Read cisena YESAYA 55 Bible Online

YESAYA 55 - cisena bible

YESAYA 55

¹MBUYA akulonga kuti, “Ngadzani, imwe monsene anyakuva nyota, idzani madzi alipo kuno; imwembo ale nkhabe kobiri, idzani mugule na kudya! Idzani mugule vinyu na mkaka okhonda pereka kobiri, penu chinthu chinango chene.

²Mwatani munavunga kobiri na pinthu pile si mkate tayu, pontho kubulusa kaluma papinthu pile nkhabe khutisa tayu? Veserani, ngandivesereni, mbamudye pinthu pyadidi, tenepo moyo wanu unakomerwa na kudya pinthu pyakununa.

³Ikhani makutu, mbamudze kuna ine; ngandivesereni, towera mukhale na moyo. Ine ndinati ndisasanye namwe chiverano chokhonda mala, kukufunani kwakukhulupirika pontho kokhonda mala ninga mudachitira ine kuna Davite kule.

⁴Yang'anani, ine ndamsankhula kukhala mboni wa madzinza, kukhala nyakutsogolera pontho mkadamu wa anthu.

⁵Imwe munachemeresa madzinza, ale chipo hamudzati kuadziwa tayu, pontho madzinza anakhonda imwe dziwa, anabwera na kuthamanga kuti akhale namwe, thangwi ine, MBUYA Mulungu wanu, Nyakuchena wa Israele, ndakugudumirani na demelero.”

⁶Msake-sakeni MBUYA panakwanisika iye kugumanwapo; mchemereni mwenemo iye mbali chifupi.

⁷Nyakudawa mbasiye njira zache pontho nyakuipa mbataye manyerezero ache. Iye mbazungunukire kuna MBUYA, tenepo iye anamvera nsisi, pontho azungunukire kuna Mulungu, thangwi iye ngwakukoma mtima mbalekerera pyakudawa pyache.

⁸“Thangwi manyerezero anga si manyerezero anu tayu; njira zanu si njira zanga tayu. Ndalonga ndine MBUYA.

⁹Ninga mwachitira thambo kukhala padzulu pa dziko yapansi, sasawambo njira zanga nsakulekana na njira zanu, pontho manyerezero anga apiringana manyerezero anu.

¹⁰Ninga mumbachitira mvula na matalala kugwa kudzulu, mbapikhonda bwerera pontho kudabulukira ipyo okhonda totesa dziko yapansi, pontho kuichitisa kuphukira na kuchita maluwa, towera ipase mbewu kuna nyakubzala pontho mkate kuna nyakuudya,

¹¹ndi sasawambo na mafala akubuluka m'kanwa mwanga: Iwo nkhabe dzabwerera kuna ine okhonda phata basache tayu, mbwenye anaphata basa inafuna ine ile mbachitisa kukwana-kwana basa idaatumira ine ile.

¹²Imwe munabuluka mwakukomerwa mbamuenda pyanu na mtendere; mapiri na pitunda pinagundika kuimba nyimbo pamaso panu, pontho miti yonsene inaimba m'manja.

¹³M'mbuto mwa matenthere a minga minjale ndiye inafuna dzamera, pontho m'mbuto mwa mikandankhuku kesha ndiye inafuna dzamera. Penepi pinakhala chikumbuso cha ine MBUYA ninga chidziwiso chakwenda na kwenda, chile nkhabe dzavungwa tayu.”