Read cisena YESAYA 7 Bible Online

YESAYA 7 - cisena bible

YESAYA 7

¹Ahazi mwana Yotamu mdzukuluache Uzia, mbali mfumu wa Yuda, Rezini mfumu wa Aramu pabodzi na Peka mwana Remalia mfumu wa Israele, adenda kachita nkhondo na Yerusalemu, kwache iwo hadakwanise kuukunda tayu.

²Pidafika mphangwa kuna ufumu wa Yuda kuti dziko ya Aramu yachita mphatizano na dzinza ya Eferemu,[6] Mfumu Ahazi pabodzi pene na anthu ache adatetemera na mantha ninga mumbachitira miti ya mumsitu kutekenyeka na mphepo.

³Tenepo MBUYA adalonga kuna Yesaya mbati, “Kwata mwanako Sheari-Yashubu[7] muende kagumanikana na Ahazi kumadolomero a mgelo wa madzi wakubulukira kuthawale yakumtunda pamsewu wakwenda ku Munda wa Nyakufula nguwo.

⁴Ukalonge kuna iye kuti achite mphole-mphole, amatame, pontho aleke chita mantha. Aleke taya mtima na ukali wakugoswa wa Rezini na Aaramu pontho na Peka mwana Remalia; nkhuni ziwiri zakupuchirazi.

⁵Aramu, Eferemu na mwana Remalia asasanya pyakukuvunga mbalonga mbati,

⁶‘Tendeni tikachite nkhondo na Yuda; tendeni tikaifudze mbatiigawane pyathu, pontho mbatipitisa mwana Tabele kukhala mfumu wache.’

⁷Kwache MBUYA Mulungu alonga mbati, ‘Penepi nkhabe dzakhalapo tayu, penepi nkhabe chitika tayu.

⁸Podi dziko ya Aramu imbanyindira mzindache ukulu wa Damasiko, pontho Damasiko ambanyindirambo Rezini mfumu wache. Ndzidzi wa pyaka makumatanthatu na pishanu Eferemu anavungwa mwakuti nkhabe dzakhalamove dzinza ya anthu tayu.

⁹Eferemu ambanyindira mzindache ukulu wa Samaria, pontho Samaria ambanyindirambo mwana Remalia. Ngakhala iwe hunaimira nganganga tayu pachikhulupiro chako iwe nkhabe kwanisa kuimisana nawo na pang'ono pene tayu.’ ”

¹⁰MBUYA adalonga pontho kuna Ahazi mbati,

¹¹“Pempha MBUYA Mulungu wako chidzindikiro penu chikhale pyacho chakuzwika ninga dziko ya anyakufa penu chakulapha ninga kuthambo tani.”

¹²Mbwenye Ahazi adalonga mbati, “Ine sinapempha chidzindikirocho tayu; ine nkhabe funa kuyesa MBUYA tayu.”

¹³Tenepo Yesaya adalonga mbati, “Chinchino veserani imwe pidzukulu pya Davite! Ayi kuchitisa anthu kupirira namwe kunachita imweku mudakwane nako tayu? Chinchino munafuna pontho kuchitisa na Mulungu wanga ene kukhonda pirira namwe.

¹⁴Natenepo Mbuya ene mwenechiroache anati akupase chidzindikiro: Mwali anakwata mimba mbabala mwana wamamuna, tenepo anamthula Emanuele.[8]

¹⁵Iye anadya mafuta amkaka na uchi,[9] podi mbadzati dziwa kukhonda chakuipa mbasankhula chadidi.

¹⁶Mbwenye mwanayo mbadzati dziwa kukhonda chakuipa mbasankhula chadidi, dziko ya mafumu awiri anakuthuswaniwo anasanduka madembe.

¹⁷“MBUYA anadzesa pana iwe na pana anthu ako na pana banja ya babako ndzidzi ule chipo hudzati khalapo tayu kutomera ndzidzi udapanduka Eferemu kuna Yuda pinadzesa iye mfumu wa ku Asiria.

¹⁸“Pansiku yeneyo MBUYA anaimba mkhwiyo kuchemera Aiguputo kumikulo yakutali ya Nailo ninga ntchentche, pontho kuchemera Aasiria kudziko yawo ninga nyuchi.

¹⁹Onsenewo anabwera mbakhazikika m'maphedi akulu-akulu, m'nkhwimba zamwala, m'matenthere onsene a minga, pontho na m'michera monsene.

²⁰“Pansiku yeneyo Mbuya anaphatisa basa lezi yakubwerekwa kukhundu inango ya mkulo wa Yufurate, mfumu wa Asiria kuchinga tsisi ya mumsolo mwako, pontho ujoya wa m'miyendo mwako na kupalira ndevu zako.

²¹“Pansiku yeneyo, munthu anakoya kwene mwanamphulu na mbuzi ziwiri zene basi.

²²Na thangwi ya kuinjipa kwa mkaka unafuna dzabulusa iwo, iye anakhala na mafuta amkaka akudya. Onsene anafuna dzasalira m'dzikomo anadya mafuta amkaka na uchi.

²³“Pansiku yeneyo, m'mbuto zonsene mule mukhali mfesa chikwi chibodzi za konta ya masiliva chikwi chibodzi, munamera ntcheswa na nyakhanche ene basi.

²⁴Anthu anaenda kweneko kukhulisa na matswimo na mauta, thangwi dziko yonseneyo inamera ntcheswa na nyakhanche.

²⁵Kulonga pya mapiri ale kale mukhalimwa na phaza mule, imwe nkhabe dzaendakove tayu kugopa ntcheswa na nyakhanche; anasanduka mbuto zakudyeserako ng'ombe na mabira basi.”