Read cisena YESAYA 65 Bible Online

YESAYA 65 - cisena bible

YESAYA 65

¹MBUYA adalonga mbati, “Ine ndidapitchulula ndekha ene kuna ale, hadachite kundipempha kuchita tenepo tayu; anthu adandigumana mbale hadandisake-sake ale tayu. Kuna dzinza ile hidachemere tayu dzinanga, ine ndidalonga kuti, ‘Ndili pano, ine ndili pano.’

²Masikati onsene ndidathambidza manjanga kuna anthu akuuma mtima, ale ambafamba m'njira zakupotoka, kukakamira kuchita pinthu pimbanyerezera iwo.

³Anthu ale ndzidzi onsene kwawo nkhunditikana basi maso na maso, kupereka nsembe m'minda yakupambulika,[58] pontho kufukiza pyakununkhira pamaguwa akumangwa na njerwa.

⁴Iwo ambakhala pakati pa nthumbi mbaphuphudza kukhala kumbuto zakubisika; iwo ambadya nyama ya nkhumba, pikalango pyawo mbapidzala na nthuli za nyama zile nsokhonda chena pamaso pa Mulungu.

⁵Tenepo iwo ambalonga kuti, ‘Bulukani pano; lekani fedza chifupi, thangwi ine ndine wakupambulika pyakwanga kuna iwe!’ Anthu ninga enewa akhala ninga utsi m'mphuno mwanga, pontho ninga moto ule umbadokerwa na kugaka.

⁶“Yang'anani, mseru wanu walembwa kale: ine nkhabe khala kwene mulomo phoo tayu, mbwenye ndinati ndibwezere monsene mwene; ine ndinati ndiabwezere

⁷thangwi ya pyakudawa pyawo pabodzi pene na pyakudawa pya makolo awo ene. Ndalonga ndine MBUYA. Na thangwi yakuti iwo adapyereza nsembe pamapiri mbandiswipisa na mabasawo papitunda, ine ndinaatchunyusa mwakuthemerana na mabasawo akale ale.”

⁸MBUYA akulonga kuti, “Ninga montho mumbachitirwa vinyu kugumanwa kubulukira m'tsaputu yamfesa, ninga mumbalongerwa ipyo kuti, ‘Lekani kuzivunga, pana pinthu pyadidi pinadikhira ife,’ ine ndinachita chibodzi-bodzi thangwi ya anyabasanga; ine nkhabe dzamala kuavunga onsenewo tayu.

⁹Ine ndinadzesa pidzukulu kubulukira muna Yakobo, pontho kubulukira muna Yuda pile pinafuna tambira dziko ya mapiri; anthu anga akusankhulika ale anati aitambire, mwenemo ndiye munafuna khala anyabasanga.

¹⁰Sharoni anasanduka mpovu wa pifuyo, pontho Phedi ya Nyatwa inasanduka mbuto yakupumirapo pifuyo; mbuto zenezi zinakhala za anthu anga ambandisaka-saka ale.

¹¹“Mbwenye kulonga pya imwe, mumbakhonda MBUYA ale, mbamuduwalira phiri yanga ya yakuchena,[59] ale pontho mumbapereka pyakudya na vinyu ninga nsembe kuna milungu ya Gadi na Meni, milungu yakudzesa Mwayi na Dzedze,

¹²Ine ndinakuphani kunkhondo, monsenene mbamukotamiswa kuti muchekiwe pakhosi; thangwi ine ndidakuchemerani, kwache imwe nee mundanditawira tayu, ine ndidalonga, kwache imwe nee mudandivesere tayu. Pamaso panga imwe mudachita pyakuipa mbamuchita pyanu pinthu pyokhonda kundikomera.”

¹³Natenepo MBUYA Mulungu akulonga kuti, “Anyabasanga anadya, kwache imwe munakhala na njala; anyabasanga anamwa, kwache imwe munakhala na nyota; anyabasanga anakomerwa, kwache imwe munachitiswa manyadzo.

¹⁴Anyabasanga anaimba nyimbo kuonesa kukomerwa kwa pansi pa mtima, kwache imwe munalira thangwi ya kusanyika mumtima, pontho munakalala thangwi ya kuva kupha mumtima.

¹⁵Madzinanuwo, anthu anga akusankhulika, anaaphatisa basa kutemberera nawo; Ine, MBUYA Mulungu ndinati ndikupheni, mbwenye kuna anyabasanga ndinaapasa dzina yachinchino.

¹⁶Munthu onsene wakupempha mtsanzayiso m'dziko mwenemu, anati apichite kudzera muna Mulungu wakuonadi, ulembo nyakudumbira m'dziko yeneyi anadumbira na dzina ya Mulungu nyakulonga pyakuonadi ule; thangwi nyatwa zakale zile zinaduwalika mbazikhonda oneka pontho pamaso panga.”

¹⁷MBUYA akulonga kuti, “Ngayang'anani ndinati ndilenge kudzulu kwachinchino pontho dziko yapansi yachinchino. Pinthu pyakale pile nkhabe kumbukwave tayu, pontho ipyo pinaduwalikaletu.

¹⁸Mbwenye komerwani pontho sekerani kwenda na kwenda na pinthu pinafuna dzalenga ine, thangwi Yerusalemu ndinamchitisa kukhala wakukomerwa pyakwanga, pontho anthu ache anasekera pikulu pene.

¹⁹Ine ndinakomerwa naye Yerusalemu mbandikomerwa na anthu anga; chiliro na kukalala nkhabe vekamove tayu.

²⁰“Nkhabeve pontho ana kachiya dzafera m'chikuta tayu, penu nkhalamba moyo wache kugwandizira panjira tayu; munthu wakufa uku akwanisa pyaka dzana ibodzi anawerengerwa ninga afa mbali mphale ene pyache; munthu wakufa mbadzati kwanisa pyaka dzana anayeswa ninga nyadzedze.

²¹Iwo anamanga nyumba mbakhalamo; iwo anabzala mfesa mbadya nsapo zache.

²²Iwo nkhabeve kumanga nyumba mbizikhalwa na anthu anango, penu kubzala mbewu mbizidyiwa na anthu anango tayu. Ninga mumbachitira muti kukhala na moyo wakulapha sasawambo na nsiku za moyo wa anthu anga; kwenda na kwenda anthu anga anakomerwa na pinthu pyaphatira iwo basa na manjawo.

²³Iwo nkhabe bulusa kwene kaluma pezi pene, penu kubala ana kuti akhalire kuona nyatwa tayu; thangwi iwo anakhala anyakutsanzayiswa na MBUYA, iwo na pidzukulu pyawo pene pina iwopyo.

²⁴Ine ndinaatawira mbadzati na kundichemera kwene, mwenemo iwo mbali m'kati kulonga, ine ndinava.

²⁵Mibinzi na anabira pinagwedula-gwedula pabodzi pene, pontho nkhalamu zinadya maudzu ninga ng'ombe, kwache nyoka ndiye inafuna khala nyakudya fumbi. Ipyo nkhabe goswa penu kuvunga tayu paphiri panga yakuchena.[60] Ndalonga ndine MBUYA.”