Read cisena YESAYA 60 Bible Online

YESAYA 60 - cisena bible

YESAYA 60

¹Lamuka, mbuonese cheza thangwi cheza chako chaonekera, pontho demelero ya MBUYA yakuonekera pana iwe.

²Yang'ana, mdima wagudumira dziko yapansi, pontho mdima wa ndiwe ani waphimbira anthu a madzinza, kwache MBUYA anaonekera pana iwe, pontho demelero yache inaonekera pana iwe.

³Madzinza anabwera kuna cheza chako, pontho mafumu kuna cheza chako cha makalakwecha.

⁴Chita maso kwize mbuone pinachitikapi: Onsene akugumanyikana kudza kuna iwe; anako akudza kubulukira kumadziko akutali, pontho anako achikazi anathukulwa m'manja.

⁵Tenepo iwe unaona penepi mbukomerwa, mtimako unanumpha-numpha mbufufuma thangwi ya kusekera; mfuma yonsene ya pabara inadzeswa kuna iwe, kuna iwe ufumi onsene wa madzinza anango unabwera.

⁶Mkumbi wa ngamila unakhala ponsene pene m'dziko mwako, ana a ngamila a ku Midiani na a ku Efa. Pontho onsene akubulukira ku Sheba anabwera, kudza na golidi na pyakufukiza pyakununkhira uku akulalika pya ukulu wa MBUYA.

⁷Mikumbi yonsene ya ku Kedara inagumanyikana kuna iwe, mabira achimuna a ku Nebaioti anakutumikira; ipyo pinatambirwa ninga nsembe paguwanga, tenepo ine ndinapasa nyumbanga demelero ikulu pyakwanga.

⁸Ninji penepi pinachita kumbuluka ninga makolepi, pinambuluka ninga jiwa kwenda kupisa pyawo?

⁹Yeneyi ndi miyadiya yakubulukira kumadziko akutali; patsogolo mbikhala ndi miyadiya ya ku Tarisisi, kudza na anako kubwerera nawo kwawo, pabodzi pene na siliva na golidi wawo kuti MBUYA Mulungu wanu, Nyakuchena wa Israele, alemedzwe thangwi iye adakupasa demelero.

¹⁰MBUYA akulonga kuna Yerusalemu kuti, “Alendo anamanga pontho mafufu ako, pontho mafumu awo anakutumikira. Podi kwene kuti ine ndidakutchunyusa thangwi ya kuzhangali, ine ndinakukomera mtima thangwi ya kuva kwanga nyambalo.

¹¹Misuwo yako ndzidzi onsene inakhala khanang'ana, mosiku penu masikati, iyo nkhabe dzafungwa tayu, towera anthu akwanise kukudzesera mfuma ya madzinza anango, mwenemo mafumu awo akwatwa pamulikiti wa kukunda.

¹²Thangwi dzinza penu ufumu ule nkhabe dzakutumikira tayu, anamala vungika; kunakhala kuvungika kukulu kwene.

¹³“Miti ya paina, njale na mikungudza, demelero ya mumsitu wa Lebanoni inadzeswa kuna iwe, kudzathemesera nayo mbuto yanga yakuchena; tenepo mbuto imbakhala ine ile inalemedzwa.

¹⁴Ana a anyakukupondereza anabwera mbalamba pamaso pako; onsene anakululupisa ale anati akulambire. Iwo anakuchemera mzinda wa MBUYA, Zioni, mzinda wa Nyakuchena wa Israele.

¹⁵“Podi kwene iwe wakhondwa mbuzondwa, wakusowa munthu na mbodzi ene wakugwanda na mwenemo, ndinakuchitisa kukhala wamkulu kwenda na kwenda, pontho kukomerwa kwa mifendu yonsene.

¹⁶Iwe unamwa mkaka wakubulukira kumadzinza anango mbuyamwa mabele achifumu. Penepo unapidziwa kuti ine MBUYA ndine Nyankhombo wako, Dombo wako, Nyamphamvu zonsene wa Yakobo.

¹⁷M'mbuto mwa nkuwa ndinakudzesera golidi, pontho siliva m'mbuto mwa simbi. M'mbuto mwa matabwa ndinakudzesera nkuwa, pontho simbi m'mbuto mwa miyala. Ndinachitisa mtendere kukhala nyakukuyang'anira pontho chilungamo kukhala mtongi wako.

¹⁸M'dziko mwako nkhabeve dzaveka pontho pinthu pyakuzunguzika tayu, nee kuvungika penu kusakazika m'madire mwako tayu, mbwenye unachemera mafufu ako chipulumuso, pontho misuwo yako ya mpanda chilemedzo.

¹⁹Dzuwa nkhabe dzakhalave cheza chako na masikati tayu, penu mwezi dzakumwinikira pontho na mosiku tayu, thangwi MBUYA ndiye anakhala cheza chako kwenda na kwenda, pontho Mulungu wako ndiye anakhala demelero yako.

²⁰Dzuwako nkhabe dzathobilave pontho tayu, pontho mwezi wako nkhabe dzathimave tayu; MBUYA ndiye anakhala cheza chako kwenda na kwenda, pontho nsiku zako zakutsukwala zinamala.

²¹Anthu ako onsene anafamba m'njira zakulungama, tenepo dzikoyi inakhala yawo ene kwenda na kwenda. Iwo ndi mphukira idatcheka ine ile, basa idaphata ine na manjanga, towera kuonesa demelero yanga yonsene.

²²Banja ing'onoletu inasanduka mbumba, pontho mbumba ing'onoletu inasanduka dzinza ya mphamvu, pandzidzi wache ndinati ndipichite penepi mwakuchimbiza. Ine ndine MBUYA.”