Read cisena YESAYA 48 Bible Online

YESAYA 48 - cisena bible

YESAYA 48

¹Ngaveserani ipi imwe pidzukulu pya Yakobo, imwe ale mumbachemerwa na dzina ya Israele, imwe ale kholo yanu ndi Yuda, imwe ale mumbadumbira na dzina ya MBUYA mbamupemphera kuna Mulungu wa Israele, kwache nee mwakuonadi pontho mwakulungama tayu,

²ale imwe mumbapithula mwekha ene kuti ndimwe mzika za mu Mzinda wakuchena mbamunyindira Mulungu wa Israele, ule dzinache ndi MBUYA Wamphamvu zonsene.

³MBUYA akulonga kuna Israele kuti, “Kale ene ndidalongeratu pinthu pidachitika kale pile, mulomo wanga udapilalika mbandipichitisa kudziwika, tenepo vumbu-vumbu ndidapichitisa kuchitika.

⁴Thangwi ndidadziwa kuuma mtima kwachita iwe, uzingo wa khosi yako ukhali ninga simbi, chipumu chako chikhali ninga nkuwa.

⁵Natenepo ndidakupanga pinthu penepi kale ene; kupilongeratu ipyo mbipidzati chitika, towera ukhonde longa kuti, ‘Milungu yanga ndiye idachita penepi; mfanikizo yanga ndiye adachitisa kuti pichitike.’

⁶Pyonsene iwe udapiva; piyang'anenitu mphapo pyonsenepi, Ayi iwe nkhabe kupitawira tayu basi? “Kutomera chinchino kwenda m'tsogolo ndinati ndikupange pinthu pyachinchino, pinthu pyakubisika pinakhonda iwe dziwa.

⁷Chinchino ene pano pyamala lengwa, nee si kale ene tayu; iwe chipo nee hudzati kupiva tayu. Tenepo iwe nkhabe kwanisa tayu kulonga kuti, ‘Ande, ndikhapidziwa na kale ene.’

⁸Chipo iwe hudapive penu kupivesa tayu; kutomera na kale ene iwe hudafungule makutu ako tayu, ndapidziwa kuti iwe ndiwe wakupandukira; iwe umbachemerwa mphandu kutomera uwanako.

⁹Na thangwi ya kufuna dzinanga kuti ilemedzwe, ine ndatoma thethesa ukali wanga; na thangwi ya kufuna kuonesa demelero yanga, ine ndauphata mtimanga, towera ndileke kukuvunga.

¹⁰Yang'ana, ndakubulusa masepu-sepu ninga mumbachitirwa siliva pamoto; ine ndakuyesa m'dzenje ya nyatwa.

¹¹Na thangwi ya dzinanga, na thangwi ya demelero yanga, ine ndachita penepi. Thangwi yache ninji kuti ndilulupiswe? Ine nkhabe dzagawana demelero yanga na unango tayu.”

¹²MBUYA akulonga kuti, “Veserani kuno iwe Yakobo, iwe Israele, achemera ine ule: Ine ndine Mulungu, nyakutoma pontho nyakumalisa.

¹³Manjanga adaikha maziko padziko yapansi, pontho mkono wanga wamadyo udafuthula thambo; ine ndingapichemera, ipyo pimbagumanyikana pabodzi.

¹⁴“Gumanyikanani imwe monsenene mbamundivesere: Ngupi mfanikizo wache udalongeratu pinthu penepi? Munthu adasankhula ine, MBUYA ule, anachitisa penepi kukwana-kwana pana dziko ya Babiloni; iye anachita pyonsene pinafuna ine pana Babiloni pile.

¹⁵Ndine ene pano ndalonga; ande, ndamchemera ndine pano; ndinamdzesa, tenepo iye anapikwanisa pabasache.

¹⁶“Fendedzani chifupi na ine mbamuvesere pinalonga inepi: Kubulukira ndzidzi udalonga ine pakutoma ule, ine sidapilonge chibiso-biso tayu; pandzidzi umbachitika ipyo, ine ene ndimbakhala ponthopo.” Chinchino MBUYA Mulungu andipasa Mzimu wache mbandituma.

¹⁷MBUYA Nyankhombo wanu, Mulungu wakuchena wa Israele akulonga kuti, “Ine ndine MBUYA Mulungu wanu, ule ambakufunzisani pinthu pyakukuganyalisani, pontho ule ambakutsogolerani kunjira yathema imwe kwenda nayo ile.

¹⁸Imwe mbamudavera kwene matongero anga! Penepo mtendere wanu mbudakuka ninga mkulo. Kulungama kwanu mbakudakhala ninga mabimbi a bara.

¹⁹Pidzukulu pyanu mbapidainjipa pyakwanga ninga tchetcha, ananu mbadakhala okhonda lengeseka ninga mapira, madzinawo nee mbadamala penu kuvungwa na pang'ono pene pamaso panga tayu.”

²⁰Bulukani kuno ku Babiloni, thawani Ababiloniwa! Vekesani mbiriyi mwakukomerwa; pilalikeni: Pitumizeni mpakana kumadolomero onsene a dziko ya pansi, longani kuti, “MBUYA apulumusa nyabasache Yakobo!”

²¹Pidatsogolera MBUYA anthu ache m'thando yatchetcha, iwo hadave nyota tayu; iye adachitisa madzi kukuka pamwala kuti iwo amwe; iye adapandula mwala, madzi mbakuka kubulukira mwenemo.

²²Mbwenye MBUYA akulonga kuti, “Kuna anyakudawa nkhabe mtendere tayu.”