Read cisena YESAYA 63 Bible Online

YESAYA 63 - cisena bible

YESAYA 63

¹“Mbani weneyu anadza kubulukira ku Edomu, kubulukira ku Bozira na nguwo zache zakukhala na mathotho akufira? Weneyu mbani avala nguwo za demelero, uku akudza wititi[56] na mphamvu zache zonseneyi?” “Ndine pano nyakulonga pyakulungama, pontho nyamphamvu kukwanisa kupulumusa.”

²“Thangwi yache ninji nguwo zako zafira, ninga nguwo za nyakutchitchitha vinyu?

³“Ine ndapondedza madzinza ninga mfesa m'dzenje yakutchitchithira vinyu; kubulukira kuna madzinza nkhabe na mbodzi ene akhali nane tayu. Ine ndidaapondedza thangwi ya kuzhangali kwanga, na ukali wanga ine ndidaaponda-ponda; chiropa chawo chidathomukira nguwo zanga, tenepo pyakuvala pyanga pyonsene pikhali mathotho okhokha.

⁴Thangwi nsiku ikhafuna ine bwezera ile ikhali mumtima mwanga, pontho chaka chikhafuna ine kuombola, chinchino chafika.

⁵Ine ndidamwaza maso, kwache pakhali nkhabe nyakufuna kundiphedza, ndidadodoma kuti pakhali nkhabe nyakufuna kundipasa mphamvu; tenepo ine ndidapichita na mphamvu zanga ndekha, ukali wanga ndiye udandipasa mphamvu.

⁶Na kuzhangali kwanga ine ndidapondereza madzinza; na ukali wanga ine ndidaachitisa kuledzera mbandichuchisa chiropa chawo pansi.”

⁷Ine ndinalonga pya kutifuna kwache kokhonda mala kwa MBUYA, mabasa athema iye kukuzwa nawo, malingana na pyonsene pyatichitira MBUYA; ande, pinthu pizinji pyadidi pyachitira iye dzinza ya Israele, malingana na kuva kwache nyambalo pontho na kukula kwa kuafuna kwache kokhonda mala.

⁸MBUYA adalonga mbati, “Ndimomwene iwo mbanthu anga, ana ale nkhabe khala akunama kuna ine tayu.” Natenepo iye adasanduka Nyankhombo wawo.

⁹Mu kusanyika kwawo konsene iye adasanyikambo nawo pabodzi, tenepo iye ene adaapulumusa, nee mngelo wache tayu. Kudzera mu kuafuna kwache na nsisi zache, iye adaaombola; mbaayang'anira ninga ana kubulukira kale ene.

¹⁰Kwache iwo adapandukira mbatsukwalisa Mzimu wache Wakuchena. Tenepo iye adaasandukira mbakhala nyamalwawo, pontho iye ene adathimbana nawo.

¹¹Tenepo anthu ache adakumbuka pya nsiku zakaleletu, nsiku za Mose na anthu ache, ali kupi munthu adaadzesa kuwambuka nyanza, pabodzi na makabuswa wa mkumbi wache? Ali kupi, ule adaikha Mzimu wache Wakuchena pakati pawo?

¹²Ali kupi, ule na mphamvu zache zikulu adachita pyakudodomesa kudzera muna nyabasache Mose, ule adagawa madzi pamaso pawo, kuti iye atambire chilemedzo kwenda na kwenda,

¹³ule adaachitisa kugwanda na pamadzi akuzwika? Ninga kavalo wakufamba m'thando, iwo hadagwegweduke na pang'ono pene tayu;

¹⁴ninga ng'ombe zakubidira kuphedi, iwo adachitiswa kupuma na Mzimu wa MBUYA. Mwenemu ndi mule mudayang'anira imwe anthu anu, towera dzinanu ilemedzwe.

¹⁵Yang'anani pansi kubulukira kudzuluko mbamuone, kubulukira pa mpando wanu wakuchena waneng'a pontho wademelero. Phinganu pontho mboko zanu pili kupi? Imwe nkhabe kutionesave kutifuna kwanu pontho kutiverave nsisi tayu.

¹⁶Kwache imwe ndimwe Babathu, podi kwene kuti Abrahamu nkhabe kutidziwa tayu, pontho Israele nkhabe kutidzindikira tayu; imwe MBUYA ndimwe Babathu, Dombo wathu kubulukira kale ene ndi dzinanu.

¹⁷Mwatani MBUYA, munatichitisa kubauka kubuluka kuna imwe mbatiumisa mtima kakata, towera tileke kukugopani? Bwererani, thangwi ya anyabasanu, madzinza adasankhula imwe ale.

¹⁸Ndzidzi pang'ono anthu anu adakwata mbuto yakuchena, mbwenye lero anyamalwathu apondedza mbuto yanu yakuchena.

¹⁹Ife tasanduka ninga anthu ale chipo hamudaatonge tayu; ninga ale chipo hadakhale anthu anu tayu.