Read cisena LEVITIKO 14 Bible Online

LEVITIKO 14 - cisena bible

LEVITIKO 14

²“Ufu ndi mwambo wakucheneswa kwa munthu angawanga utendache wakugoswa wa pamanungo. Pansiku inalongwa iye kuti ngwakuchena, anthu adze naye kuna nyansembe.

³Tenepo nyansembe anamkwata mbaenda naye kunja kwa msasa kamuona mwadidi. Ngakhala utendawo wawangadi,

⁴nyansembe anatonga kuti mbalame ziwiri zakuchena pamaso pa Mulungu zidzeswe pabodzi pene na nkhuni zamkungudza, nkhambala yakufira na hisope.

⁵Tenepo nyansembe atonge kuti mbalame ibodzi ichekerwe m'chikalango chakukhala na madzi adidi a pamphuno ya madzi.

⁶Nyansembeyo akwate mbalame inangoyo na nkhuni zamkungudza, nkhambala yakufira na hisope, apivike pabodzi na mbalame yamoyo ile m'chiropa cha mbalame idachekwa ile padzulu pa madzi adidi a pamphuno ya madzi ile.

⁷Tenepo nyansembeyo awaze chiropa kanomwe kuna munthu athema kucheneswa kuna utenda wakugoswa wa pamanungo ule, tenepo analongwa kuti ngwakuchena. Kubuluka penepo iye aleke mbalame yamoyo ile kwenda pyayo kumbulukira kuminda.

⁸Munthu wakufuna kucheneswayo ufule nguwo zache, achinge tsisi yache, asambe manungo ache, tenepo iye anakhala wakuchena pamaso pa Mulungu. Iye aende mumsasa, kwache akagone kunja kwa khumbi yacheyo nsiku zinomwe.

⁹Pansiku yachinomwe achinge pontho tsisi yache, ndevu zache, ntchiye zache na tsisi yonsene ya m'manungo mwache. Iye afule pontho nguwo zache, asambe manungo ache, natenepo iye anakhala wakuchena pamaso pa Mulungu.

¹⁰“Pansiku yachisere iye adze na mabira awiri achimuna na bira wamkazi akukwanisa chaka chibodzi pontho akusowa chilema, ufa wakuvungazwa na mafuta aolivi, na theka ya tugwe[4] wa mafuta aolivi.

¹¹Nyansembe akwate munthu ule pabodzi pene na pyakupereka pyache kwenda naye pamsuwo pa Chikhumbi cha Mulungu.

¹²Tenepo nyansembe anakwata bira mbodzi wamamuna pabodzi pene na theka ya tugwe ya mafuta ale mbapipereka ninga nsembe yakupagalira pyakudawa. Iye anapipereka ninga mtukwa wakupambulika pyakwanga kuna MBUYA kuti pikhale pya nyansembeyo.

¹³Birayo anamchekera pambuto yakupambulika, kule kumbachekerwa nyama za nsembe yakulekerera pyakudawa, pontho na nsembe yakupyerera, pyonsene pimbakhala pya nyansembe, pontho mphyakuchena pyakwanga.

¹⁴Nyansembe anakwata chiropa pang'ono cha nsembe yakupagalira pyakudawa mbachitswinga kukhutu yamadyo ya munthu anafuna kucheneswa ule, pachala chikulu cha dzanjache yamadyo na pachala chache chikulu cha dzinyalo yache yamadyo.

¹⁵Nyansembe anakwata mafuta aolivi pang'ono mbaaikha pathavu yache ene yamabzere,

¹⁶mbavika mwenemo na chala chache chamadyo mbawaza pang'ono penepo mafuta ale kanomwe pamaso pa MBUYA.

¹⁷Iye anakwata pontho mafuta ali pathavu pache pale na chiropa cha nyama ile mbapitswinga kukhutu yamadyo ya munthu ule, pachala chikulu cha dzanjache yamadyo, na pachala chache chikulu cha dzinyalo yache yamadyo ya munthu anafuna kucheneswa ule.

