Read cisena YESAYA 56 Bible Online

YESAYA 56 - cisena bible

YESAYA 56

¹MBUYA akulonga kuti, “Chitani chilungamo, pontho chitani pyakulungama, thangwi chipulumuso changa chili chifupi, pontho kuombola kwanga kunati kuonekere chinchino pano.

²Nyakutsanzaya ngule anachita penepiyi, munthu anapiphatisa nganganga, ule ambachitisa Nsiku Yakupuma kukhala yakuchena, ule nkhabe kuiswipisa, pontho ule ambakhondesa manjache kuchita pinthu pyakuipa.”

³Mlendo ule aphatikana na MBUYA mbaleke kulonga kuti, “Ndimomwene MBUYA anati andikhethe pakati pa anthu ache.” Pontho munthu wakukapalwi mbaleke dungunya kuti, “Ine ndine kwene pyanga muti wakuuma.”

⁴Thangwi MBUYA akulonga kuti, “Kuna anthu akukapalwi, ale ambachitisa Nsiku Yakupuma kukhala yakuchena, ale ambachita pyakundikomera, mbakakamira kukoya chiverano changa,

⁵enewa ndinaapasa dzina na mbiri yadidi pakati pa anthu anga m'Nyumba mwanga, kupiringana kukhala na ana achimuna na achikazi; ine ndinaapasa dzina yakwenda na kwenda, ile nkhabe fudzika na pang'ono pene tayu.

⁶Kulonga pya alendo, ale ambakakamira pana MBUYA kumtumikira, kufuna dzina ya MBUYA, pontho kumpembedza, onsene ale ambakoya Nsiku Yakupuma mbakhonda kuiswipisa, pontho ale ambakhala nganganga kuna chiverano changa,

⁷enewa ndinaadzesa kuphiri yanga yakuchena mbandiapasa kukomerwa m'nyumba mwanga yakupemphereramo. Nsembe zawo zakupyerera pontho na pyakupereka pyawo pinatambirwa paguwa yanga yansembe; thangwi nyumbanga inachemerwa nyumba yakupemphereramo madzinza onsene.”

⁸MBUYA Mulungu akulonga kuti, kuna iye nyakugumanyisa anyakutamiswa a Israele mbati, “Ine ndinati ndigumanyise basi anthu anango padzulu pa anthu agumanyikana kale ale.”

⁹Idzani, imwe monsene pirombo pyam'tsanga, idzani mbamudye, imwe monsene pirombo pya mumsitu!

¹⁰Anyakulondali a Israele ndi maboli-boli, onsenewo nkhabe udziwisi tayu; onsenewo mbanambwa okhonda bulusa na fala ene, iwo nkhabe kwanisa na kuuta kwene tayu; iwo kwawo nkhugona kwene uku ndoto zili tawatawa, pontho kugona nkhudya kwawo.

¹¹Iwo mbanambwa ausa pikulu pene; iwo nkhabe khuta tayu. Iwo mbamakabuswa okhonda vesa pinthu; munthu onsene ambalokota pyache njirache mbachita pyawo pyonsene pyakuakomera.

¹²Munthu onsene wa iwo akulira kuti, “Idzani, ngandilekeni ndisake vinyu! Mbatimweni pyathu bwadwa mpakana tikhute! Tenepo mangwana anakhala ninga lero, penu mwinango kupiringana penepa.”