Read cisena YESAYA 51 Bible Online

YESAYA 51 - cisena bible

YESAYA 51

¹MBUYA akulonga kuti, “Ngandivesereni kuno, imwe anyakufuna kuchita pyakulungama, pontho ale mumbasaka-saka MBUYA: Yang'anani kuna phanzwi kudasemwa imwe kule, pontho m'tchinde mwa phiri kudakumbwa imwe kule;

²yang'anani kuna Abrahamu, kholo wanu, pontho kuna Sara nyakukubalani. Ndzidzi udamchemera ine, iye akhali wakusowa mwana; ine ndidamtsanzayisa mbandimchitisa kuinjipa.

³MBUYA anati athondoze Zioni mbava nyambalo thangwi ya madembe ache onsene; mathando ache atchetcha iye anaasandusa ninga munda wa Edeni, mbuto yache yakusowa pyakumera ile ninga munda wa MBUYA. Muna iye munakhala kusekera na kukomerwa kokhokha, kupereka takhuta, pontho mkhuwo wakuimba.

⁴“Ngandivesereni anthu anga; ikhani makutu kuno, imwe dzinzanga: Mwambo unabulukira kuna ine; chilungamo changa chinasanduka cheza kuna madzinza.

⁵Chipulumuso changa chikufendedza chifupi mwakuchimbiza, kuombola kwanga anthu anga kuli m'njira; mkono wanga unadzesa chilungamo pana madzinza. Anyamgombe anayang'ana kuna ine mbadikhira chipulumuso changa.

⁶Kwizani maso anu kudzulu, yang'anani dziko yapansi; thambo inamala wayuka ninga utsi, dziko yapansi inasakala ninga chakuvala, pontho anthu ache anafa ninga ntchentche. Mbwenye chipulumuso changa chinakhala na kukhala, kuombola kwanga nkhabe dzachimwanika tayu.

⁷“Ngandivesereni imwe, ale mumbadziwa kuchita pyakulungama, anthu ale mumbakoya mwambo wanga mumtima mwanu: Lekani chita mantha na anthu ambakusumululani ale penu kutaya mtima na kukutikanani kunachita iwoko.

⁸Thangwi uchenje unaadya ninga nguwo; mfunye zinaanyomola ninga thonje. Mbwenye chipulumuso changa chinakhala na kukhala, kuombola kwanga kunakhalapo mpakana mifendu yonsene.”

⁹Lamukani, ngalamukani, MBUYA! Mangani matimbira, ngalamukani ninga mukhali ipyo nsiku zagwanda zile, ninga mukhali ipyo mifendu ya mvula zakale. Ayi si imwe tayu ule mudagwanda nyangume Rahabi[49] m'mapindi-mapindi, ule mudalasa na momba chirombo chile?

¹⁰Ayi si imwe tayu, ule adaumisa Nyanza Yakufira, madzi a m'nyanza yakuzwika pyakwanga, ule adasasanya njira panyanza yakuzwika towera anyakuombolwa ale awambuke napo?

¹¹Anyakuombolwa na MBUYA anabwerera kwawo. Iwo anapita mu Zioni uku nyimbo zili fee; kukomerwa kokhonda mala kunakhala ninga chipewu chachifumu mumsolo mwawo. Iwo anadzazwa na kukomerwa pontho kusekera, pontho kutsukwala na kubulira pinati pibuluke pakati pawo.

¹²MBUYA akulonga kuti, “Ine ene pano, ndine nyakukuthondozani. Ndimwe ani kuti mugope munthu ambafa pyache ule, anthu akubalwa na mkazi, ale akhala ninga maudzu ene pyawo.

¹³Ayi mwaduwalira MBUYA nyakukusasanyani, ule adafuthula thambo mbaikha maziko a dziko yapansi, mwakuti mukhale na mantha nsiku na nsiku thangwi ya ukali wa anyakukuponderezani, ale ana phinga kufuna kukuvungani? Apo ukali wa anyakukuponderezaniwo uli kupi?

¹⁴Anyaperezo anati asudzulwe chinchino pano; iwo nkhabe fera m'kadyaboso, penu kusowa mkate tayu.

¹⁵Thangwi ine ndine MBUYA Mulungu wanu, ule ambanyandula bara, towera mabimbi ache amenye, MBUYA Wamphamvu zonsene ndiye dzinache.

¹⁶Ine ndaikha mafalanga m'kanwa mwako mbandikuphimbira na mthunzi wa dzanjanga. Ine ule ndidaikha[50] kudzulu m'mbuto mwache, ule ndidaikha maziko a dziko yapansi, pontho ule ndimbalonga kuna Zioni kuti ‘Imwe ndimwe anthu anga.’ ”

¹⁷Ngalamuka, chita khakhaphathu! Lamuka, iwe Yerusalemu, iwe ule waledzera na khomitcho ile ili m'manja mwa MBUYA, khomitcho ya ukali wache, iwe ule waikhuthuliratu, khomitcho imbachitisa amuna kudzedzereka ile.

¹⁸Mwa anache onsene adabala iye nkhabe na mbodzi ene wakumphata nsenji tayu; mwa anache onsene adalera iye na mbodzi ene nyakumphata pamkono nkhabepo.

¹⁹Nyatwa zikuluzi zadza pana iwe, mbani anakwanisa kukuthondoza? Madembe na kusakazika, njala pontho nkhondo; mbani anapiyesera kukupukuta misozi?

²⁰Anako amala komoka; iwo ali thasa-thasa m'misewu ikulu yonsene, ninga nyasa wakukweshwa na msampha. Iwo amala dzala na ukali wa MBUYA, pontho kusumulula kwa Mulungu wako.

²¹Natenepo vesera ipi, iwe nyakusanyiswa, ule waledzereswa kwache nee na vinyu tayu.

²²MBUYA Mfumu akulonga, Mulungu wako nyakutchinjiriza anthu ache akulonga kuti, “Yang'ana, ine ndakupokosera m'manja mwako khomitcho ikhakudzedzeresa ile; khomitcho ile, ndiko ya ukali wanga, iwe nkhabe imwa pontho tayu.

²³Ine ndinaiikha m'manja mwa anyakukusanyisa, adalonga kuna iwe ale mbati, ‘Gona na fufumimba, towera ife tifambe na pamsana pako.’ Pontho iwe udachitisa msanako kukhala ninga mataka, ninga njira yakuti anthu afambemo.”