Read cisena LEVITIKO 15 Bible Online

LEVITIKO 15 - cisena bible

LEVITIKO 15

¹MBUYA adapanga Mose na Aroni kulonga kuna Aisraele kuti:

²Ngakhala mamuna anabuluka mafinya kumaso kwache, munthuyo ngokhonda chena,

³podi kwene kuti athimize kubuluka, penu aleke iye ngokhonda chena basi.

⁴Patalimba panagonera penu pakhalira iye mphyakukhonda chena.

⁵Munthu onsene anakhuya talimbache,

⁶penu kukhalira chinthu chidakhalira munthu ule, weneyo athema kufula nguwo zache na kusamba, pontho iye anakhala okhonda chena basi mpakana mawulo.

⁷Munthu onsene wakukhuya kwene mtenda weneyu, athema kafula nguwo zache mbasamba; iye anakhala okhonda chena basi mpakana mawulo.

⁸Ngakhala munthu wakuchuchayi anaphulira mata munthu wakuchena, nyakuchenayo afule nguwo zache na kusamba kwene pontho anakhala okhonda chena mpakana mawulo.

⁹Chonsene chinakhalira munthu ule, penu mphamsana pa bulu, penu ndi mpando, chinthucho ntchokhonda chena.

¹⁰Munthu onsene wakuphata chinthu chonsene chidakhalira mtendayo akhale okhonda chena mpakana mawulo. Munthu onsene wakuthukula chinthu chidakhalira mtenda ule, afule nguwo ache na kusamba kwene, pontho anakhala okhonda chena basi mpakana mawulo.

¹¹Ngakhala munthu wakubuluka mafinya aphata munthu unango mbadzati samba manjache, nyakuphatwayo asambe na kufula nguwo zache, pontho anakhala okhonda chena basi mpakana mawulo.

¹²Chikalango chonsene chinaphata munthu weneyu chathema kuswiwa; ngakhala aphata ndilo yathema kutsukwa mwadidi.

¹³Munthu ule angawanga utendache wakubuluka mafinya, adikhire mpakana nsiku zinomwe, angamala penepo afule nguwo zache na kusamba madzi adidi akubulukira pa mphuno ya madzi, natenepo anakhala wakuchena pamaso pa Mulungu.

¹⁴Pansiku yachisere akwate majiwa mawiri penu nkhangaiwa ziwiri kwenda napyo kumsuwo wa Chikhumbi cha Mulungu mbapipereka kuna nyansembe.

¹⁵Nyansembe anapereka ibodziyo ninga nsembe yakulekerera pyakudawa, inangomboyo ninga nsembe yakupyerera. Na njira yeneyi anachita mwambo wakuchenesa munthu weneyu.

¹⁶Mamuna anabuluka umuna, iye asambe manungo ache onsene, pontho ambakhala okhonda chena mpakana mawulo.

¹⁷Ponsene pagwera umunapo, penu mphanguwo penu mphanthembe, chinthucho chifulwe, pontho chinakhala chokhonda chena mpakana mawulo.

¹⁸Mkazi na mamuna angamala kupita m'bonde, onsene uwiriawo athema kusamba, pontho onsene awiri anakhala okhonda chena mpakana mawulo.

¹⁹Mkazi pandzidzi wache wakumwezi, ambakhala okhonda chena nsiku zinomwe. Munthu anakhuya mkaziyo anakhala okhonda chena mpakana mawulo.

²⁰Chonsene chinakhalira iye penu nkhugonera, pandzidzi wache wakumwezi, chinthucho ntchokhonda chena.

²¹Munthu onsene wakuphata talimba ya mkaziyu, penu ntchakukhalira, munthuyo afule nguwo zache mbasamba, pontho anakhala okhonda chena mpakana mawulo.

²⁴Ngakhala mamuna anapita m'bonde na mkazi pandzidzi wache wakumwezi, anakhala okhonda chena nsiku zinomwe, pontho patalimba ponsene panagonera iye mphokhonda chena.

²⁵Ngakhala mkazi anachucha chiropa nsiku zizinji kupambula nsiku zache zakumwezi, penu ngakhala mkaziyo nsiku zache zakumwezi zathimizirika, ambakhala okhonda chena ninga mumbachitira iye pandzidzi wache wakumwezi.

²⁶Chinthu chinagonera iye na chinthu chinakhalira iye pandzidzi wenewu ntchokhonda chena.

²⁷Munthu anaphata penepiyo ngwakukhonda chena, pontho afule nguwo zache na kusamba kwene; anakhala okhonda chena basi mpakana mawulo.

²⁸Kuchucha kwa chiropa kwa mkaziyo kungaleka, adikhire nsiku zinomwe, tenepo anakhala wakuchena pamaso pa Mulungu.

²⁹Pansiku yachisere iye adze na majiwa mawiri penu nkhangaiwa ziwiri kuna nyansembe pamsuwo wa Chikhumbi cha Mulungu.

³⁰Nyansembeyo anapereka ibodziyo ninga nsembe yakulekerera pyakudawa, inangomboyo ninga nsembe yakupyerera, tenepo na njira yeneyi iye anachita mwambo wakumchenesa mkaziyo.

³¹MBUYA adapanga Mose kuti acheuze Aisraele pya kukhonda chena kwawo, towera aleke swipisa Chikhumbi chache, chile chikhali pakati pa msasa, kugopesera anaphiwa.

³²Wenewu ndiye mwambo wache wakulonga pya mamuna wakubuluka mafinya kumaso kwache penu kubuluka umuna,

³³pontho pya mkazi pandzidzi wache wakumwezi, pontho na pya mamuna wakugona na mkazi okhonda chena pamaso pa Mulungu.