Read cisena YESAYA 44 Bible Online

YESAYA 44 - cisena bible

YESAYA 44

¹MBUYA akulonga kuti, “Chinchino vesera Yakobo, nyabasanga, Israele, adasankhula ine ule.

²Ine ndine MBUYA, ule adakusasanya, ule adakuumba m'mimba mwa mako, ule anafuna dzakuphedza: Leka chita mantha iwe Yakobo, nyabasanga, nyapamtima panga, adasankhula ine ule.

³Thangwi ndinatchanyula madzi pana dziko yanyota, pontho kukuka mikulo mbuto zakuuma; ndinatsanyulira mzimu wanga pana ananu, pontho mtsanzayiso wanga pana pidzukulu pyanu.

⁴Iwo anaphwitha ninga maudzu akuthirirwa mwadidi, ninga mikotamu yakumera m'khundu-khundu mwa mikulo ya madzi akufamba.

⁵Unango anati alonge kuti, ‘Ine ndine wache wa MBUYA.’ Unango anati apithule yekha ene na dzina ya Yakobo; unango basi anati alembe pamkono pache kuti, ‘Wache wa MBUYA,’ pontho anapithula yekha ene na dzina ya Israele.”

⁶MBUYA akulonga tenepa, Mfumu wa Israele pontho Dombo wache, MBUYA Wamphamvu zonsene: “Ndine nyakutoma, pontho ndine nyakumalisa; nkhabeve Mulungu unango tayu, mbwenye ine ene basi.

⁷Mbani unango akhala ninga ine pano? Mulekeni apilonge. Ngamulekeni apilalike mbatchulule pamaso panga, pyonsene pile pidachitika kubulukira pidalenga ine anthu a mvula zakale pontho pile pinafuna dzachitika m'tsogolo muno. Ande, mbapilongeletu pya m'tsogolo muno.

⁸Lekani tetemera, lekani chita mantha! Ayi ine sidalonge penepi mbandipilongeratu kale ene tayu? Imwe ndimwe mboni zanga. Ayi pana Mulungu unango kupambula ine pano? Tayu, nkhabe Phanzwi inango; nkhabe na ibodzi ene inadziwa ine tayu.”

⁹Onsene anyakusasanya mifanikizo ngakusowa basa, pontho milungu imbakoya iwo ninga mfuma mphyapezi-pezi. Ale ambapipembedza ndi maboli-boli, pontho kukhonda kwawo dziwa pinthu kumbaadzesera manyadzo.

¹⁰Mbani ambatanda kamulungu mbasasanya mifanikizo, ule nkhabe kumganyalisa tayu?

¹¹Onsene ale ambapipembedza anati achitiswe manyadzo; amisiri mbanthu ene pyawo. Alekeni adze imisane nane; iwo anati agoswerwe mbaona nyatwa zikulu.

¹²Nyakufula ntove ambakwata simbi mbaitukumiza pamoto wa makala; iye ambaphatisa basa nyundo kumenya nawo simbiyo kuisandusa mliungu. Iye ambachibonyola bonyola na mphamvu zache. Iye ambava njala mbataya mphamvu zache; iye nkhabe kumwa madzi tenepo ambakomoka.

¹³Nyampala matabwa ambapima thabwa. Iye ambailemba-lemba na ntchiji, mbaigoba na piphano pyache. Iye ambasasanya dzimunthu, chinthu chakuonesa demelero ya munthu, towera chiikhwe m'nyumba yakupembedzeramo.

¹⁴Iye ambatema miti yamkungudza penu kusankhula mthundu penu njale. Iye ambauleka kukula pakati pa miti ya mumsitu, penu kubzala miti ya paina mvula mbaikulisa.

¹⁵Icho chakhala ninga nkhuni yakugasira moto, khundu inango ambachiyesa nkhuni zakuotha, khundu inango kuphikira mkate. Padzulu pache iye ambasasanya milungu mbaipembedza; iye ambasasanya mfanikizo mbaugodamira.

