Read cisena YESAYA 8 Bible Online

YESAYA 8 - cisena bible

YESAYA 8

¹MBUYA adalonga kuna ine mbati, “Kwata mpukutu ukulu mbulembepo na pilemba pyakuoneka mwadidi[10] kuti: ‘Kusakaza Chamsanga, Kuchimbiza Kuvunga.’

²Tenepo ndidachemera nyansembe Uria, na Zekaria mwana Yeberekia kukhala mboni zanga zakunyindirika.”

³Pidagwanda ndzidzi mkazanga adakwata mimba mbabala mwana wamamuna. Tenepo MBUYA adalonga kuna ine mbati, “Mthule mwanakoyo Kusakaza Chamsanga Kuchimbiza Kuvunga.[11]

⁴Mwanayo mbadzati dziwa kuchemera, ‘Baba penu mama,’ mfuma ya Damasiko na pyakupokosera pya Samaria pinakwatwa na mfumu wa ku Asiria.”

⁵MBUYA adalonga pontho kuna ine mbati,

⁶“Na thangwi yakuti anthu enewa akhonda madzi a mumkhwawa wa Shiloa[12] akufamba pyawo wala-wala mbakomerwa na Rezini pontho na mwana Remalia,

⁷Natenepo Mbuya ali chifupi kudzesa pana iwo madzi makulu a mumkulo wa Yufurate, mfumu wa ku Asiria pabodzi pene na anyankhondo ache onsene. Iwo unatayikira mpakana kumigelo yache yonsene, mbatayikira m'magombe ache onsene

⁸mbakakukulula Yuda, kumphimbira, kugwanda na mwenemo, mbamfika mpakana m'khosi. Anafalikira m'dziko monsene ninga kufuthula kwa maphaphido ache kuiphimbira, iwe Emanuele!”[13]

⁹Imwe madzinza, vekesani mkhuwo wa nkhondo mbamutetemere na mantha. Veserani imwe madziko akutali. Sasanyikirani pyankhondo mbamuchita mantha! Sasanyikirani pyankhondo mbamuchita mantha!

¹⁰Sasanyani njira zakumenyera nkhondo, kwache nkhabe dzakuganyalirani tayu; panganani pyakuchita, kwache ipyo nkhabe dzachitika tayu, thangwi Mulungu ali nafe.

¹¹MBUYA adandiphata na mkono wache wamphamvu mbandicheuza kuti ndileke famba na njira za anthu enewa. Iye adalonga mbati,

¹²“Leka kwata khundu papinthu pimbasasanya anthu enewa, pontho leka gopa pinthu pimbagopa iwo pile, pontho leka goswerwa napyo.

¹³Mbwenye MBUYA Wamphamvu zonsene ndiye athema iwe kumuyesa wakuchena basi, weneyo ndiye athema iwe kumgopa, iye ngule athema iwe kugoswerwa naye.

¹⁴Tenepo iye anakhala mbuto yakupata. Kwache kulonga pya anthu a ku Yuda na a ku Israele, iye anakhala ninga mwala wakugwegwedusa anthu, pontho phanzwi yakuachitisa kugwa. Kulonga pya anthu a ku Yerusalemu, iye anakhala ninga msampha pontho mulindi.

¹⁵Azinji a iwo anagwegweduka; iwo anagwa mbakuwazika iwo anakweshwa na msampha mbaphatwa.”

¹⁶Mangirira mphangwazi mbumyatirire pifunziso penepi pamaso pa anyakufunzanga.

¹⁷Ndinati ndidikhire MBUYA akubisa nkhope yache chinchino ule, kubisira pidzukulu pya Yakobo. Ine ndinanyindira iye ene basi.

¹⁸Ngayang'anani, ine ndili pano pabodzi pene na ana adandipasa MBUYA ale. Ife ndife chidziwiso chakucheuza nacho Aisraele chakubulukira kuna MBUYA Wamphamvu zonsene, ambakhala paphiri ya Zioni ule.

¹⁹Anthu anakupangani kuti muvunze nzeru kuna anyakuombedza na anyakukhumira, ale ambalonga chiwere-were pontho kubwebweta. Ayi penepa anthu hadatheme tayu kuvunza nzeru kuna Mulungu wawo? Thangwi yache ninji iwo ambavunza nzeru kuna anyakufa pya anyamoyo,

²⁰towera akatambireko matongero penu upangizi? Ndimomwene ale ambalonga mafala enewa, muna iwo nkhabemo cheza na pang'ono pene tayu.

²¹Anthu anatsalakatika m'dziko monsene kusanyika na njala. Na thangwi ya njalayo, iwo anapopota mbayang'ana kudzulu kutemberera mfumu wawo pontho Mulungu wawo,

²²penu anayang'ana padziko yapansi, kwache chinafuna iwo dzaona ndi nyatwa zene basi na mdima, mdima wakugoswa. Iwo anaponywa kumdima wa ndiwe ani.