¹⁸Mafuta akusalira m'thavu ya nyansembe ale athema kuikhwa mumsolo wa munthu wakufuna kucheneswa ule. Na njira yeneyi anachita mwambo wakumchenesa nawo.

¹⁹“Nyansembe athema kupereka nsembe yakulekerera pyakudawa pontho kuchita mwambo wakupichenesa. Angamala penepo aphe nyama kukhala nsembe yakupyerera,

²⁰pontho aipereke pabodzi na chakupereka cha mapira paguwa yansembe. Na njira yeneyi nyansembe anachita mwambo wakumchenesa, natenepo munthuyo anakhala wakuchenadi pamaso pa Mulungu.

²¹“Ngakhala munthu ngwakutcherenga mwakuti hanakwanisa kugumana pinthu penepi tayu, iye adze na bira mbodzi wamamuna kuchitira mwambo wakumchenesa nawo. Birayo anakhala ninga nsembe yakupagalira pyakudawa, mtukwa wakupambulika kuna MBUYA kuti pikhale pya nyansembe. Iye adze na ufa wakulemera kilogramu ibodzi wakuvungazwa na mafuta aolivi kuti ikhale chakupereka cha mapira, pontho na theka ya tugwe ya mafuta.

²²Iye adze pontho na majiwa mawiri, penu nkhangaiwa ziwiri, ibodzi kuti ikhale nsembe yakulekerera pyakudawa, inango kuti ikhale nsembe yakupyerera.

²³Pansiku yachisere ya kucheneswa kwache iye adze napyo penepi kuna nyansembe pamaso pa MBUYA pamsuwo wa Chikhumbi cha Mulungu.

²⁴Nyansembe akwate bira ule na mafuta aolivi ale mbapipereka ninga mtukwa wakupambulika kuna MBUYA kuti pikhale pya nyansembe.

²⁵Iye acheke bira ule, pontho akwate chiropa pang'ono kuchitswinga kukhutu yamadyo ya munthu ule, pachala chikulu cha dzanjache yamadyo, na pachala chache chikulu cha dzinyalo yache yamadyo.

²⁶Nyansembe aikhe pathavu pache yamabzere mafuta aolivi ale pang'ono,

²⁷tenepo na chala chache chamadyo, iye aawaze kanomwe pamaso pa MBUYA,

²⁸Iye aikhe pontho mafuta aolivi m'mbuto zontho zidaikha iye kale chiropa zile; kukhutu yamadyo ya munthu ule, pachala chikulu cha dzanjache yamadyo, na pachala chache chikulu cha dzinyalo yache yamadyo.

²⁹Iye athema kuikha mafuta onsene akusalira m'thavu mwache mumsolo wa munthu ule, tenepo na njira yeneyi achite mwambo wakumchenesa.

³⁰Kubuluka penepo anakwanisa kupereka ibodzi pakati pa nkhangaiwa penu jiwa

³¹kukhala nsembe yakulekerera pyakudawa, inangoyo kukhala nsembe yakupyerera pabodzi pene na chakupereka cha mapira. Na njira yeneyi nyansembe anachita mwambo wakumchenesa pamaso pa Mulungu.

³²Wenewu ndiye mwambo wakucheneswa kwa munthu wakukhala na utenda wakugoswa wa pamanungo, ule ngwakutcherenga mwakuti hanakwanisa kupereka pyakundendemera na kucheneswa kwache.”

³³MBUYA adalonga kuna Mose na Aroni mbati,

³⁴“Mungafika m'dziko ya Kanani inafuna ine kukupasani kuti ikhale yanu ene, mbamugumana kuti m'nyumbamo ndaikhamo chikukuyi,

³⁵mwenechiro nyumbayo athema kapanga nyansembe pya chikukuyicho.

