Read cisena LEVITIKO 1 Bible Online

LEVITIKO 1 - cisena bible

LEVITIKO 1

¹MBUYA adachemera Mose kubulukira m'Chikhumbi cha Mulungu mbampanga

²kulonga kuna Aisraele kuti: Munthu onsene wa imwe angadza na chakupereka chache kuna MBUYA, chakuperekacho chathema kukhala nyama yakubulukira pa mkumbi wache wa ng'ombe, mabira penu mbuzi.

³Ngakhala chakuperekacho ndi ng'ombe kuti ikhale nsembe yakupyerera, iye apereke ng'ombe imuna yakusowa chilema. Iye adze nayo pamsuwo wa Chikhumbi cha Mulungu kuipereka, towera itawirwe na MBUYA.

⁴Iye asanjike manjache pamsolo wa nyama inafuna perekwa nsembe yakupyererayo, tenepo nyama inatawirwa m'mbuto mwache kukhala nsembe yakulekerera pyakudawa pyache.

⁵Iye acheke mwanamphulu wamamuna pamaso pa MBUYA, kubuluka penepo, ana a Aroni, anyansembe ale, adze na chiropa cha nyama ile kuchiwazira m'makhundu onsene a guwa yansembe pamsuwo wa Chikhumbi cha Mulungu.

⁶Iye athema kuisuwa nyamayo na kuigwanda mapindi-mapindi.

⁷Anyansembe athema kusanjika nkhuni mwadidi paguwapo mbaphatisa moto.

⁸Iwo athema kusanjika mwadidi mapindi a nyama ale kuthimizapo msolo, pontho na mafutache ene pankhuni za moto zili paguwa yansembe ile.

⁹Iye athema kutsuka na madzi pya m'mimba na miyendo yache ene ya m'nduli, kubuluka penepo nyansembe athema kuotcha nyama yonsene yamumphuyo paguwa. Yeneyo ndiye nsembe yakupyerera yakusasanywa na moto. Khwemache imbamkomera MBUYA.

¹⁰Ngakhala chakuperekacho ndi bira, penu mbuzi kuti chikhale nsembe yakupyerera, iye athema kupereka imuna yakusowa chilema.

¹¹Iye athema kuichekera kukhundu yakumpoto kwa guwa yansembe pamaso pa MBUYA, kubuluka penepo ana a Aroni, anyansembe, athema kukwata chiropa cha nyamayo kuchiwazira m'makhundu onsene a guwayo.

¹²Iye athema kuigwanda mapindi-mapindi, tenepo nyansembe athema kuisanjika mwadidi pabodzi pene na msolo ene, pontho mafutache, pankhuni za moto paguwa yansembeyo.

¹³Iye athema kutsuka na madzi pya m'mimba pyonsene na miyendo ache ene ya m'nduli, kubuluka penepo, nyansembe athema kudza nayo nyama yonseneyo mbaipisa paguwa yansembe. Yeneyo ndiye nsembe yakupyerera yakusasanywa na moto. Khwemache imbamkomera MBUYA.

¹⁴Ngakhala chakuperekacho ndi mbalame kuti ikhale nsembe yakupyerera, iye athema kupereka jiwa penu nkhangaiwa.

¹⁵Nyansembe athema kudza nayo paguwa yansembe, aipotokole kubulusa msolo wache mbauotcha paguwapo; chiropa chache athema kuchichuchisira m'khundu-khundu mwa guwayo.

¹⁶Iye athema kubulusa chidokhomiro na pya mwenemo mbapitaya kukhundu yakumachibese kwa guwayo, kule kuna dotha.

¹⁷Iye athema kuing'amba pakati pa kuchita kukweya maphaphido, mbwenye mbikhonda khwadzuka, tenepo aipyereze paguwa yansembe. Yeneyo ndi nsembe yakupyerera yakusasanywa na moto. Khwemache imbamkomera MBUYA.