Read cisena LEVITIKO 11 Bible Online

LEVITIKO 11 - cisena bible

LEVITIKO 11

¹MBUYA adapanga Mose na Aroni kulonga kuna Aisraele kuti:

²Imwe munakwanisa kudya nyama zonsene za pamtunda

³zakugawanikana njondo, pontho na zakulukula,

⁴mbwenye lekani kudya ngamila, mbira na sulo. Nyama zenezi mwathema kuziyesa zokhonda chena; izo zimbalukula, mbwenye njondo zawo nsokhonda gawanikana.

⁷Lekani kudya nkhumba. Mwathema kuziyesa zokhonda chena; izo nsakugawanikana njondo, mbwenye nee zimbalukulabi.

⁸Lekani kudya nyama zenezi, penu kukhuya manungo awo ene zingafa, thangwi nsokhonda chena.

⁹Nsomba zonsene zakukhala na chitoto pontho na mabade, imwe munakwanisa kudya,

¹⁰mbwenye nyama zonsene za m'madzi zokhonda khala na chitoto na mabade, lekani kuzidya.

¹¹Nyama ninga zenezi mwathema kuziyesa zokhonda chena pamaso pa Mulungu. Lekani kuzidya penu kukhuya manungo awo ene zingafa.

¹²Lekani kudya chinthu chonsene cha m'madzi chokhonda khala na chitoto na mabade.

¹³Lekani kudya mbalame izi: mphamba, dzidzi, gokomola, nyakasenera, matangwe, malezi, khungubwe, mphuwani, nkhukumadzi, magoti, chidokowe, vuwo-vuwo, mphipi, nyachigoti penu anyakalemwalemwa.[2]

²⁰Pirombo ping'ono-ping'ono pyakukhala na manthenga pyakukambadza mphyokhonda chena,

²¹kupambula pile pyakuchita kunumpha.

²²Imwe munakwanisa kudya nyadzombe, ntchonjolokoto na ntchobwa.

²³Mbwenye pirombo pinango ping'ono-ping'ono pyonsene pyakukhala na manthenga, pontho pyakuchita kukambadza mwathema kupiyesa pyokhonda chena.

²⁴Munthu onsene anakhuya manungo a nyama zakufa zili m'tchindemu anakhala okhonda chena mpakana mawulo: nyama zonsene zakukhala na njondo, kupambula zile zina njondo zakugawanikana, pontho zakulukula pabodzi pene na nyama zonsene za miyendo minayi zakukhala na ngole. Munthu onsene anathukula manungo a nyama zakufazo afule nguwo zache, kwache iye anakhala okhonda chena mpakana mawulo.

²⁹Kalikongwe, mbewa, godwa, tokhwe, mphenembe, nyankalibunyu, chiligwankhwa na nyakatendewa mwathema kupiyesa pyokhonda chena.

³¹Munthu onsene anakhuya manungo awo akufa anakhala okhonda chena basi mpakana mawulo.

³²Pontho ngakhala manungo akufawo agwera pachinthu chinango, chinthucho chinakhala chokhonda chena. Penu ndi muti, nguwo, nthembe, sakha, nkhabe pinthu kuti chikuphatiswa basa yanji, chenecho chinatsukwa na madzi, mbwenye chinakhala chokhonda chena basi mpakana mawulo.

³³Ngakhala manungo awo anagwera m'chikalango, pinthu pyonsene pili m'chikalangomo mphyokhonda chena; tenepo chikalangocho mwathema kuchiswa.

³⁴Ngakhala madzi a m'chikalangocho agwera pachinthu chonsene chakuthema kudyiwa, chinthucho ntchokhonda chena; pontho chinthu chonsene chakumwiwa m'chikalango ninga chenechi chiyeswe chokhonda chena.

³⁵Chinthu chonsene chakugwerwa na manungo akufa a nyama zenezi ntchokhonda chena, penu ndi chitofu cha dongo, penu mphendekali; pyonsenepyo pyathema kuswiwa. Ipyo mphyokhonda chena, tenepo imwe mwathema kupiyesa pyokhonda chena.

³⁶Mbwenye mphuno ya madzi, penu pyakukoyeramo madzi pikulu-pikulu pinathimiza kukhala pyakuchena, podi kwene kuti onsene anakhuya manungo enewo anakhala okhonda chena.

³⁷Ngakhala manungo abodzi agwera pa mbewu yakufuna kubzaliwa, mbewu yeneyo inathimiza kukhala yakuchena.

³⁸Mbwenye ngakhala mbewuyo yavikwa m'madzi, tenepo manungo abodzi agwera mwenemo, mbewuyo inakhala yokhonda chena.

³⁹Ngakhala nyama yakuthema kudyiwa inafa yokha, munthu onsene anaikhuyayo anakhala okhonda chena mpakana mawulo.

⁴⁰Ngakhala munthu anadya phindi ya nyama yeneyi, iye afule nguwo zache, mbwenye anakhala okhonda chena basi mpakana mawulo; munthu onsene anathukula chakufayo athema kufula nguwo zache, kwache anakhala okhonda chena basi mpakana mawulo.

⁴¹Lekani kudya pyakulengwa pyonsene ping'ono-ping'ono pyakukambadza,

⁴²penu pyakuchita kupsenda na mimba, penu kufamba na miyendo minayi penu mizinji.

⁴³Lekani kupiswipisa mwekha ene pakudya penepi.

⁴⁴Ine ndine MBUYA Mulungu wanu, natenepo imwe mwathema kupikoya mwekha ene akuchena, thangwi ine ndine wakuchena.

⁴⁵Ine ndine MBUYA, adakubulusani m'dziko ya Iguputo ule, towera ndikhale Mulungu wanu. Mukhale akuchena thangwi ine ndine wakuchena.

⁴⁶Wenewu ndiye mwambo wa pya nyama, mbalame, na pyonsene pyakukhala m'madzi na kumtunda kwene.

⁴⁷Mwathema kusiyanisa pakati pa kuchena na kukhonda chena pamaso pa Mulungu, pontho na pakati pa nyama zakuthema kudyiwa na nyama zokhonda thema kudyiwa.