Read cisena LEVITIKO 13 Bible Online

LEVITIKO 13 - cisena bible

LEVITIKO 13

²Ngakhala munthu ana chitupira, nyakadumu, penu chisungu pamanungo pache, chile chinakwanisa kusanduka utenda wakugoswa pamanungo, adzeswe kuna Aroni, penu mbodzi wa anyansembe.

³Nyansembe aone mwadidi pabuluka utendawo. Ngakhala ubweya wa penepo wasanduka wakuchena, pontho chironda chazwika kupiringana khanda yakuzungulira penepo, wenewo ngutenda wakugoswa, tenepo nyansembe alonge kuti munthuyo ngokhonda chena.

⁴Mbwenye ngakhala chirondacho chikuoneka kutuwa, pontho nee zwika kupiringana khanda yakuzungulira penepo tayu, pontho kuti ujoya wa penepo hudasanduke wakuchena tayu, nyansembe ampambule munthu weneyo kumuikha payekha ene nsiku zinomwe.

⁵Pansiku yachinomweyo nyansembe anamuona pontho mwadidi, tenepo ngakhala iye anaona kuti chironda chile nee chakula tayu, kwache chikuoneka sasawa ninga montho mwakale, iye ampambule pontho kumuikha payekha ene nsiku zinango zinomwe.

⁶Nyansembe anamuona pontho mwadidi pansiku yachinomwe, tenepo ngakhala chironda chile chikupola, kwache nee kukulabi, iye athema kulonga kuti munthuyo ngwakuchena pamaso pa Mulungu; ntchironda chene pyacho. Munthuyo afule nguwo zache mbakhaladi wakuchena.

⁷Mbwenye ngakhala chironda chile chikufukusira uku nyansembe amuona kale mwadidi, pontho iye alonga kale kuti ngwakuchena, iye athema aonekera pontho pamaso pa nyansembe.

⁸Nyansembe anamuona pontho mwadidi, tenepo ngakhala chironda chakuladi, nyansembe alonge kuti ngokhonda chena. Wenewo ngutenda wakugoswa.

⁹Ngakhala unango ana utenda wakugoswa wa pamanungo athema kudzeswa kuna nyansembe;

¹⁰nyansembeyo amuone mwadidi munthuyo. Ngakhala pamanungo pache pana chironda chakutuwa pontho chachitisa kuti ujoya wa penepo usanduke wakuchena, pontho pachirondapo padzala na mafinya,

¹¹wenewo ngutenda wakufalikira wa pamanungo. Nyansembe alonge kuti munthuyo ngokhonda chena; pontho aleke kupambulwa mbaikhwa payekha ene thangwi iye ngokhonda chena na kale ene.

¹²Ngakhala utenda wa pamanungowo unafalikira manungo onsene kutomera kumiyendo kufikirana kumsolo,

¹³nyansembe amuone pontho mwadidi munthu ule. Angagumana kuti utenda ale wafalikiradi manungo onsene, iye alonge kuti munthuyo ngwakuchena pamaso pa Mulungu. Ngakhala manungo ache onsene asanduka akutuwa, iye ngwakuchena basi.

¹⁴Mbwenye sindzidzi pironda nkhuoneka iye ngokhonda chena.

¹⁵Nyansembe amuone pontho mwadidi, tenepo ngakhala iye anapionadi pirondapyo alonge kuti ngokhonda chena. Chirondacho nkhuonesa kuti munthuyo ana utenda wakugoswa wa pamanungo, natenepo ngokhonda chena.

¹⁶Mbwenye pironda pile pingapola mbipikhala pontho pyakutuwa, munthu weneyo aende kuna nyansembe,

¹⁷towera akamuone pontho mwadidi. Ngakhala chirondacho chasanduka chakutuwa, iye ngwakuchena, pontho nyansembe amulonge kuti ngwakuchena.

¹⁸Ngakhala unango ana chisungu chakupola kale,

¹⁹pontho ngakhala m'nduli mwache chironda chakutuwa, penu chakufira chaoneka pakhali chisungu pale, iye aende kuna nyansembe.

