Read cisena YESAYA 43 Bible Online

YESAYA 43 - cisena bible

YESAYA 43

¹Mbwenye lero MBUYA akulonga tenepa, ule adalenga iwe, Yakobo, ule adasasanya iwe Israele: “Leka chita mantha, thangwi ndakuombola; ine ndakuchemera na dzinako, iwe ndiwe wanga.

²Iwe ungagwanda na pamadzi, ndinati ndikhale nawe; ungawambuka mikulo, madzi nkhabe dzakukulula tayu. Iwe ungagwanda na pamoto, iwe nkhabe dzapya tayu; malulume a moto nkhabe dzakunyanguta tayu.

³Thangwi ine ndine MBUYA, Mulungu wako, Nyakuchena wa Israele, Nyankhombo wako; ndinapereka Iguputo kufuna kuombola iwe, pontho Kushi na Seba m'mbuto mwako.

⁴Podi iwe ndiwe wakufunika pontho nyakulemedzwa pamaso panga, pontho na thangwi yakuti ndimbakufuna, ndinapereka anthu kufuna kuombola iwe, pontho amuna kufuna kuombola moyo wako.

⁵Leka chita mantha, thangwi ine ndili nawe! Ndinadzesa anako kubulukira kumabulukiro dzuwa pontho mbandikugumanyisani kubulukira kumadokero dzuwa.

⁶Ndinapanga kumpoto kuti, ‘Aleke anthu anga kwenda,’ pontho kupanga kumwera kuti, ‘Leka kuakhondesa kwenda.’ Dzesa ananga achimuna kubulukira kumadziko akutali, pontho ananga achikazi kubulukira kumadolomero a dziko yapansi,

⁷munthu onsene wakuchemerwa na dzinanga, ule adalenga ine kuti andidzesere demelero, ule adaumba ine mbandimsasanya.”

⁸Mulungu akulonga kuti, “Phata nsenji ale ana maso, kwache ndi maboli-boli, ale ana makutu, kwache ndi madodo.

⁹Madzinza onsene amala gumanyikana pabodzi pontho anthu anga akugumanyikana. Mbani wa iwo adalongeratu pinthu penepi, pontho kulalika kuna ife pinthu pyakale? Alekeni adze na mboni zawo kuonesa kuti iwo ngakuona, towera anthu anango akwanise kuva mbalonga kuti, ‘Mphyakuonadi.’

¹⁰“Imwe anthu a ku Israele, ndimwe mboni zanga, pontho anyabasanga adasankhula ine ale, towera mukwanise kundidziwa mbamundikhulupira pontho kuvesa kuti Ine ndine ene basi. Nkhabe Mulungu unango pontho pambali pa ine tayu, pontho nkhabe dzakhalapo unango m'nduli mwanga tayu.

¹¹Ine, podi ine ene, ndine MBUYA, tenepo pambali pa ine nkhabeve nyankhombo unango tayu.

¹²Ine ndapitchulula pontho ndapilongeratu, tenepo ndidakupulumusani. Nee milungu inango yachilendo pakati panu idachita penepi tayu. Imwe ndimwe mboni zanga kuti ndine Mulungu. Ndalonga ndine MBUYA.

¹³Ande, pontho kubulukira pakutomaletu ine ndine pano. Nkhabe na mbodzi anakwanisa kupokosera m'manja mwanga tayu, ine ndingachita pinthu, mbani anakwanisa kundikhondesa?”

¹⁴MBUYA akulonga tenepa, Nyankhombo wako, Nyakuchena wa Israele: “Na thangwi ya imwe ndinatuma anyankhondo kusosa Babiloni, pontho Ababiloni onsene anathawa kwawo m'miyadiya ikhanyadira iwo ile.

¹⁵Ine ndine MBUYA, Nyakuchenako, Adalenga Israele ule, Mfumu wako.”

¹⁶MBUYA akulonga tenepa, ule adasasanya njira pakati pa bara, njira yakugwanda na pamadzi amphamvu,

¹⁷ule adabulusa pingolo pya nkhondo na akavalo, gulu ya nkhondo na anyankhondo pabodzi pene, tenepo iwo adagwa mbachimwana kulamuka pontho adathima ninga nsakali.

¹⁸Mbwenye MBUYA akulonga kuti, “Duwalirani pinthu pyakale; lekani kakamira pana pinthu pidachitika kale ene.

¹⁹Yang'anani, ine ndikuchita chinthu chachinchino! Ipyo pyatoma kale kuchitika; ayi imwe nkhabe kwanisa kupiona. Ndinasasanya njira m'thando yatchetcha, pontho mikulo ya madzi m'mbuto yakusowa pyakumera.

²⁰Podi na nyama zam'tsanga zene zimbandilemedza, mibinzi na mphuwani zene, thangwi ndapereka madzi m'thando yatchetcha, pontho mikhwawa m'mbuto zakusowa pyakumera, kupasa anthu anga pyakumwa, anthu anga akusankhulika,

²¹anthu adapisasanyira ine ndekha ene, towera iwo alalike pya ukulu wanga.”

²²MBUYA akulonga kuti, “Kwache iwe Yakobo hudandichemere tayu, iwe Israele udatopa nane.

²³Iwe hudandidzesere tayu mabira kuti akhale nsembe zakupyerera; penu kundilemedze na nsembe zanu tayu. Ine sidakunensani tayu kuti mundipase pyakupereka, penu kukutopesani na kukupemphani pyakufukiza pyakununkhira tayu.

²⁴Imwe hamudandigulira pyakufukiza pyakununkhira tayu, penu kundichitisa kukhuta na mafuta a nyama zanu. M'mbuto mwache mudandinensa ndimwe na pyakudawa pyanu; imwe mudanditopesa na umambalanu.

²⁵“Ine ene MBUYA ndimbafudza pyakudawa pyanu, tenepo ine ndimbachita penepi thangwi ine ndine pano. Ine nkhabe dzakoya mangawa a pyakudawa pyanu tayu.

²⁶Yang'anani m'ndulimu pidachita ine; tendeni tiketesane. Longani pya mseru wanu kuonesa kulungama kwachita imwe.

²⁷Kholo wanu wakutoma ule adadawa; akadamu anu adandidawira.

²⁸Akulu-akulu anu adaswipisa nyumbanga yakupemphereramo; natenepo ndidatawirisa Yakobo kuvungwa monsene mwene, pontho Israele kuchitiswa manyadzo.”