Read cisena YESAYA 46 Bible Online

YESAYA 46 - cisena bible

YESAYA 46

¹“Beli akukotama, Nebo akufamba kowa-kowa; mifanikizo yawo yathukulwa kumsana kwa mabulu. Mifanikizo yawo imbachita kuthukulwa ile njakulemera, njakulemera pyakwanga kuna mabulu akutopa.

²Iwo ambafamba kowa-kowa mbakotama onsene pabodzi; iwo nkhabe kwanisa kupulumusa mitoloyi, kwache iwo ene ambaphatwa unyaperezo.

³“Ngandiveserani imwe pidzukulu pya Yakobo, imwe anyakusalira na moyo m'dzinza ya Israele, anthu adaphedza ine ale kubulukira pa ndzidzi udakwatirwa imwe mimba, pontho alera ine kubulukira ndzidzi udabalwa imwe.

⁴Podi na paunkhalambanu ene pontho mwenemo mwamera imvi, ine ndine anafuna dzakupasani moyo ule. Ine ndidakusasanyani, tenepo ndinakutsalakanani; ine ndinakuthukulani mbandikupulumusani.

⁵“Mbani anafuna imwe kundisangiza naye, penu kundiikha sasawa na iye? Mbani unango anakwanisa kulandana na ine, towera ndisangizwe naye?

⁶Anthu ambafungula mabudu awo mbabulusamo golidi; iwo ambapima siliva na mdida mbalemba ganyo anyakufula simbi kusasanya mfanikizo, tenepo iwo adaulambira!

⁷Iwo adauthukula paphewa; iwo adautchimika pambuto pache mbachiimira penepo. Kubulukira penepo mfanikizowo nkhabe kwanisa kufamba tayu. Podi kwene kuti munthu alire pyache tani kuna mfanikizowo, iwo nkhabe tawira, pontho nkhabe kwanisa kupulumusa munthu na mbodzi ene panyatwa tayu.

⁸“Kumbukani ipi mbamupiikhe m'manyerezero mwanu, piikheni mumtima mwanu imwe anyakupandukira.

⁹Kumbukani pinthu pidachitika kale ene pile; ine ndine Mulungu, nkhabe unango tayu; ine ndine Mulungu, nkhabe unango ninga ine tayu.

¹⁰Kubulukira pakutomaletu ndidadziwisa mamalisiro a pinthu, kale ene ndidalongeratu pikhafuna dzachitika. Ndidalonga kuti manyerezero anga nkhabe dzachimwanika tayu, pontho kuti ndinati ndichite chonsene chikhafuna ine kuchichita chile.

¹¹Ndikuchemera mphamba kubulukira kumabulukiro dzuwa;[44] kubulukira kumadziko antomi ndikuchemera munthu, ule anafuna dzachitisa kufuna kwanga kukwana-kwana. Iye anachita pyonsene pidanyerezera ine. Pinthu pyalonga ine, ndinati ndipichitedi, pinthu pidasasanya ine, ndinati ndipichitedi.

¹²“Ngandivesereni, imwe anthu akuuma mtima, ale muli kutali na chipulumuso.

¹³Nsiku ya chipulumuso ndikuifedza chifupi, iyo nee ili kutali tayu; chipulumuso changa nkhabe dzadembuka tayu. Ndinapulumusa zioni mbandipereka demelero kuna Israele.”