Read cisena YESAYA 9 Bible Online

YESAYA 9 - cisena bible

YESAYA 9

¹Kwache anthu akhaswipa mtima ale, nkhabeve dzataya mtima tayu. Ndzidzi wa mvula zakale Mulungu adalulupisa dziko ya Zebuloni na Nafitali, kwache m'tsogolo muno iye anapasa chilemedzo nthemba yonseneyo, kutomera ku Bara ya Mediterania mpakana kudziko ya kumtunda unango wa Yorodani, penepa nkhulonga dziko ya Galilea, dziko ya anthu okhonda khala Ayuda.

²Anyakufamba mumdima, lero aona cheza chikulu pyakwanga; kuna alembo ambakhala mumthunzi wa imfa, cheza chaamwinikira.

³Imwe MBUYA, mwainjipisa dzinzawo mbamuthimizira kukomerwa kwawo; iwo akusekera pamaso panu ninga anthu kusekera pyakuvuna pyawo, pontho ninga kukomerwa kwa amuna pinagawana iwo pinthu pidapokosera iwo.

⁴Podi imwe mwatchola goli-goli ikhachitisa kufamba kota-kota ile, ndodo zikhamenya kumsana kwawo zile, mtswamu wa anyakuaboneresa ninga pansiku idakunda imwe Amidiani.

⁵Ndimomwene kuti nsapato yonsene ikhaphatiswa basa na anyankhondo, pontho pyakuvala pyawo pyonsene, pidamala vinyizwa-vinyizwa m'chiropa pile, pinapiswa ninga nkhuni zakugasira moto.

⁶Thangwi kuna ife mwana abalwa, kuna ife mwana aperekwa, pontho utongi unakhala m'manja mwache. Iye anachemerwa Phungu wakudodomesa,[14] Mulungu Wamphamvu zonsene, Baba wakwenda na kwenda, pontho Mfumu wa mtendere.

⁷Utongi na mtendere wache pinaenda mbapikula, pontho ipyo nkhabe dzamala tayu. Iye anakhala pampando wachifumu wa Davite, pontho anakhazikisa mbawangisa ufumu wache. Iye anatonga na chilungamo pontho mwakulungama kubulukira ndzidzi wenewo mpakana kwenda na kwenda. Chipapu cha MBUYA Wamphamvu zonsene chinachitisa penepi kuchitika.

⁸MBUYA atumiza mphangwa zakupokanyisana na Yakobo; penepi pinagwera Israele.

⁹Anthu onsene anati adziwe penepi, Dzinza ya Eferemu[15] anthu ambakhala mu Samaria ale, anthu ambalonga mwakutumbama na mwakulunkuma ale mbati,

¹⁰“Njerwa zamala gomoka, kwache ife tinaumanga pontho na miyala yakuchita kucheketezwa; miti yamkuyu yamala gwandwa, kwache ife tinabzalamo miti yamkungudza m'mbuto mwayo.”

¹¹Mbwenye MBUYA apasa mphamvu anyamalwa a Rezini pontho aalamusira anyamalwawo kuti amenyane nawo.

¹²Aaramu akumabulukiro dzuwa pontho Afilisti akumadokero dzuwa ali kukanwa yashaa kufuna kukhudyula Israele. Podi kwene pikhale tenepo, ukali wa MBUYA hudambombowe tayu, pontho mkono wache uli fogo kuatchunyusa basi.

¹³Anthuwo hadabwerere tayu kuna Mulungu, nyakuatinthimula ule, penu kusaka-saka MBUYA Wamphamvu zonsene.

¹⁴Natenepo MBUYA anagwanda msolo wa Israele pabodzi pene na mchirache ene, nthambi zamchindu na mitete pansiku ibodzi ene;

¹⁵msolo ukuimirira akulu-akulu na amuna akuveka; mchira ukuimirira maprofeti ambafunzisa anthu pyakunama ale.

¹⁶Anyakutsogolera anthu enewa aabausa kwenda m'tsanga, pontho anyakuphatwa nsenji ataya njira.

¹⁷Natenepo Mbuya nkhabe dzakomerwave na aphale tayu, penu kuvera nsisi ana masiye na akazi amamfelwa, thangwi onsenewo nkhabe tsalakana pya Mulungu tayu, pontho ngakudawika, mulomo onsene kwache nkhulonga pyakupupwa basi. Podi kwene kuti pikhale tenepo, ukali wa MBUYA hudambombowe tayu, pontho mkono wache uli fogo kuatchunyusa basi.

¹⁸Kudawika kumbagaka ninga moto; kumbapisa ntcheswa na nyakhanche ene, kudawika kumbapisa msitu onsene mwakuti utsi ache umbachita phwira-phwira.

¹⁹Na shungu ya MBUYA Wamphamvu zonsene dziko yapansi inavulika, pontho anthu anakhala nkhuni zache zakugasira moto; nkhabe munthu na mbodzi ene anafuna dzavera mbaleache nsisi tayu.

²⁰Chonsene chakumadyo kwawo iwo anachikhudyula, kwache iwo anava njala basi; chonsene chakumabzere kwawo iwo anachidya, kwache nkhabe dzakhuta tayu. Munthu onsene anadya anache adabala iye;

²¹Manase anadya Eferemu, Eferemu anadyambo Manase; onsene pabodzi pene anapandukira Yuda. Podi kwene kuti pikhale tenepo ukali wa MBUYA hudambombowe tayu, pontho mkono wache uli fogo kuatchunyusa basi.