Read cisena YESAYA 49 Bible Online

YESAYA 49 - cisena bible

YESAYA 49

¹Veserani kuno, madziko akutali, imwe anthu madzinza akutali! Ine mbindidzati balwa MBUYA adandisankhula kale, mbindili m'mimba mwa mama iye adandithuliratu dzina.

²Iye adachitisa mulomo wanga kukhala wakutwa ninga talasada. Mumthunzi wa manjache iye adandibisa. Iye andichitisa kukhala ninga tswimo yakutwa, mbandibisa m'chakuikhiramo matswimo chache.

³Iye adalonga kuna ine mbati, “Israele, iwe ndiwe nyabasanga; ule kudzera muna iwe ndinaonesa demelero yanga.”

⁴Kwache ine ndidalonga kuti, “Ine ndabulusa kaluma pezi pene; mphamvu zanga ndazimalira papezi pontho okhonda ganyali.” Kwache chidikhiro changa chili m'manja mwa MBUYA, pontho mfupo wanga una Mulungu wanga.

⁵Natenepo MBUYA akulonga, ule adandisasanya m'mimba mwa mama kuti ndikhale nyabasache kubwezera Yakobo kuna iye pontho kugumanyisa Aisraele kudza kuna iye, thangwi ndine nyakulemedzwa pamaso pa MBUYA, pontho Mulungu ndiye mphamvu zanga.

⁶MBUYA akulonga kuti, “Ntchinthu ching'ono pyakwanga kuna iwe kukhala nyabasanga kubwezera pontho madzinza a Yakobo, pontho kubwezera anango a Aisraele adakoya ine ale. Ndinakuchitisa pontho kukhala cheza kuna anthu a madzinza anango, towera ufikise chipulumuso changa kumadolomero a dziko yonsene yapansi.”

⁷MBUYA akulonga tenepa, Dombo pontho Nyakuchena wa Israele, kuna ule akhondwa pikulu pene, kuna ule adakhondwa mbalulupiswa na madzinza anango, kuna nyabasa wa atongi kuti: “Mfumu anakuona mbaimira, ana mafumu anakuona mbakulambira, thangwi ya MBUYA, ule ngwakukhulupirika, Nyakuchena wa Israele ule asankhula iwepo.”

⁸MBUYA akulonga tenepa: “Ndzidzi ungafika unafuna ine dzaonesa kukoma kwanga mtima, ndinakutawira, pontho nsiku inafuna dzaonesa ine chipulumuso changa, ndinakuphedza. Ndinakukoya mbandichita chiverano na anthu kudzera muna iwepo kusasanya pontho dziko na madembe ene,

⁹kulonga kuna anyaperezo kuti, ‘Sudzukani pa nyatwa!’ Pontho kuna anyakukhala mumdima kuti, ‘Bulukani mumdimamo!’ Iwo anagwedula-gwedula m'khundu-khundu mwa njira mbagumana mpovu m'mapiri akupupwa.

¹⁰Iwo nkhabe dzava njala penu nyota, nee mkatu-katu wa m'thando yatchetcha, penu mbebe wa dzuwa kuanensa tayu. Nyakuva nawo nyambalo ule anaaphata pamkono mbaatsogolera kwenda kumphuno za madzi.

¹¹Mapiri anga onsene ndinaasanduza njira, pontho misewu yanga inasasanywa mwadidi mwene.

¹²Yang'anani, anthu anga anabulukira kutali pyakwanga, anango kumpoto, anangombo kumadokero dzuwa, anango kunthemba za Asiwani.”[48]

¹³Iwe kudzulu, khuwa thangwi ya kukomerwa; sekera, iwe dziko yapansi! Imwembo mapiri gundikani nazo nyimbo! Thangwi MBUYA ambathondoza anthu ache pontho anava nyambalo na anyakusanyiswache.

¹⁴Mbwenye zioni adalonga mbati, “MBUYA andipasa nkhodolo, MBUYA andiduwalira.”

¹⁵“Ayi mama angaduwalire mwanache ule ali pabele pache, mbakhonda kuva nyambalo na mwana adavera iye kupha? Podi kwene pichitike kuti aduwalire mwanache, ine nkhabe dzakuduwalira tayu.

¹⁶Yang'ana, ine ndalemba dzinako m'manja mwanga; mafufu ako, Yerusalemu, ndzidzi onsene ali pamaso panga.

¹⁷Amisiri ako ale anafuna dzakumanga pontho anati adze chinchino pano; anthu adakusakaza ale anati athawe.

¹⁸Kwiza pontho mwaza maso ako; anthu ako onsene akugumanyikana kuti abwerere kwawo. Ine ninga Mulungu wamoyo, ndikudumbira kuti anthu ako anakuchitisa kuoneka wakubalika ninga pyakuthemesera pyakuvalwa na nyakukazhali.

¹⁹“Podi kwene kuti udasakazwa mbusanduka madembe mwakuti dziko yako idavungwa monsene mwene, mbwenye chinchino iyo inakhala ing'ono pyakwanga kuna anthu ako, pontho adakuvunga ale anathawira kutali pyakwanga.

²⁰Anthu ako adabalwa m'dziko ya unyaperezo ale anati alonge iwe ukuva makutu kuti, ‘Dzikoyi yatichepera pyakwanga; ngatipaseni mbuto ikulu ene kuti tikhalemo.’

²¹Penepo unalonga wekha ene kuti, ‘Mbani adandibalira ana onsenewa? Ine ndidataya ananga mbandikhonda kwanisa kukhala na anango. Anthu anga adatamiswa kudziko ya unyaperezo mbapaswa nkhodolo. Mbani adalera mbakuza anawa? Ine ndikhali nyakambombo; apo anambowa adabulukira kupi?’ ”

²²MBUYA Mulungu akulonga kuti, “Yang'anani, ndinakhupha anthu a madzinza anango, ndinaonesa chidziwiso kuna iwo; iwo anabwera na anako achimuna m'manja mwawo, pontho kuthukula anako achikazi paphewa pawo.

²³Mafumu kuna iwe anakhala ninga ababa adakulerani ale, amatsano anakhala ninga abzade. Iwo analamba pamaso pako; iwo ananyanguta fumbi kumanyalo kwako. Penepo unapidziwa kuti ine ndine MBUYA; onsene anyakuikha chidikhiro chawo pana ine nkhabe dzataya mtima tayu.”

²⁴“Ayi mungakwanise kupokosera pinthu m'manja mwa anyankhondo, penu kupulumusa anyaperezo m'manja mwa nyamphamvu zache?”

²⁵Kwache MBUYA akulonga kuti, “Ande, anyaperezo anakwanisa kupokoserwa m'manja mwa anyankhondo, pontho pinthu pinakwanisa kupokoserwa m'manja mwa anyamphamvu zache. Ndinati ndithimbane na anyakuthimbana na iwe ale, pontho anako ndinati ndiapulumuse.

²⁶Anyakukuponderezani ndinaachitisa kupidya okha ene; iwo anamwa chiropa chawo ninga mumbamwera iwo vinyu. Penepo anthu onsene anapidziwa kuti ine MBUYA, ndine Nyankhombo wanu, Dombo wanu, pontho Nyamphamvu wa Yakobo.”