Read cisena LEVITIKO 10 Bible Online

LEVITIKO 10 - cisena bible

LEVITIKO 10

¹Ana achimuna a Aroni, Nadabu na Abihu, adakwata kada munthu chiwaya chache mbaikhamo makala a moto, na kuthimizamo pyakufukiza pyakununkhira mbapipereka kuna MBUYA, mbwenye motowo hukhali wakuchena tayu, thangwi adaatonga kuchita tenepo si MBUYA tayu.

²Penepo MBUYA adatumiza moto mbuapisa pamaso pa MBUYA, tenepo iwo adafa.

³Tenepo Mose adalonga kuna Aroni mbati, “Penepi ndiye pikhalonga MBUYA pya penepi kuti, ‘Onsene anyakunditumikira athema kulemedza kuchena kwanga; ine ndinati ndionese demelero yanga kuna anthu anga.’ ”[1] Mbwenye Aroni adakhala pyache mulomo phoo.

⁴Mose adachemera Mishaele na Elizafani ana a Uziele, mbuyache Aroni mbalonga kuna iwo mbati, “Idzani kuno muthukule mitembo ya abale anu kuabulusa pa Chikumbi chakuchena cha MBUYA, pontho mukaaikhe kunja kwa msasa.”

⁵Tenepo iwo adadza mbaathukula uku avala mikhanjo yawo, kwenda nawo kunja kwa msasa ninga montho mukhadaapangira Mose.

⁶Mose adalonga kuna Aroni na anache Eleazara na Itamara mbati, “Lekani khala okhonda sapula tsisi yanu, penu kung'amba nguwo zanu kuonesa kusintili kwanu. Mungapichita penepi, munati mufe, pontho MBUYA anazhangalira dzinza yonsene. Mbwenye Aisraele anzanu onsene akutawiriswa kulira imfa yeneyi yakuchitika na thangwi ya moto udatumiza MBUYA ule.

⁷Lekani kubuluka pamsuwo wa Chikhumbi cha Mulungu gopesera munafa, thangwi imwe mwapambulwa pakuchita kudzozwa na mafuta a MBUYA.” Tenepo iwo adachita ninga mudalongera Mose.

⁸MBUYA adalonga kuna Aroni mbati,

⁹“Iwe na anako nee mukutawiriswa kumwa vinyu penu bwadwa tayu, mungapita m'Chikhumbi changa; mungachita tenepo munati mufe. Mwambo wenewu wathema kukoyiwa na pidzukulu pyako mifendu yonsene inadzayo.

¹⁰Iwe wathema kusiyanisa pakati pa chinthu cha Mulungu na chinthu cha anthu onsene, pakati pa chinthu chakuchena na chinthu chokhonda chena.

¹¹Iwe wathema kufunzisa Aisraele mwambo onsene wakupasa ine kudzera muna Mose.”

¹²Mose adalonga kuna Aroni na anache adasalira awiri ale Eleazara na Itamara mbati, “Kwata chakupereka cha mapira chidasalira pa nsembe yakusasanywa na moto yakuperekwa kuna MBUYA ile, sasanyani mkate wakusowa chakufufumisira na ufa wenewo mbumuudyera chifupi na guwa yansembe, thangwi nsembe yeneyi njakuchena pyakwanga.

¹³Muudyere m'mbuto yakupambulika; yeneyi ndi khundu yanumbo pabodzi na ananu kubulukira pa nsembe yakusasanywa na moto yakuperekwa kuna MBUYA. Penepi ndiye pidandipanga MBUYA.

¹⁴Mbwenye imwe na mabanjanu munakwanisa kudya chidali na mwendo wakunduli, ule mudaperekwa ninga mtukwa wakupambulika kuna MBUYA kuti ukhale wa anyansembe. Munakwanisa kupidya pambuto yonsene yakupambulika. Penepi mphyakuperekwa kuna imwe na ananu ninga khundu yanu pa nsembe zachiphatizano zidapereka Aisraele.

¹⁵Iwo athema kudza na mwendo wakunduli na chidali pandzidzi unaperekwa mafuta ninga nsembe yakusasanywa na moto yakuperekwa kuna MBUYA. Makhundu enewa nganu na ananu ndzidzi onsene ninga mudalongera MBUYA.”

¹⁶Mose adavunza pya mbuzi ya nsembe yakulekerera pyakudawa mbagumana kuti ikhadaotchiwa kale. Penepi pidamchitisa Mose kuzhangalira Eleazara na Itamara, natenepo iye adavunza mbati,

¹⁷“Thangwi yache ninji mwakhonda kudyera nsembe yakulekerera pyakudawayo pambuto yakupambulika? Yeneyo njakuchena pyakwanga, pontho MBUYA aipereka kuna imwe, towera abuluse pyakudawa pya dzinza yonsene.

¹⁸Podi chiropa chache nee chidadzeswe m'mbuto yakupambulika tayu, nyamayo mbamudaidyera pyanu monthomo ninga mudakupangirani ine.”

¹⁹Aroni adatawira mbati, “Ayi mbidadya nsembe yakulekerera pyakudawa lero, MBUYA mbadaitawira? Anthu apereka nsembe zakulekerera pyakudawa, pontho na nsembe zakupyerera lero, kwache pinthu ninga penepi pyandichitikira.”

²⁰Pidava Mose penepi, adakhutira napyo.