Read cisena YESAYA 54 Bible Online

YESAYA 54 - cisena bible

YESAYA 54

¹MBUYA akulonga kuti, “Imba, iwe mkazi wakuuma nthumbo, ule chipo hudabale mwana tayu; gundika nazo nyimbo, khuwa thangwi ya kukomerwa, iwe ule chipo hudave mtswotswo wakubala tayu; podi chinchino iwe unakhala na ana akuinjipa kupita mkazi ule ana mamunache.

²Fumula mbuto yakumangirapo khumbi yako, futhula nguwo zachezo monsene mwene; laphisa nkhambala zako mbuwangise ntchiri zako.

³Thangwi unabalalikana khundu ya kumadyo na kumabzere kwene; pidzukulu pyako pinapokosera mbuto madzinza anango mbapikhazikika m'mizindawo yakusowa anthu ile.

⁴“Leka chita mantha; iwe nkhabe dzachitiswa manyadzo tayu. Leka taya mtima; iwe nkhabe dzalulupiswa tayu. Iwe unaduwalira manyadzo a uphaleako mbukhonda kumbukave nyatwa zonsene zikhaona iwe pa umamfelwako.

⁵Thangwi Nyakukusasanya ndiye mamunako, MBUYA Wamphamvu zonsene ndiye dzinache, Nyakuchena wa Israele ndiye Dombo wako; iye ambachemerwa Mulungu wa dziko yonsene yapansi.

⁶MBUYA anakuchemera kukubweza khala ninga mkazi wakusiyiwa na mamunache, pontho wakusanyika mumtima mwache, mkazi wakusembwa mbali mtete-mtete ene mbakhondwa na mamunache.” Mbwenye Mulungu wako akulonga kuti,

⁷“Ndidakusiya kwene ndzidzi ene pang'ono basi, kwache na kuva nyambalo pikulu ndinati ndikudzese kukubweza.

⁸Na thangwi ya kuzhangali ine ndidakupasa nkhodolo ndzidzi ung'ono ene basi kwache chinchino ndinakukomera mtima kwenda na kwenda, pontho ine ndinava nawe nyambalo. Ndalonga ndine MBUYA Dombo wako.

⁹“Kuna ine penepi pyakhala ninga nsiku za Nowa, ndzidzi udadumbira ine kuti madzi makulu a ndzidzi wa Nowa nkhabe dzadya pontho dziko yapansi tayu. Natenepo chinchino ndadumbira kuti iwe sinakuzhangalira, penu kukusumululave tayu.

¹⁰Podi kwene kuti mapiri atekenyeke pyawo, pontho pitunda pibuluke m'mbuto mwawo, kwache kukufuna kwanga kokhonda mala nkhabe dzabuluka pana iwe tayu, pontho chiverano cha mtendere chidasasanya ine nawe nkhabe dzasweka tayu. Ndalonga ndine MBUYA, ambava namwe nyambalo ule.”

¹¹MBUYA akulonga kuti, “Iwe mzinda wakusanyiswa, wakuvinyizika-vinyizika na mphepo, pontho wakuchimwana kuthondozeka, ine ndinati ndikumange pontho na miyala yakudula, pontho maziko ako na miyala yakudula ya safire.

¹²Ndinamanga nsanja zako na miyala yakufira, misuwo yako ya mpanda na miyala yakuyetimira. Mafufu ako onsene ndinaamanga na miyala yakudula.

¹³Anako onsene anafunziswa na MBUYA, pontho ndinaatsanzayisa na mtendere ukulu pyakwanga.

¹⁴Iwe unakhazikika na chilungamo chadi-chadi: Pyakuzunguzika pyonsene pinakhala kutali na iwe; thangwi nkhabe chinafuna iwe chita nacho mantha tayu. Pyakugoswa unalila dzapiva kwene na njira; ipyo nkhabe fika chifupi na iwe tayu.

¹⁵Ngakhala munthu unango anakuthuswa, kweneko si kufuna kwanga tayu; nyakukusosayo anati aimise manja kuna iwe.

¹⁶“Yang'ana, ndine pano ule adalenga anyakufula ntove, ule ambavukuta moto wa makala, towera afulire chida cha nkhondo, pontho ndine ule adalenga nyakusakaza, towera avunge;

¹⁷nkhabe chida cha nyamalwa chinafuna kukuwaza tayu, pontho iwe unapokanya nyakukusumira onsene. Penepi ndiye pyathema tambira nyabasa wa MBUYA, pontho anafuna kupichitisa kukwanisika ndine pano. Ndalonga ndine MBUYA.”