Read cisena YESAYA 45 Bible Online

YESAYA 45 - cisena bible

YESAYA 45

¹Alonga penepi ndi MBUYA kuna Kirusi nyakusankhulikache, ule amphata na mkono wache wa madyo, kuti akunde madzinza pamaso pache; kudulisa mafumu pida pyawo pyankhondo, kufungula misuwo ya mzinda patsogolo pache, towera misuwo ileke dzafungwa:

²“Ine ndinaenda patsogolo pako mbandisalaza mapiri; ndinaswa misuwo yankuwa mbandigwanda-gwanda mphinga zasimbi.

³Ndinakupasa mfuma zakubulukira kumdima, mfuma yakukoyiwa m'mbuto zakubisika, towera upidziwe kuti ine ndine MBUYA pontho Mulungu wa Israele, akuchemera na dzinako ule.

⁴Na thangwi ya Yakobo nyabasanga pontho Israele asankhula ine ule, ine ndinakuchemera na dzinako mbandikupasa chidzo cha chilemedzo, podi kwene kuti iwe nkhabe kundidziwa tayu.

⁵Ine ndine MBUYA, pontho nkhabeve unango tayu; padzulu pa ine Mulungu nkhabeve unango tayu. Ndinakupasa mphamvu podi kwene kuti iwe nkhabe kundidziwa tayu,

⁶towera kutomera kumabulukiro dzuwa mpakana kumadokero dzuwa anthu adziwe kuti nkhabe pontho unango padzulu pa ine. Ine ndine MBUYA, pontho nkhabeve unango tayu.

⁷Ine ndidasasanya cheza mbandilenga mdima, ndimbachitisa pinthu kufamba mwadidi mbandigwisa nyatwa. Ine MBUYA ndimbachita pinthu pyonsenepi.

⁸“Iwe kudzulu vumbisa chilungamo; makole mbachiwazire padziko yapansi. Dziko yapansi mbiyashamule kuchitambira, towera chipulumuso chitumbuke, pontho chimere pabodzi pene na chilungamo. Ndalenga penepi ndine pano MBUYA.”

⁹“Dzedze kuna ule ambathimbana na Nyakumsasanya, kuna ule ndi chikalango chene pyache, pakati pa pikalango pyonsene pyakusasanywa na dongo. Ayi dongo inakwanisa kulonga kuna nyakuiphatisa basa kuti, ‘Chinasasanya iwechi ninji?’ Ayi chakusasanywacho chinakwanisa kulonga kuti, ‘Nyakundisasanyawe nkhabe luso tayu’?

¹⁰Dzedze kuna munthu ule ambalonga kuna babache kuti, ‘Mudandibaliranji ninga tenepa?’ Penu kuna mache kuti, ‘Chabala imwe ninji?’ ”

¹¹Ipi ndiye pinalonga MBUYA, Nyakuchena wa Israele pontho Nyakumsasanyache: “Kulonga pya pinthu pinafuna kudza, ayi imwe mumbandivunza pya ananga, penu kundipasa matongero pya mabasa a manjanga?

¹²Ndine pano adasasanya dziko yapansi mbandilenga munthu kuti akhale mwenemo. Manjangawa adafuthula kudzulu; ndina utongi pana dzuwa, mwezi na nyenyezi.

¹³Na kulungama kwanga, ine ndinalamusa Kirusi: ndinandendemeza njira zache zonsene. Iye anamanga pontho mzinda wa Yerusalemu mbasudzula pauperezo anthu anga adamangwa ale, kwache iye hanapichita kuti atambire kobiri penu mfupo tayu. Ndalonga ndine MBUYA Wamphamvu zonsene.”

¹⁴MBUYA akulonga kuna Israele kuti, “Pinthu pyakusasanywa mu Iguputo pontho malonda onsene a ku Kushi, pontho amuna akulapha a ku Saba, anabwera kuna iwe mbakhala anthu ako; iwo anakutewera mdungulu tapa-tapa uku amala mangwa na njema. Iwo anakugodamira mbalonga kuti, ‘Ndimomwene kuti Mulungu ali namwe, nkhabe unango tayu ninga iye.’ ”

¹⁵Ndimomwene imwe ndimwe Mulungu ambapibisa yekha ene ule, Mulungu pontho Nyankhombo wa Israele.

¹⁶Anyakusasanya mifanikizo onsene anachitiswa manyadzo mbalulupiswa; onsene anaenda uku amala tota na manyadzo.

¹⁷Mbwenye Israele anapulumuswa na MBUYA, pontho kuapulumusa kwache nkhwakukhala na kukhala; iwo nkhabeve dzachitiswa manyadzo penu dzalulupiswa na pang'ono pene tayu.

¹⁸Thangwi MBUYA akulonga tenepa, iye ule adalenga kudzulu, iye ene ndi Mulungu; iye ule adaumba mbalenga dziko yapansi, iye ndiye adaisasanya; iye hadaisasanye kuti ikhale kwene yakusowa pinthu tayu, mbwenye kuti anthu akhalemo, weneyu ngule akulonga kuti, “Ine ndine MBUYA, pontho nkhabe unango tayu.

¹⁹Ine sidapilonge chibiso-biso tayu, kubulukira kunango pontho m'dziko ya mdima. Ine sidalonge tayu kuna pidzukulu pya Yakobo kuti, ‘Ndisake-sakeni pyanu pezi pene.’ Ine MBUYA ndimbalonga pyakuona; ndimbalonga pinthu pyakulungama.”

²⁰MBUYA akulonga kuti, “Gumanyikanani pabodzi mbamudze; gumanyikanani imwe anyakupulumuka m'manja mwa madzinza anango, Ngakupupwa ale ambadza na mifanikizo yamiti, mbapemphera kuna milungu, ile nkhabe kwanisa kuapulumusa tayu.

²¹Idzani mulonge pya mseru wanu; alekeni apangane pya nzeru. Mbani adalongeratu penepi kale ene, mbani adapilalika kutomera pakutomaletu? Ayi hakhali ine MBUYA tayu? Tenepo nkhabe Mulungu unango padzulu pa ine, Mulungu wakulungama pontho Nyankhombo; nkhabe unango tayu, mbwenye ine ene basi.

²²“Zungunukirani kuna ine mbamupulumuke, imwe anthu onsene a padziko yapansi; thangwi ndine Mulungu pontho nkhabe unango tayu.

²³Na dzinanga ine ndadumbira, na mulomo wanga ine ndalonga na mtima onsene wakuona, mafala ale nkhabe dzasanduzika tayu. Pamaso panga bondo yonsene inagodama, na dzinanga lulume yonsene inadumbira.

²⁴Pya ine iwo analonga kuti, ‘Muna MBUYA yekha ene basi muna chilungamo na mphamvu.’ ” Onsene adamzhangalira ale anabwera kuna iye, kwache anachitiswa manyadzo.

²⁵Mbwenye muna MBUYA pidzukulu pyonsene pya Yakobo pinayeswa pyakulungama, pontho pinakuzwa.