³⁶Tenepo nyansembe ampange munthuyo kuti pyonsene pya m'nyumbamo pibuluswe, iye mbadzati pitamo kaona mwadidi chikukuyi, gopesera pyonsene pya m'nyumbamo pinalongwa kuti mphyokhonda chena. Angachita tenepo nyansembe apite m'nyumbamo kaiona mwadidi;

³⁷tenepo angagumana kuti muna madamba akufira na tsamba amfigu, pontho kuti madambawo akunyenyena mafufu a nyumbayo;

³⁸nyansembe abulukemo m'nyumbamo mbafunga mwadidi msuwo wa nyumbayo mpakana nsiku zinomwe.

³⁹Pansiku yachinomwe nyansembe adze dzaiona pontho mwadidi nyumbayo. Angagumana kuti chikukuyi chikwenda mbichikula pafufu pale,

⁴⁰atonge anthu kuti miyala yakuphatwa na chikukuyi ile igomolwe mbikatayirwa kumbuto yokhonda chena pamaso pa Mulungu kunja kwa mzindawo.

⁴¹Mafufu onsene a m'bwalo mwa nyumbayo athema kupalwa, tenepo mataka akupalwawo akatayiwe kumbuto yokhonda chena kunja kwa mzindawo.

⁴²Kubuluka penepo akwate miyala inango kupita m'mbuto mwa miyala idabuluswa ile, pontho aphatise basa mataka anango achinchino kuzirima nawo mafufu ale.

⁴³Mbwenye chikukuyi chingagundika pontho uku abulusa kale miyala ya m'nyumbamo, pontho kupala matakache, adazirimwa na iyo ale,

⁴⁴nyansembe athema kupita mwenemo. Iye angagumana kuti chikukuyi chafalikira m'nyumbamo, chenecho ntchakuvunga, tenepo nyumbayo njokhonda chena.

⁴⁵Nyumbayo yathema kugomolwa, pontho akwate miti yache, miyala yache, matakache, adazirimwa na miyala ale aende napyo kapitayira kunja kwa mzinda kumbuto yokhonda chena.

⁴⁶Munthu onsene wakupita m'nyumbamo nsiku zache zakufungulwa zidzati kwana, weneyo anakhala okhonda chena mpakana mawulo.

⁴⁷Munthu onsene wakugona m'nyumbamo, penu kudyeramo afule nguwo zache.

⁴⁸“Mbwenye ngakhala nyansembe apita m'nyumbamo mbagumana kuti chikukuyi chile nee chikuonekave tayu mwenemo yamala zirimwa, nyansembe ailonge nyumbayo kuti njakuchena thangwi chikukuyi chamala.

⁴⁹Penepo iye akwate mbalame ziwiri, muti wamkungudza, nkhambala yakufira na hisope kuti achenese napyo nyumbayo.

⁵⁰Acheke mbalame ibodzi padzulu pa chikalango chakudzala na madzi adidi akubulukira pa mphuno ya madzi.

⁵¹Akwate muti wamkungudza, hisope, nkhambala yakufira na mbalame yamoyo mbapivika m'chiropa cha mbalame idachekwa padzulu pa chikalango chakukhala na madzi adidi akubulukira pa mphuno ya madzi ile. Kubuluka penepo achiwaze m'nyumbamo kanomwe.

⁵²Na njira yeneyi anachenesa nyumbayo na chiropa cha mbalame, madzi adidi, mbalame yamoyo, muti wamkungudza, hisope, na nkhambala yakufira.

⁵³Kubuluka penepo aleke mbalame yamoyo ile kwenda pyayo kumbulukira kunja kwa mzindawo kuminda. Na njira yeneyi anachita mwambo wakuchenesa nyumba, natenepo inakhala yakuchenadi pamaso pa Mulungu.”

⁵⁴Wenewu ndiye mwambo wa utenda wakugoswa wa pamanungo,

⁵⁵pironda, pitupira, penu pipere; pontho pya chikukuyi pachakuvala, pontho panyumba.

⁵⁶

⁵⁷Mwambo wenewu ndiye umbadziwisa kukhonda chena kwa chinthu na kuchena kwa chinthu.