Read cisena YESAYA 42 Bible Online

YESAYA 42 - cisena bible

YESAYA 42

¹MBUYA akulonga kuti, “Ngweneyu nyabasa, apasa ine mphamvu ule, nyakusankhulikanga, akomerwa na ine ule; ndinaikha Mzimu wanga muna iye, tenepo iye anadzesa chilungamo kuna madzinza onsene.

²Iye nkhabe dzakhuwa penu kulira, penu kugaluza fala m'njira tayu.

³Mtete wakutchoka, iye nkhabe dzaumalisa, penu dzathimisa nsakali yakupuchira tayu. Mwakukhulupirika iye anadzesa chilungamo kuna anthu onsene.

⁴Iye anakhala na chidikhiro mbakhonda dzataya mtima, mpakana iye anakhazikisa chilungamo padziko yapansi. Anthu a madziko akutali akudikhira mwambo wache.”

⁵MBUYA Mulungu adalenga kudzulu mbakufuthula; iye adasasanya dziko yapansi na pyonsene pili mwenemo. Iye adapasa muya anthu ache, pontho moyo kuna pyonsene pimbafamba mwenemo pile. Tenepo iye akulonga tenepa:

⁶“Ine MBUYA ndakuchemera kuti ukhazikise chilungamo; ine ndinakuphata pamkono mbandikukoya. Kudzera muna iwe ndinachita chiverano na anthu onsene, pontho kudzesa cheza kuna anthu a madzinza onsene,

⁷Unafungula maso a maboli-boli, unasudzula anyaperezo m'kadyaboso na kubulusa anyakumangwa mumdima.

⁸“Ine ndine MBUYA; yeneyo ndi dzinanga! Demelero yanga nkhabe dzagawana na unango, penu kupasa chilemedzo changa mifanikizo tayu.

⁹Yang'anani, pinthu pyakale pyachitika, pontho pya pinthu pitswa pinafuna ine kulongapi; ipyo mbapidzati chitika, ine ndinapilongaletu.”

¹⁰Imbirani MBUYA nyimbo itswa, Mkuzeni na nyimbo kubulukira nkhomo mpakana nkhomo ya dziko yapansi, Mkuzeni imwe anyakufamba na miyadiya pabara. Mkuzeni imwe anyamgombe na anyamntchuwa.

¹¹Thando na maluwani ache mbakhuwe; anyakukhala mu Kedara mbasekere. Anyakukhala mu Sela mbaimbe thangwi ya kukomerwa, iwo mbakhuwe pansonga za mapiri.

¹²Iwo mbapereke demelero kuna MBUYA, pontho mbalalike pya ukulu wache m'madziko akutali.

¹³MBUYA anaenda kachita nkhondo ninga nyankhondo wamphamvu, ninga nyankhondo iye anaonesa shungu ache; na mkhuwo iye anachitisa nkhondo kuvekera pontho iye anakunda anyamalwache.

¹⁴“Ndzidzi ukulu ene ndakhala pyanga mulomo phoo, ine ndamatama pyanga mbandikhonda chitapo pinthu. Mbwenye chinchino ninga mkazi wa mimba pakubala, ndikulira, pontho kupuma na befu.

¹⁵Ndinavunga pitunda na mapiri, mbandiumisa maudzu na miti. Ndinasandusa mikulo m'maphedi kukhala mathando atchetcha mbandiumisa mathawale a madzi.

¹⁶Ndinaphata nsenji maboli-boli, na njira ile chipo hadzati gwandamo tayu, kuatsogolera na njira inakhonda iwo dziwa, Mdimawo ndinausandusa cheza, mbandiaasalazira dziko ya makolong'ondo. Penepi ndiye pinafuna ine dzachita; ine nkhabe dzaapasa nkhodolo tayu.

¹⁷Kwache onsene anyakunyindira mifanikizo, ale ambalonga kuna adzimunthu kuti, ‘Imwe ndimwe milungu yathu,’ anabwezwa na manyadzo pikulu pene.”

¹⁸MBUYA akulonga kuti, “Veserani kuno, imwe madodo; yang'anani imwe, maboli-boli mbamuone!

¹⁹Ayi pana munthu unango ule ndi boli-boli kupiringana nyabasanga, ule ndi dodo ninga nyamphangwa adatuma ine ule? Boli-boli mbani ninga munthu ambapipereka kuna ine ule, boli-boli ninga nyabasa wa MBUYA?

²⁰Israele waona na maso pinthu pizinji pene, kwache iwe nee udapiikhe konta tayu; makutu ako ngakufunguka, kwache iwe nee udave chinthu na chibodzi chene tayu.”

²¹Thangwi ya kulungama kwache MBUYA adafuna pyakwanga kuchitisa mwambo wache kukula pontho kudemelera.

²²Kwache enewa mbanthu adavungwa, pontho kupokoserwa pinthu ale; onsenewo amala gwera m'mulindi, penu kubiswa m'perezo. Iwo asanduka pinthu pyakupokoserwa, wakusowa munthu na mbodzi ene wakuapulumusa; iwo asanduka pinthu pyakupokoserwa, wakusowa na munthu ene wakulonga kuti, “Abwezeni kwawo.”

²³Mbani wa imwe anavesera penepi, penu dzapiikha konta ndzidzi unadzawo?

²⁴Mbani adapereka Yakobo m'manja mwa anyamalwa, Israele m'manja mwa anyakupokosera pinthu? Ayi si MBUYA, adadawira ife ule tayu? Iwo hadavere tayu upangizi wache; iwo hadavere tayu matongero ache.

²⁵Natenepo iye adakhuthulira pana iwo ukali wache wakugaka na nyatwa za nkhondo. Udaafinikiza na malulume a moto, kwache iwo hapivese tayu; motowo udaapisa, kwache iwo hadapiikhe konta tayu.