Read cisena YESAYA 6 Bible Online

YESAYA 6 - cisena bible

YESAYA 6

¹Chaka chidafa Mfumu Uzia, ndidaona MBUYA akhala pampando wache wachifumu wademelero pontho wapadzulu. Mkhanjo wache ukhali wakulapha pyakwanga mwakuti udadzala m'Nyumba ya Mulungu yonseneyo.

²Padzulu pache pakhali pyakulengwa pyakukhala na maphaphido, maphaphido matanthatu kada chibodzi: na maphaphido mawiri ipyo pidampsampsika nkhope zawo, na maphaphido mawiri ipyo pidaphimbira miyendo yawo, pontho na maphaphido mawiri ipyo pikhambuluka nawo.

³Tenepo ipyo pikhachemerezana unango na mwanzache kuti: “Nyakuchena, nyakuchena, nyakuchena ndi MBUYA Wamphamvu zonsene; dziko yonsene yapansi yadzala na demelero yache.”

⁴Na thangwi ya kukhuwa kukhachita ipyo kule, maziko a Nyumba ya Mulungu adatekenyeka, pontho idakalangira utsi.

⁵Ine ndidalira kuti, “Nyadzedze ndine! Ndavungika ine! Thangwi ndine munthu wa pakanwa pakunyansa, pontho ndimbakhala pakati pa anthu a milomo yakunyansa; kwache na maso anga ndaona Mfumu, MBUYA Wamphamvu zonsene.”

⁶Tenepo chakulengwa chibodzi chakukhala na maphaphido chidambulukira kuna ine na khala ya moto m'manja mwache, idapala iye na chakupalira moto paguwa yansembe ile.

⁷Iye adakhuya milomo yanga na khalayo mbalonga mbati, “Yang'ana, khalayi yakhuya milomo yako; umambalako wabuluswa, pontho pyakudawa pyako pyalekererwa.”

⁸Kubuluka penepo ndidava fala ya Mbuya kulonga kuti, “Ndinatuma ani? Pontho mbani anafuna kwenda m'mbuto mwathu?” Tenepo ine ndidatawira kuti, “Ndili pano. Nditumeni!”

⁹Tenepo iye adalonga mbati, “Ndoko kapange anthu enewa kuti: ‘Kuva mukuva, kwache nkhabe vesesa tayu; kuona mukuona, kwache nkhabe onesesa tayu.’

¹⁰Ipha misolo ya anthu enewa; funga makutu awo, pontho phopha maso awo; gopesera anaona na maso awo, mbava na makutu awo, pontho kuvesa na misolo yawo, mbazungunukira kuna ine, inembo mbandiaawangisa.”

¹¹Penepo ndidavunza kuti, “Penepi mpakana lini, Mbuya?” Iye adatawira mbati, “Kufikirana mizinda yamala sanduka madembe, pontho yakusowa anthu akukhalamo, kufikirana nyumba zasala zokha pontho minda ivungike mbisanduka thema,

¹²kufikirana MBUYA atamisa munthu onsene kudziko yakutali, pontho dzikoyo isanduke msitu.

¹³Podi kwene pichitike kuti khundu yachikhumi ya anthu isale m'dzikomo iyombo inavungika basi. Kwache ninga mumbachitira miti yamtondo na yamthundu kusiya chitsa sasawambo mbewu yakuchena ile, inasalira chitsa m'dzikomo.”