Read cisena LEVITIKO 12 Bible Online

LEVITIKO 12 - cisena bible

LEVITIKO 12

¹MBUYA adatonga Mose kupanga Aisraele kuti:

²Ngakhala mkazi anakwata mimba mbabala mwana wamamuna, iye ngokhonda chena pamaso pa Mulungu nsiku zinomwe ninga mumbakhalira iye nsiku zache zakumwezi.

³Pansiku yachisere, mwanayo athema kugwandwa nsonga yachimuna.

⁴Kubuluka penepo mkaziyo anadikhira nsiku zinango makumatatu na zitatu kuti acheneswe, thangwi ya kutaya kwache chiropa. Iye aleke khuya chinthu chakuchena, penu kupita m' Chikhumbi cha Mulungu mpakana nsiku za kucheneswe kwache zimale.

⁵Ngakhala mkazi anabala mwana wamkazi, iye ngokhonda chena nsiku khumi na zinayi ninga mumbachitira iye pansiku zache zakumwezi. Kubuluka penepo mkaziyo anadikhira pontho nsiku zinango makumatanthatu na zitanthatu kuti acheneswe, thangwi ya kutaya kwache chiropa.

⁶Ndzidzi wakucheneswa kwa mkaziyo ungamala, penu mwanayo ngwa mamuna penu ngwa mkazi, nyakubalayo adze kuna nyansembe pamsuwo wa Chikhumbi cha Mulungu na mwanabira wakukwanisa chaka chibodzi kuti akhale nsembe yakupyerera, pontho na nkhangaiwa penu jiwa kuti akhale nsembe yakulekerera pyakudawa.

⁷Nyansembe anapereka nsembe za mkaziyo kuna MBUYA kuchita mwambo wakupichenesa nawo kumbulusira kukhonda chena kwache konsene, thangwi ya kutaya kwache chiropa, tenepo anakhala wakuchena pamaso pa Mulungu. Penepi ndiye pyathema kuchita mkazi angabala.

⁸Ngakhala mkaziyo ndi mtcherengi mwakuti hanakwanisa kugumana mwanabira tayu, iye adze na majiwa mawiri, penu nkhangaiwa ziwiri, ibodziyo kuti ikhale nsembe yakupyerera, inangoyo kuti ikhale nsembe yakulekerera pyakudawa. Nyansembe anachita mwambo wakumchenesa kumbulusira kukhonda chena kwache konsene, tenepo iye anakhala wakuchena pamaso pa Mulungu.