Read cisena YESAYA 5 Bible Online

YESAYA 5 - cisena bible

YESAYA 5

¹Ndinati ndimuimbire nyapamtimanga nyimbo ya munda wamfesa: nyapamtimanga akhali na munda wamfesa m'mataka akubalisa pinthu m'tchinde mwa phiri.

²Iye adautipula mbabulusa miyala yonsene tenepo adabzalamo mfesa zadidi maka zile. Iye adamangamo nsanja mbasasanyamo dzenje yakutchitchithira vinyu. Iye akhadikhira kutchola nsapo zadidi pyakwanga, kwache mundawo udabulusa nsapo zakuwawa.

³“Tenepo, imwe anyakukhala mu Yerusalemu na amuna a ku Yuda pitongeni mwekha ene pakati pa ine na mundanga wamfesa.

⁴Ninji pontho chidathema ine kuchichita kuna mundanga wamfesa kupiringana pyauchitira ine kalepi? Ine ndikhadikhira kutchola nsapo zadidi, apo thangwi yache ninji mundawo udabulusa nsapo zakuwawa?

⁵Chinchino ndinati ndikupangeni chinafuna ine kuchita kuna mundanga wamfesa: ndinati ndibuluse gandafutache, tenepo unavungwa; ndinagomola mpandache, tenepo unamala pondedzwa.

⁶Ndinauchitisa kukhala thema nee kuusadzira penu kuulima pontho tayu; m'mbuto mwache ntcheswa na nyakhanche pinameramo pyawo. Ndinatonga makole kuti aleke vumbisamo mvula.”

⁷Munda wamfesa wa MBUYA Wamphamvu zonsene ndi dzinza ya Israele, pontho anthu a ku Yuda ndi mfesa zache zakukoma zile. Iye akhadikhira kuona chilungamo, m'mbuto mwache adaona kuchuchisa chiropa; iye akhadikhira kuona pyakulungama, m'mbuto mwache adava kulira kwa anyakuponderezwa.

⁸Dzedze kuna imwe ale mumbakhalira kuphataniza nyumba na nyumba pontho kuphataniza munda na munda mwaukundi, towera pambuto yonseneyo mukhalepo mwekha.

⁹Ine ndava MBUYA Wamphamvu zonsene akudumbira kuti: “Ndimomwene kuti nyumba zikulu-zikulu zinasanduka madembe, nyumba zadidiletu nkhabe dzakhalamo anthu tayu.

¹⁰Munda wamfesa wakulapha mathanyo chikwi, umimbache mbukhala mathanyo dzana unabulusa kwene chigubu chibodzi basi cha vinyu, pitundu khumi pya mbewu, pinabulusa kwene chitundu chibodzi chene basi.”

¹¹Dzedze kuna anyakulamuka bzobzo na machibese, kulamukira pyakumwa pyakuledzeresa, ale ambamwa mpakana chiti-chiti mbaledzera thophi-thophi na vinyu.

¹²Iwo ambaimba anyakatangale na malimba m'maphwando mwawo, pisekese na pitoliro mbamwa vinyu. Kwache iwo nkhabe ikha konta mabasa a MBUYA tayu, iwo nkhabe tsalakana tayu pinthu pidasasanya iye na manjache.

¹³Natenepo anthu anga anaenda kudziko ya unyaperezo, thangwi ya kukhonda kwawo vesa pinthu; amuna a chidzo chawo anafa na njala, pontho anthu ene pyawo anafa na nyota.

¹⁴Ndi thangwi yache dziko ya anyakufa nkhabe khuta tayu, pontho kukanwa kwache kuli yashaa; kweneko ndiye kunabidira anyakufunika mu Yerusalemu pontho na anthu ene pyawo akuinjipa mwenemo ali poko-poko kunyadira mzindawo.

¹⁵Tenepo anthu onsene anatchithiswa pansi mbalulupiswa, anyakugaya anachitiswa manyadzo.

¹⁶Kwache MBUYA Wamphamvu zonsene anati akuzwe na chilungamo chache, pontho Mulungu wakuchena anaonesa kuchena kwache na kulungama kwachita iye.

¹⁷Penepo anabira anadya khala ninga akudya mumpovu wawo ene; anambuzi anagwedula-gwedula pakati pa madembe.

¹⁸Dzedze kuna ale ambapikweyera pyakudawa na nkhambala za pyakunama, pontho ale ambachimwana kupisudzula kuna pyakuipa pyawo,

¹⁹dzedze kuna ale ambalonga kuti, “Mulekeni Mulungu achimbize, mbachimbize kuphata basache kuti tiione. Pinthu pinafuna kuchita Nyakuchena wa Israele mbapichitiketu mphapo kuti tipidziwe.”

²⁰Dzedze kuna ale ambayesa pyakuipa ninga pyadidi, pontho ale ambayesa pyadidi ninga pyakuipa, ale ambaikha mdima m'mbuto mwa cheza, pontho cheza m'mbuto mwa mdima, ale ambadzesa kuwawa m'mbuto mwa kutapira, pontho kutapira m'mbuto mwa kuwawa.

²¹Dzedze kuna ale ambapiyesa ninga anzeru, pontho ale ambapiyesa ninga akungwala.

²²Dzedze kuna anyakugaya na kuledzera vinyu, pontho anyaluso pakuvungaza pyakuledzeresa ale,

²³ale ambamalisa mseru wa nyakudawa thangwi ya kudyekerwa, mbakhondera anthu okhonda dawa chilungamo chawo.

²⁴Natenepo ninga mumbanyangutira malulume a moto maudzu, pontho ninga mumbalirimira maudzu pamoto, sasawambo mitsitsi yawombo inavunda, pontho maluwawo anambuluka ninga fumbi; thangwi iwo akhonda mwambo wa MBUYA Wamphamvu zonsene mbalulupisa mafala a Nyakuchena wa Israele.

²⁵Natenepo ukali wa MBUYA ukugaka pana anthu achewa; mkono wache uli pana iwo kuwakhamwadza. Mapiri akutekenyeka pontho mitembo ili thatcha-thatcha m'misewu ninga matubzi. Podi kwene kuti pikhali tenepo ukali wa Mulungu hudambombowe tayu, mkono wache uli fogo kuatchunyusa basi.

²⁶Iye anakwiza bandera m'dzulu kuchemera madzinza anango akutali, akuimba mkhwiyo kuchemera anthu akumadolomero a dziko ale. Iwo akudzadi mbathamanga pikulu pene.

²⁷Nkhabe na mbodzi ene wa iwo anafuna topa penu kugwegweduka tayu; nkhabe na mbodzi ene wa iwo anafuna wodzira penu kugona tayu; nee bande inafuna lera m'chuno tayu penu nkhwaira kugwandika nthambo tayu.

²⁸Matswimo awo ngakutwa, mautawo onsene ngakukungika; njondo za akavalo awo zili nganganga ninga mwala, magaleta a pingolo pyawo pyakhala ninga chivumbulu.

²⁹Iwo angabangula akhala ninga nkhalamu, iwo ambabangula ninga ana nkhalamu; iwo ambakhumbza angaphata nyama mbaikwekweta kwenda nayo wakusowa winango wakumsomphola.

³⁰Nsiku yeneyo ingafika, iwo anagudumira Israele mbabangula ninga kutitima kwa madzi makulu. Ngakhala unango anayang'ana dziko, anaona mdima na kusanyika kwene basi; podi na cheza chene chinaswipiswa na makole.