²⁰Nyansembe amuone mwadidi, tenepo ngakhala chironda ntchikulu, penu chazwika kupiringana khanda yakuzungulira ya penepo, pontho ujoyache wasanduka wakuchena, weneyo amulonge kuti ngokhonda chena. Wenewo ngutenda wakugoswa wa pamanungo watoma pachisungu pale.

²¹Mbwenye nyansembe angamuona mwadidi mbagumana kuti ujoya nee wasanduka wakuchena tayu, pontho kuti chironda nee chazwika kupiringana khanda yakuzungulira penepo tayu, mbwenye ntchakuchenerera, nyansembe ampambule kumuikha payekha ene nsiku zinomwe.

²²Ngakhala chironda chinathimizika, nyansembe alonge kuti munthuyo ngokhonda chena; ana utenda.

²³Mbwenye chingakhala tenepo ene nee kukulabi, yasalira ndi dazwi ene basi ya chisungucho, nyansembe alonge kuti ngwakuchena pamaso pa Mulungu.

²⁴Ngakhala munthu apisika na moto, chironda chachewo chingasanduka chakutuwa, penu chakufirira,

²⁵nyansembe amuone mwadidi. Ngakhala ujoya wa pachirondapo wasanduka wakuchena, pontho chazwika kupiringana khanda yakuzungulira penepo, wenewo ngutenda wakugoswa wa pamanungo watoma padapya pale, natenepo nyansembe alonge kuti munthuyo ngokhonda chena.

²⁶Mbwenye ngakhala ujoya wa pachirondapo hudasanduke wakuchena tayu, pontho kuti chirondacho nee chazwika kupiringana khanda yakuzungulira penepo tayu, mbwenye kuti ntchakuchenerera, nyansembe ampambule kumuikha payekha ene nsiku zinomwe.

²⁷Pansiku yachinomweyo nyansembe amuone pontho mwadidi munthu ule, tenepo angagumana kuti chikuthimiza kukula, wenewo ngutenda wakugoswa wa pamanungo, natenepo nyansembe alonge kuti munthuyo ngokhonda chena.

²⁸Mbwenye chingakhala tenepo ene nee kukulabi, pontho ujoyache ngwakuchenerera, wenewo nee ngutenda wakugoswa wa pamanungo tayu. Nyansembe alonge kuti munthuyo ngwakuchena, thangwi ndi madazwi ene a moto.

²⁹Ngakhala mamuna penu mkazi ana chironda mumsolo, penu pachidevu,

³⁰nyansembe amuone mwadidi. Ngakhala chinaoneka chakuzwika kupiringana khanda yakuzungulira penepo, pontho tsisi ya penepo ikuoneka yakhare, pontho yakunyangutika, wenewo ngutenda wakugoswa wa pamanungo, natenepo nyansembe alonge kuti munthuyo ngokhonda chena.

³¹Ngakhala nyansembeyo anamuona mwadidi mbagumana kuti chironda nee chazwika kupiringana khanda yakuzungulira penepo tayu, mbwenye ngakhala tsisi ya penepo njakunyangutika basi, iye ampambule akhale pachembo nsiku zinomwe.

³²Pansiku yachinomwe nyansembe amuone pontho mwadidi, tenepo ngakhala chirondacho chidakule tayu, pontho nkhabepo tsisi yakhare, pontho nkhabe oneka kuti chazwika kupiringana khanda yakuzungulira penepo tayu,

³³munthuyo achinge yache yonsene kupambula pana chirondapo. Nyansembe ampambule pontho nsiku zinango zinomwe.

³⁴Pansiku yachinomwe nyansembe achione pontho mwadidi chirondacho, tenepo ngakhala chidakule tayu, pontho chidazwika kupiringana khanda yakuzungulira penepo tayu, nyansembe alonge kuti munthuyo ngwakuchena pamaso pa Mulungu. Munthuyo afule nguwo zache, natenepo anakhala wakuchena.

³⁵Mbwenye ngakhala chirondacho chinakula uku alongwa kale kuti ngwakuchena,

³⁶nyansembe amuone pontho mwadidi, tenepo ngakhala chirondacho chinakula, iye nkhabe funika pontho kuti aone mwadidi tsisi ngakhala njakhare tayu; munthuyo ngokhonda chena.

