Read cisena YESAYA 58 Bible Online

YESAYA 58 - cisena bible

YESAYA 58

¹MBUYA akulonga kuti, “Pilalike mwakukhuwa, leka khala mulomo phoo. Galuza fala ninga ngoma. Longa kuna anthu anga pya kupandukira kwawo pontho kuna pidzukulu pya Yakobo pya pyakudawa pyawo.

²Thangwi nsiku na nsiku iwo ambandisaka-saka; iwo ambaoneka ninga ambafuna kudziwa njira zanga; iwo ambakhala ninga dzinza ile imbadziwa kuchita pyakulungama, ile hidakhonde kuvera matongero a Mulungu wache tayu. Iwo ambandipempha kuapasa mwambo wakulungama, mbaoneka ninga ngakusasanyika kufuna kudza chifupi na ine, Mulungu wawo.”

³Iwo ambalonga kuti, “Thangwi yache ninji tapimana kudya, imwe mbamukhonda kupiona? Thangwi yache ninji tapichepesa tekha ene, imwe mbamukhonda kupidzindikira?” MBUYA akulonga kuti, “Kwache pansiku yanu yakupimana kudya, imwe mumbachita pinthu pyakukukomerani mbamuonesa nyatwa anyabasanu onsene.

⁴Kupimana kwanu kudya mamalisiro ache ambakhala nthonga pontho mapoko-poko, pontho kumenyana unango na mwanzache na mashoko akudawika. Imwe nkhabe kwanisa kupimana kudya ninga munachitira imwe leromu tayu mbamudikhira kuti kupemphera kwanu kuveke kudzulu.

⁵Ayi kupimana kudya kumbafuna ine nkhweneku, kuti munthu apichepese kwene nsiku ibodzi ene basi? Ayi nkhutchulimisa kwene msolo wache ninga mtete basi, pontho kugona kwene pamasakha na kupikhwaza madotha kwene basi? Ayi kweneku nkhupimana kudya kumbalonga imwe kule, nsiku yakukomera MBUYA ile?

⁶“Kupimana kudya chadi-chadi kumbafuna ine nkhuku: kusudzula njema kuna anyakusanyiswa, kusudzula magoli-goli kuna anyakukhonderwa chilungamo, kupasa ufulu anyakuponderezwa mbamugwanda-gwanda magoli-goli onsene.

⁷Gawanani phoso yanu na onsene akuva njala, mbamupereke kuna amanzenza akutcherenga mbuto yakugona; mungaona anango akufamba chipezi-pezi apaseni pyakuvala, pontho lekani kuapasa nkhodolo abale anu a mimba ibodzi ene.

⁸Mungachita tenepo imwe munaonesa cheza ninga makalakwecha, pontho munawangiswa kabodzi na kabodzi; tenepo kulungama kwanga kunaenda patsogolo panu, pontho demelero ya MBUYA inakutchinjirizani kunduli kwanu.

⁹Imwe mungapemphera, ine MBUYA ndinakuvani; mungalira kuti ndikuphedzeni, ine ndinatawira kuti: Ndawo! Ndili pano. “Ngakhala imwe munasudzula magoli-goli kuna anyakuponderezwa, mbamusiya kuthonyana chala, mungaleka kulongana tsweda,

¹⁰pontho ngakhala munadyesa anthu a njala, mbamupasa anyakuponderezwa pinthu pinasowa iwo, penepo cheza chanu chinamwinika mumdima, pontho mosiku anasanduka ninga cheza cha masikati.

¹¹Ndzidzi onsene MBUYA anakutsogolerani; iye anakupasani pyakusowa pyanu pyonsene m'dziko yakupisa dzuwayi mbapasa mphamvu manungo anu. Imwe munakhala ninga munda wa madzi azinji, pontho munda wa mphuno ya madzi ile nkhabe kuphwa na pang'ono pene tayu.

¹²Anthu ako anamanga pontho pamadembe akale ale mbalamusa pontho maziko a mvula zakale ale; iwo anachemerwa anyakusasanya pontho mafufu akukugomoka, pontho anyakusasanya pontho misewu na nyumba, towera anthu akwanise kukhalamo.”

¹³MBUYA akulonga kuti, “Ngakhala imwe munathimiza kukhonda koya Nsiku Yakupuma mbamuthimiza kuchita pyanu pyakukukomerani pansiku yanga yakupumayi, ngakhala imwe munathula Nsiku Yakupuma ninga nsiku yakukomerwa, pontho Nsiku Yakuchena ya MBUYA ninga nsiku ya chilemedzo, pontho ngakhala imwe munailemedza pakukhonda bauka kwenda m'tsanga pontho pakukhonda kuchita pyanu pyakukukomerani penu kulonga mafala akupupwa,

¹⁴penepo imwe munagumana kukomerwa muna ine, MBUYA, pontho ine ndinakupasani chilemedzo pakati pa anthu onsene a dziko yapansi. Pontho munakomerwa na dziko idakusiyirani kholo wanu Yakobo ile. Ine MBUYA ndalonga mafala enewa na pakanwa panga.”