Read cisena YESAYA 47 Bible Online

YESAYA 47 - cisena bible

YESAYA 47

¹MBUYA akulonga kuti, “Tchitha, pontho khala pansi pa fumbi, iwe mwali, Babiloni; khala pafumbi pakusowa mpando wachifumu, iwe mwali, Babiloni. Iwe nkhabeve dzachemerwa mtete-mtete ene pontho wakubalika.

²Kwata libwe mbupeye ufa; kunundula chakumpsampsira nacho nkhope yako. Kwinja nguwo zako mpakana m'ntchafu mbuwambuke mkulo![45]

³Iwe unakhala chitakwa-takwa mbuchitiswa manyadzo. Ine ndinati ndibwezere mbandikhonda dzasiya na moyo munthu na mbodzi ene.”

⁴Dombo wathu, MBUYA Wamphamvu zonsene ndiye dzinache; ndi Nyakuchena wa Israele.

⁵MBUYA akulonga kuti, “Khala chete m'mbuto yamdima, iwe mwali, Babiloni; iwe nkhabe dzachemerwave matsano wa maufumu tayu.

⁶Ine ndidazhangalira anthu anga, ine ndidaayesa ninga si anthu anga tayu; ine ndaaikha pansi pa utongi wako, iwembo hudaavere nsisi tayu, podi na nkhalamba zene iwe udazikalira mtima.

⁷Iwe udalonga kuti, ‘Ine ndinathimiza kukhalapo basi, matsano wakwenda na kwenda!’ Kwache iwe hudaikhe konta pinthu penepi tayu, penu kunyerezera kuti penepi pinamala tani tayu.

⁸“Chinchino vesera, iwe nyatsenzo, uku uli pakupata mbulonga wekha ene kuti, ‘Ine ene basi, nkhabe unango pontho tayu. Ine nkhabe dzakhala mamfelwa tayu, penu kuva kupha thangwi ya kutayikirwa na ana tayu.’

⁹Pyonsene piwiripi pinachitika ndzidzi pang'ono, nsiku ibodzi: kukhala mamfelwa pontho kuva kupha thangwi ya kutayikirwa na ana. Ipyo pinabwera pana iwe na shungu yonsene, podi kwene kuti iwe umbachita matsenga onsene, pontho pyaufiti pyakugoswa.

¹⁰Iwe udanyindira kuchita pyakuipa mbulonga kuti, ‘Nkhabe munthu akundiona tayu.’ Nzeru na udziwisi wako, pidakuendesa m'tsanga, pontho udalonga wekha ene kuti, ‘Ndine ene basi, nkhabe unango pontho ninga ine tayu.’

¹¹Nyatwa zinati zidze pana iwe, tenepo iwe nkhabe dzakwanisa kuzimalisa na matsengako tayu. Kuvungika kunagwa pana iwe kwakuti iwe nkhabe kwanisa kukukhondesa; nyatwa zidakhonda iwe na kuzilota kwene, zinati zikufikire mwakututumusa.

¹²“Apo, thimiza kuchita pyaufiti na matsengako onsenewo, aphatisa iwe basa kutomera uwanako ale. Mwinango pinakwanisa pang'ono kukuphedza; mwinango unakwanisa kuthuswa napyo anyamalwako.

¹³Uphungu onsene watambira iwe ule, lero wamala kukutopesa kwene basi! Anyakudziwisa pya nyenyezi[46] mbadzetu akupulumuse, ale ambatchulula pinthu[47] pinafuna dzakugwera pile mwezi na mwezi pakuyang'ana nyenyezi.

¹⁴“Ndimomwene iwo akhala ninga mapesi; moto unati uapise. Iwo nkhabe kwanisa kupipulumusa okha ene tayu kuna shungu ya moto. Pano nkhabe makala amoto anakwanisa kuchitisa munthu kukhumbirwa tayu; pano nkhabe moto wakuti munthu anakwanisa kuotha tayu.

¹⁵Penepyo ndiye pinakwanisa iwo kukuphedza napyo, anthu ale akhala na iwe kaliki-liki kutomera uwanako onsene. Ndzidzi onsene kwawo nkhuphophonyeka basi; nkhabe na mbodzi ene anakwanisa dzakupulumusa tayu.”