Read cisena YESAYA 57 Bible Online

YESAYA 57 - cisena bible

YESAYA 57

¹Anyakulungama ambafa, kwache nkhabe na mbodzi ene ambapiikha konta tayu, anyakunyindirika ambabuluswa pakati pa anthu, kwache nkhabe munthu na mbodzi ene ambapivesa tayu kuti iwo abuluswa, towera nyatwa zileke kuagwera.

²Anyakuchita pyakulungama ambakhala na mtendere; iwo angagonera mkono kwawo kumbakhala kupuma.

³Mbwenye imwe, idzani kuno, imwe ana nyamatsenga, maputa na anyakuchita pyakuzuda!

⁴Mbani anasingirira imwe? Ayi analonga imwe tenepa mbani? Anatikana imweyi mbani? Ayi si imwe tayu anyakupandukira, ana a anyakunama ale?

⁵Imwe mumbapembedza milungu yakubalisa pinthu pakugonana pansi pa miti yamthundu na miti yakuvata; imwe mumbapereka nsembe ananu m'maphedi, pontho kunkhwimba zamwala.

⁶Mumbakwata miyala yakumyalala m'maphedi mbamuipembedza ninga milungu, mumbapereka pyakupereka pyakumwa kuna iyo, pontho kupereka pyakupereka pya mapira. Ayi penepimbo nkhumbombowesa basi ukali wanga?

⁷Imwe mwasasanya talimba pansonga ya phiri yakulapha penepo imwe mudaperekapo nsembe zanu.

⁸M'nyumba zanu pontho kumisuwo kwanu mwamala ikhamo mifanikizo. Kukhonda ine pano, imwe mudayalula patalimba panu mbamupakira penepo kuibwanyulaletu; imwe mwapakira nawo patalimba panu mbamuapagali kuti mugone nawo, mbamuyang'ana pezi pawo.

⁹Imwe mudenda kuna Moleki na mafuta aolivi mbamukwata pontho mafuta akugwadira mwadidi azinji. Imwe mudachita kutumiza aimiriri kutali pyakwanga; imwe mudachita kutchithira mpakana kudziko ya anyakufa!

¹⁰Nsinzo onsene udafamba imwe mudatopa nawo, kwache imwe nee mudalonge tayu kuti, “Pinachita ifepi mphyakusowa basa.” Imwe mudagumana mphamvu zinango mwakuti nee mudakhomfoke tayu.

¹¹MBUYA akulonga kuti, “Milungu yache njipi idaona imwe mbamuchita nayo mantha kuti muname kuna ine ninga tenepa, pontho kuti muleke kundikumbuka penu kupinyerezera mumtima mwanu? Ayi ndi thangwi yakuti ndzidzi ukulu ene ine ndakhala pyanga mulomo phoo kuti mukhonde kundigopa ninga munachitira imwemu?

¹²Ayi mukunyerezera kuti pinachita imwepi mphyakulungama? Kwache mabasanu ndinaabulusa pakwecha pontho mifanikizo nkhabe dzakuganyalisani tayu.

¹³Imwe mungalira kufuna chiphedzo, lekani mifanikizo yanuyo ikupulumuseni! Mphepo inati itswaire yonseneyo, muya ene pyawo unati uambumbuluthe. Mbwenye munthu ule ine mphakubisala pache, anatambira dziko yapansi, pontho phiri yanga yakuchena inakhala yache.”

¹⁴MBUYA akulonga kuti, “Sasanyani, fumbulani, sasanyani msewu! Bulusani makolong'ondo m'njira ya anthu anga.”

¹⁵Thangwi penepi ndiye pyalonga Wamkulu pontho Nyakupita pyonsene, ule ndi nyakukhala na kukhala, pontho dzinache ndi Nyakuchena kuti, “Ine ndikukhala pambuto yapadzulu pontho yakuchena, kwache ndimbakhala pontho pakati pa anyakupichepesa na anyakuleka pyakudawa pyawo, kusisimusa moyo wa anyakupichepesa pontho kusisimusa mtima wa anyakuleka pyakudawa pyawo.

¹⁶Ine nkhabe dzathimiza kuthimbana na anthu anga kwenda na kwenda, penu kuazhangalira kwenda na kwenda tayu, thangwi ndingachita tenepo mzimu wa munthu unati ukomoke pamaso panga, muya wa munthu adalenga ine ule.[55]

¹⁷Na thangwi ya pyakudawa pyache pontho bivu ine ndidamzhangalira; ndidamtchunyusa mbandimpasa nkhodolo thangwi ya kuzhangali, kwache iye adathimiza basi kuchita pyakumkomera.

¹⁸“Ine ndaona makhaliro ache, kwache ndinati ndimuwangise; ine ndinamtsogolera mbandimpukuta misozi yache. Anyakusintili anandikuza na milomo yawo.

¹⁹Kuna anyakukhala kutali na chifupi ene ine ndinapasa mtendere. Tenepo ine ndinati ndiawangise. Ndalonga ndine MBUYA.

²⁰Mbwenye anyakudawika akhala ninga mabimbi, ale nkhabe kwanisa kumbombowa tayu, ale mathomu-thomu ache ambakapiza usekere na matope ene basi.

²¹Nkhabe tayu mtendere kuna anyakudawika.” Alonga penepi ndi Mulungu wanga.