³⁷Mbwenye ngakhala nyansembe aone kuti chirondacho nee chakula tayu, pontho kuti tsisi yadidi ikukula penepo, chirondacho chapola, tenepo nyansembe alonge kuti munthuyo ngwakuchena.

³⁸Ngakhala mkazi penu mamuna ana chipere pakhandache,

³⁹nyansembe amuone mwadidi. Ngakhala chiperecho ntchakuchenerera, yeneyo ndi thukuzwa ene yabuluka penepoyo; munthuyo ngwakuchena pamaso pa Mulungu.

⁴⁰Ngakhala munthu anamera mphanja kunkhodolo penu kuchipumu, penepyo nkhabe kumchitisa kuti akhale okhonda chena tayu.

⁴¹

⁴²Mbwenye ngakhala chironda chakufirira chinaoneka pamphanjapo, wenewo ngutenda wakugoswa wa pamanungo.

⁴³Nyansembe amuone mwadidi, tenepo ngakhala ntchironda chakufirira,

⁴⁴nyansembe alonge kuti munthuyo ngokhonda chena, thangwi ya utenda wakugoswa uli mumsolo mwachewo.

⁴⁵Munthu wakukhala na utenda wakugoswa wa pamanungo athema kuvala nguwo zakung'ambika-ng'ambika, aleke sapula tsisiache, abise pansi nkhope yache, pontho alonge mwakugaluza fala mbati, “Nyakukhonda chena, nyakukhonda chena!”

⁴⁶Iye akhale okhonda chena ndzidzi onsene unakhala iye na utendawo, pontho athema kukhala kwa yekha ene kunja kwa msasa.

⁴⁷Ngakhala chikukuyi[3] chaphata chakuvala, penu ntchaubweya penu ntchathonje,

⁴⁸penu kaphindi kene ka nguwo yathonje penu yaubweya penu yanthembe, penu chinthu chonsene chakusasanywa na nthembe,

⁴⁹ngakhala ntcha tsamba yamfigu, penu ntchakufirira, chenecho ntchikukuyi, natenepo chathema kuoneswa kuna nyansembe.

⁵⁰Nyansembe anachiona mwadidi mbachiikha pachokha chene nsiku zinomwe.

⁵¹Pansiku yachinomwe iye anachiona pontho mwadidi, tenepo ngakhala chikukuyi chile chafalikira, chinthucho ntchokhonda chena.

⁵²Nyansembe achipise pamoto, thangwi ntchakuchitisa kuti chikukuyi chifalikire, tenepo icho chathema kuvungwa na moto.

⁵³Mbwenye angachiona pontho mwadidi mbagumana kuti chikukuyi chile nee chafalikira panguwo ile tayu,

⁵⁴anatonga kuti ifuliwe, kubuluka penepo anachiikha pontho pachokha chene nsiku zinango zinomwe.

⁵⁵Tenepo pansiku yachinomwe anachiona pontho mwadidi, tenepo ngakhala chikukuyi nee chidaoneka na makhaliro anango tayu, podi kwene kuti nee chikufalikirabi, chinthucho ntchokhonda chena basi, imwe mwathema kuchipisa penu pavungikapo nkhunduli penu nkhunkhope.

⁵⁶Mbwenye nyansembe angachiona pontho mwadidi mbagumana kuti chikukuyi chile chamala, iye athema kung'amba penepo, penu mphanguwo, penu mphanthembe.

⁵⁷Tenepo ngakhala chikukuyi chile chinaoneka chikufalikira pontho, tenepo mwenechiro chinthucho achipise.

⁵⁸Ngakhala anachifula chinthucho, chikukuyi mbichikhonda oneka pontho, iye athema kuchifula pontho, penepo chinakhala chakuchena pamaso pa Mulungu.

⁵⁹Wenewu ndiye mwambo wa chikukuyi chakukhala pachakuvala, penu ntchaubweya penu ntchathonje, penu paphidzo ya nguwo yaubweya penu yathonje, penu chinthu chonsene chakusasanywa na nthembe. Mwenemu ndiye mumbatongerwa ipyo ngakhala chinthu ntchakuchena, penu ntchokhonda chena pamaso pa Mulungu.