¹⁶Na phindi inango ya thabwa iye ambaipisa pamoto; padzulu pachepo mbaphikapo pyakudya, kuotcha nyama, mbaidya mpakana mimbache nganganga, pontho iye ambaotha moto mbalonga mbati, “Onatu! Ndakhumbirwa; ndikuona moto!”

¹⁷Na matabwa akusalirawo, iye ambasasanya mfanikizo kukhala milungu yache mbailambira. Iye ambapemphera kuna iyo mbati, “Ndipulumuseni; milungu yanga ndimwepo.”

¹⁸Iwo nkhabe dziwa pinthu tayu, na chinthu chene chimbavesa iwo nkhabe; maso awo amala myedereka, towera aleke kwanisa kuona, pontho manyerezero awo afungika, towera aleke kwanisa kuvesa.

¹⁹Nkhabe na mbodzi ene ambatomambo kunyerezera, na mbodzi ene ana nzeru nkhabepo, penu wakuvesa pinthu mwakuti alonge kuti, “Matabwa anango ndidayesa nkhuni; mbandiphika mikate na moto onthowo, ndidaotchapo nyama mbandidya. Ayi ndisasanye chinthu chakunyansa na matabwa akusalira? Ayi ine ndilambire thabwa yapezi-pezi?”

²⁰Iye ambadya dotha, kupupwa kwacheko kwamuendesa m'tsanga; iye nkhabe kwanisa kupipulumusa yekha ene tayu, penu kulonga kuti, “Ayi chinthu chinaphata ine m'dzanjanga yamadyo si chapezi-pezi chenechi tayu?”

²¹MBUYA akulonga kuti, “Yakobo, kumbuka penepi; thangwi iwe Israele ndiwe nyabasanga. Ndakulenga, iwe nyabasanga Israele; tenepo ine nkhabe dzakuduwalira tayu.

²²Umambalako onsene ndamala kuubulusa ninga makole, pontho pyakudawa pyako ninga nkhungu ya kumachibese. Bwerera kuna ine, thangwi ndakuombola ndine.”

²³Iwe kudzulu, imba thangwi ya kukomerwa, thangwi MBUYA ndiye achita penepi; khuwa, iwe dziko yapansi. Imbani nyimbo, imwe mapiri, imwe misitu na miti yonsene, thangwi MBUYA aombola Yakobo, iye aonesa demelero yache kudzera muna Israele.

²⁴MBUYA akulonga tenepa, nyakukuombola ule, adakusasanya m'mimba mwa mako ule: “Ine ndine MBUYA, ule adasasanya pinthu pyonsene. Ndine ene basi adafuthula thambo; ule ndekha ene ndidatanda dziko yapansi,

²⁵Ndimbadzudzumisa pidzindikiro pya anyakuombedza, ndimbapupwisa nzeru za anyakukhumira, udziwisi wa anyanzeru ine nkhabe kuuyesa ninga pinthu tayu, mbandionesa kuti nzeru zawo nsakupupwa.

²⁶Ndimbatsikimizira mafala auprofeti a anyabasanga mbandichitisa kukwana-kwana ndoto za anyamphangwanga. “Ndimbalonga pya Yerusalemu kuti, ‘unakhala pontho na anthu,’ pontho pya maluwani a Yuda kuti, ‘Anamangwa pontho,’ pontho na pya madembe ache kuti, ‘ndinamangamo pontho.’

²⁷Ndimbalonga kuna madzi akuzwika kuti, ‘Umani, pontho ndinaumisa mikhwawa yako.’

²⁸Ndimbalonga kuna Kirusi kuti, ‘Iwe unakhala makabuswanga, mbuchita pyonsene pyakundikomera; iwe unalonga pya Yerusalemu kuti: Mzindawo mbumangwe pontho, pontho pya Nyumba ya Mulungu kuti: Maziko ache mbamangwe!’ ”