Read cisena YESAYA 66 Bible Online

YESAYA 66 - cisena bible

YESAYA 66

¹MBUYA akulonga kuti, “Kudzulu ndi mpando wanga wachifumu, pontho dziko yapansi mphakusanjikirapo manyalo anga. Ili kupi nyumbache inafuna imwe kundimangirayo? Mbuto yanga yakupumirako inakhala kupi?

²Manjangawa asasanya pinthu pyonsenepi, natenepo ipyo mphyanga. Ndalonga ndine MBUYA. Munthu wache ambakomerwa na ine ngule: nyakupichepesa pontho nyakundigopa, nyakutetemera angava falanga.

³“Mbwenye munthu onsene anapereka nsembe ng'ombe imuna akhala ninga nyakupha munthu mnzache, pontho munthu onsene anapereka nsembe mwanabira akhala ninga nyakukhumula khosi mwanambwa; munthu onsene anapereka pyakupereka pya mapira akhala ninga nyakupereka chiropa cha nkhumba, pontho munthu onsene anafukiza pyakununkhira akhala ninga nyakupembedza mfanikizo. Iwo asankhula kuchita pyawo pyakuakomera, mitimawo ikukomerwa na pyakuipa pinachita iwopyo.

⁴Inembo ndinaphatisa basa njira zavinga pana iwo, ine ndinagwisa pana iwo pinthu pimbagopa iwo. Thangwi ndzidzi udachemera ine, nee mbodzi adanditawira, pontho ndzidzi udalonga ine, nkhabe mbodzi adaikha khutu tayu. Iwo adachita pyakuipa pamaso panga mbasankhula pyawo kuchita pinthu pyokhonda kundikomera.”

⁵Veserani mafala a MBUYA, imwe anyakutetemera na mafalache: “Abale anu ambakuzondani mbakukhethani thangwi ya dzinanga ale, alonga kuti, ‘Demelero mbikhale kuna MBUYA, towera tione kukomerwa kwachita imwe!’ Kwache enewa anachitiswa manyadzo.

⁶Ngavani mumzindamu chimpiningu, ngavani upoko-poko m'Nyumba ya Mulungu! Yeneyo ndi dungu ya MBUYA kubwezera anyamalwache malingana na mabasawo.

⁷“Zioni mbadzati kulekwa, ambabala; iye mbadzati kuva mtswotswo, ambabala mwana wamamuna.

⁸Chipo mbani adatomambo kuva pinthu ninga penepi? Mbani adatoma kuonambo pinthu ninga penepi? Ayi dziko nkhusasanyika nsiku ibodzi, penu dzinza ya anthu nkhubalwa ndzidzi ene ubodzi basi? Kwache sindzidzi zioni nkhuva mtswotswo, iye adabala anache.”

⁹MBUYA akulonga kuti, “Ayi ine ndinafikisa anthu anga ndzidzi wakubala mbandikhonda kuabazika? Ayi ine ndimbafunga nthumbo mwenemo ndikuabazika?

¹⁰Sekerani pabodzi pene na Yerusalemu mbamukomerwe pabodzi naye, monsenene anyakumfuna ale; numpha-numphani naye pabodzi, monsene anyakumsintili ale.

¹¹Thangwi munathondozwa mbamukhuta pamabele pache; munayamwa pyakwanga mbamukomerwa na kuinjipa kwa mkakache.”

¹²Thangwi MBUYA akulonga kuti, “Ine mtendere ndinati ndiufikise kuna iye ninga mkulo, pontho mfuma ya madzinza ninga mkulo wakukuka; imwe munayamwiswa mbamuthukulwa m'manja mwache penu kumululuza pamiyendo pache.

¹³Ninga mumbachitira mama kuthondoza mwanache, sasawambo ine ndinakuthondozani; ndinakuchitisani kukomerwa mu Yerusalemu.

¹⁴Imwe mungaona penepi, mtimanu unakomerwa, mbamukavuka ninga maudzu; mboko za MBUYA zinadziwika kuna anyabasache, mbwenye ukali wache unaonekera pana anyakumzonda.”

¹⁵Yang'anani, MBUYA akudza na moto, pontho pingolo pyache pyakhala ninga chivumbulu; iye anaonesa pakwecha ukali wache, pontho shungu yache ninga malulume a moto.

¹⁶Thangwi na moto pontho na talasadache MBUYA anatchunyusa anthu onsene, pontho anthu ache azinji anaphiwa na MBUYA.

¹⁷MBUYA akulonga kuti, “Anthu ale anapipambula mbapichitisa okha ene kukhala akuchena kwenda kapita m'minda yakupambulika[61] ale, kutewera ule ali pakatiletu pa anthu ale ambadya nyama ya nkhumba na matchiru pontho na pinthu pinango pyakunyansa, onsenewo anafera kubodzi kwene.

¹⁸“Ine ndimbadziwa[62] mabasawo na manyerezero awo, tenepo ine ndili chifupi kudza[63] dzagumanyisa madzinza onsene, na anthu a pilongero pya mtundu onsene, tenepo iwo anabwera mbaona demelero yanga.

¹⁹“Ine ndinaikha chidziwiso pakati pawo, pontho ndinatumiza mbodzi wa anyakufuna dzasalira na moyo pakati pa madzinza ale; a ku Tarisisi, Puti,[64] na Ludi, amuna aluso pakuponya mauta, a ku Tubali na Grisi, pontho na madziko akutali, ale adzati kuva pyakuveka kwanga, penu kuona demelero yanga tayu. Iwo analalika pya demelero yanga pakati pa madzinza.

²⁰Pontho iwo anabwera na abale ako onsene kubulukira kumadzinza onsene kudza nawo kuphiri yanga yakuchena[65] mu Yerusalemu ninga pyakupereka kuna MBUYA; pa akavalo, m'pingolo, na ngolovana pontho na pa anabulu na ngamila. Iwo anabwera nawo, ninga mumbachitira Aisraele kudza na pyakupereka pya mapira ku Nyumba ya Mulungu uku apiikha m'pyombo pyakuchena pamaso pa Mulungu. Ndalonga ndine MBUYA.

²¹Tenepo ine ndinasankhula anango a iwo kukhala anyansembe pontho Alevi. Ndalonga ndine MBUYA.”

²²“Kulonga pya kudzulu kwachinchino na dziko yapansi yachinchino pinafuna ine dzasasanya pile, pinakhala kwenda na kwenda pamaso panga, sasawambo pidzukulu pyanu pontho dzinanu pinakhala pyakukhala na kukhala.

²³Anthu a madzinza onsene anabwera dzandipembedza mu Yerusalemu pamaphwando onsene akusekera kubalwa kwa mwezi, pontho pa Nsiku Zakupuma zonsene. Ndalonga ndine MBUYA.

²⁴Iwo angabuluka anaona mitembo ya anthu adandipandukira ale; kweneko mfunye zakuadya nkhabe dzafa, pontho moto wakuapisa nkhabe dzathima tayu. Iwo anakhala chinthu chakunyansa kuna anthu a madzinza onsene.”