukira pakutoma, towera ife tikwanise kupidziwa, penu kupilongeratu, towera ife tikwanise kulonga kuti, ‘Iye adalonga pyakuona’? Nkhabe mfanikizo unango udalonga pya penepi tayu, nkhabe unango adalongeratu pya penepi tayu, nkhabe na mbodzi ene adava fala yakubulukira kuna imwe tayu.

²⁷Ine ndikhali nyakutoma kupanga zioni kuti; ‘Ngayang'ana, iwo ali pano!’ Ine ndidatuma nyamphangwa ku Yerusalemu kalonga pya mphangwa zadidizi.

²⁸Ine ndikuyang'ana, kwache nkhabe onako na mbodzi ene tayu, nkhabe na mbodzi ene pakati pa milungu wakukwanisa kupereka uphungu, nee na mbodzi ene wakukwanisa kunditawira pikhaavunza ine.

²⁹Yang'anani, milungu yonsenewo njakunama! Kuinjipa kwa mabasawo nkhwapezi nako; mifanikizo yawo si pinthu tayu, njakusowa basa.”