Read cisena YESAYA 59 Bible Online

YESAYA 59 - cisena bible

YESAYA 59

¹Ndimomwene kuti mkono wa MBUYA si wakuvira tayu kuti uchimwane kupulumusa, penu makutu ache kugontha kuti achimwane kuva.

²Mbwenye pyakudawa pyanu ndiye pyakulekanisani imwe na Mulungu wanu; iye akupasani nkhodolo thangwi ya pyakuipa pyanu, towera iye aleke kukuvani.

³Manjanu amala fira na mathotho a chiropa, mbamuswipisa pyala pyanu na pyakudawa. Pakanwa panu palonga pyakunama pontho lulume yanu yalonga pinthu pyakudawika.

⁴Munthu angakhala na mseru na mwanzache; chilungamo nkhabe khalapo tayu. Iwo ambanyindira mphoka zakusowa basa mbalonga pyakunama; iwo ambanyerezera kwene kuchita pyaumambala basi mbachitadi pyakuipa pimbanyerezera iwo pile.

⁵Pyakuipa pimbasasanya iwo mphyakugoswa ninga mazayi a mbobo; iwo ambasasanya utandaude. Munthu onsene wakudya mazayi awo anati afe, tenepo ibodzi ingasweka, mwana chipiri ndiye ambabulukamo.

⁶Utandaudewo munthu nkhabe kwanisa kuuvala nguwo tayu; iwo nkhabe kwanisa kupimpsampsira okha ene na pinthu pimbasasanya iwo tayu. Mabasawo mbakuipa, pontho manjawo ambachita pyakuzunguzika.

⁷Iwo ambathamangira kuchita pyakuipa iwo nkhabe dembuka kuchuchisa chiropa tayu cha anthu okhonda dawa. Manyerezero awo mbakuipa, ponsene panaenda iwo kwawo nkhuvunga na nthonga basi.

⁸Njira zakudzesera mtendere iwo nkhabe kuzidziwa tayu; pyonsene pimbachita iwo mphyakusowa chilungamo pyokhokha. Iwo ambafamba m'njira zakupotoka-potoka; nkhabe nyakufamba na mwenemo anadziwa mtendere na pang'ono pene tayu.

⁹Anthu ambalonga kuti, “Ife chilungamo tili nacho kutali pyakwanga, pontho kulungama nkhabe kutifedzera chifupi tayu. Timbasaka-saka cheza, kwache umbaona ife ndi mdima ene basi; timbadikhira kunja kukhala ngwiro, kwache chimbaona ife ntchigudu-gudu chene basi,

¹⁰Ninga mumbachitira boli-boli kumphamphasa-mphamphasa pafufu, sasawambo ife takhala ninga anthu akusowa maso. Dzuwa ikuswa miti timbagwegweduka pyathu, kukhala ninga tili m'chidodo; ndimomwene, ife tingasangizwa na aphale amphamvu timbaoneka ninga anyakufa.

¹¹Tonsenefe timbakhumbza ninga anambwa; mbatilira mwakudungunya ninga nkhangaiwa. Timbasaka-saka chilungamo, kwache nkhabe kuchigumana tayu; ife timbadikhira kuombolwa, kwache kuli kutali pyakwanga na ife.

¹²“Thangwi umambalathu wainjipa pyakwanga pamaso panu, pontho pyakudawa pyathu pikutipokanyisa. Umambalathu nkhabe kutimalira tayu, pontho ife nkhabe kwanisa kukhonda tayu kudawa kwathu:

¹³Tapandukira pontho tachitira upandu MBUYA, pontho tapasa nkhodolo Mulungu wathu; tapondereza anzathu pontho tapandukira, talonga pyakunama pile pyadzala mumtima mwathu.

¹⁴Chilungamo nkhabe onekave tayu, pontho kulungama kuli pyako dziko yantomi; pyakuonadi nkhabemove m'misewu, kuona mtima nkhabeve gumana mbuto tayu.

¹⁵Pyakuonadi nkhabe gumanwave tayu, tenepo munthu onsene wakuthunda pyakuipayo ambasanduka nyama kuna anyakuipa.” MBUYA adaona penepi mbaipirwa napyo, kuona kuti chilungamo nkhabepo.

¹⁶Iye adadodoma kuona kuti nkhabe na mbodzi ene kufuna kuphedza anyakuponderezwa; natenepo iye adaapulumusa na mkono wache wamphamvu, mbakunda na kulungama kwache.

¹⁷Iye kulungama ambakuvala ninga chapagangafuwa pache, pontho chipulumuso ambachivala ninga chipewu mumsolo mwache; iye ambavala kubwezera ninga nguwo, mbapifinikiza yekha ene na phinga ninga chakufinika.

¹⁸Malingana na mabasawo iye anaatchunyusa na ukali wache kubwezera anyamalwache, pontho kuonesa nyatwa anyakumzonda; iye anabwezera anyamgombe pinthu pyakuthemerana na pyachita iwo.

¹⁹Anyakukhala kumadokero dzuwa anagopa dzina ya MBUYA, pontho anyakukhala kumabulukiro dzuwa anachita mantha na demelero yache. Thangwi iye anabwera ninga mkulo wakukuka ule wagwinywa na muya wa MBUYA.

²⁰MBUYA akulonga kuti, “Dombo anabwera ku Zioni, kuna pidzukulu pya Yakobo, pile pidaleka pyakudawa pyawo.

²¹Kulonga pya ine, chiverano changa nawo ntchakuti: Mzimu wanga ule ali pana imwe, pontho mafalanga aikha ine m'kanwa mwanu ale nkhabe dzabulukamo tayu, penu kubuluka m'kanwa mwa ananu, penu pidzukulu pyawo tayu kubulukira ndzidzi uno kwenda na kwenda tayu. Ndalonga ndine MBUYA.”