Read cisena YESAYA 62 Bible Online

YESAYA 62 - cisena bible

YESAYA 62

¹Na thangwi ya Zioni, ine nkhabe khala mulomo phoo tayu, na thangwi ya Yerusalemu, ine nkhabe khala kwene okhonda longa pinthu tayu, mpakana kulungama kwache kuonese cheza ninga makalakwecha, pontho chipulumuso chache chiyerime ninga nsakali.

²Madzinza anango anaona kulungama kwako, pontho mafumu onsene anaona demelero yako; iwe unachemerwa na dzina yachinchino dzina ile inafuna kukutchandula mulomo wa MBUYA mwenechiroache.

³Iwe unakhala ninga chipewu chademelero m'manja mwa MBUYA, pontho ninga kamdedzi wachifumu m'manja mwa Mulungu wako.

⁴Iwe nkhabe kuchemerwave Nyakusiyiwa yekha tayu, penu dziko yako kuthulwa pontho Madembe tayu. Mbwenye unachemerwa “Mulungu akomerwa naye,” dziko yakombo inachemerwa “Nyakusembwa;” thangwi MBUYA anakomerwa nawe, pontho iye anakhala ninga mamuna wa dziko yako.

⁵Ninga mumbachitira mphale kusemba mwali, sasawambo nyakukusasanya anakusemba; ninga mumbachitira nyakukazhali kukomerwa na mkazi asemba iye, sasawambo Mulungu wako ambakomerwambo nawe.

⁶Ine ndaikha anyakulondali m'mafufu mwako, iwe Yerusalemu; iwo nkhabe khala kwene mulomo phoo mosiku penu masikati tayu. Imwe, ale mumbachemera MBUYA, lekani khala na ndzidzi wakupuma,

⁷pontho lekani kumpasa ndzidzi wakupuma mpakana iye akhazikisa Yerusalemu, pontho kuuchitisa kuti dziko yapansi iusimbe.

⁸MBUYA adumbira na pakhosi pache mbapichita na mphamvu zache zonsene. Iye alonga kuti, “Na kutani kwene, ine nkhabeve pereka mapiranu ninga phoso kuna anyamalwanu tayu, pontho na kutani kwene, anyakudza nkhabe kumwave vinyu wachinchino, abulusira imwe kaluma ule tayu;

⁹mbwenye anyakuvuna mapira ndiye anafuna kudya mbakuza MBUYA, pontho anyakutchola mfesa ndiye anafuna kumwa vinyu, mupintalo pya mbuto yanga yakuchena.”

¹⁰Imwe anthu a ku Yerusalemu, bulukani mumzindamo kasasanyireni njira anthu anafuna bwerera ale. Sasanyani, fumbulani msewu ukulu! Bulusani miyala. Imisani bandera m'dzulu ninga chidziwiso kuna madzinza.

¹¹MBUYA alalika mpakana kumadolomero a dziko yapansi kuti, “Longani kuna anthu a ku Zioni kuti, ‘Ngayang'anani, Nyankhombo wanu akudza! Iye akudza na mfupo wache, anthu adapulumusa iye ale.’ ”

¹²Iwo anachemerwa anthu akuchena, anyakuombolwa a MBUYA, iwembo unachemerwa mzinda wapamtima pa Mulungu, mzinda ule hudasiyiwe okha ene tayu.