Read cisena LEVITIKO 17 Bible Online

LEVITIKO 17 - cisena bible

LEVITIKO 17

¹MBUYA adapanga Mose

²kulonga kuna Aroni, anache na Aisraele onsene kuti:

³Mbodzi wa Aisraele angapha mbuzi, ng'ombe penu bira kuti ikhale mtukwa kuna MBUYA mbaichekera pyache pambuto inango ene, nee pamsuwo wa Chikhumbi cha Mulungu tayu, weneyo aswa mwambo. Iye achuchisa chiropa, natenepo nkhabeve dzayeswa mbodzi wa anthu a Mulungu tayu.

⁵Mwambo wenewu ukulonga kuti Aisraele abwere kuna MBUYA na nyama zikhaphera iwo pakwecha zile. Iwo abwere nazo nyama zawozo kuna nyansembe pamsuwo wa Chikhumbi cha Mulungu na kuzicheka ponthopo ninga nsembe yachiphatizano.

⁶Nyansembe awaze chiropacho m'makhundu a guwa yansembeyo pamsuwo pa Chikhumbi cha Mulungu, pontho apise mafuta a nyamayo kuti abuluse khwema yadidi yakukomera MBUYA.

⁷Aisraele mbaleke khalave okhonda khulupirika kuna MBUYA pakukwata nyama zawo kaziphera m'tsanga ninga nsembe kuna mizimu yakuipa. Aisraele athema kuteweza mwambo wenewu kutomera chinchino mpakana mifendu yonsene inadzayo.

⁸Mbodzi wa Aisraele, penu mlendo wakukhala pakati pa Aisraele, angapereka nsembe yakupyerera penu nsembe ya mtundu unango kuna MBUYA, kubuluka penepo,

⁹mbaiperekera pyache pambuto inango ene nee kuti ikhale nsembe ya MBUYA tayu, weneyo nkhabeve dzayeswa mbodzi wa anthu a Mulungu tayu.

¹⁰Ngakhala mbodzi wa Aisraele, penu mlendo wakukhala pakati pa Aisraele, anadya nyama uku chiropa chache chikhali montho m'manungo mwachemo, MBUYA anampasa nkhodolo pontho hanayeswave mbodzi wa anthu ache tayu.

¹¹Moyo wa nyama zonsene uli m'chiropa, ndi thangwi yache MBUYA adatonga kuti chiropa chonsene chathema kukhuthulirwa paguwa yansembe kubulusa pyakudawa pya anthu. Chiropa chile ndi moyo chimbabulusa pyakudawa pya anthu.

¹²Ndi thangwi yache MBUYA adaapanga Aisraele kuti iwo pabodzi na alendo akukhala pakati pawo aleke kudya nyama yakukhala na chiropa m'bwalo mwache.

¹³Ngakhala mbodzi wa Aisraele, penu mlendo wakukhala pakati pa Aisraele, anakhulisa nyama penu mbalame, chile ntchakuchena pamaso pa Mulungu, iye athema kukhuthulira chiropa cha nyamayo pansi mbachifikhira na mataka.

¹⁴Moyo wa nyama zonsene uli m'chiropa, ndi thangwi yache MBUYA adapanga Aisraele kuti aleke kudya nyama yakukhala na chiropa m'manungo mwache, pontho kuti munthu onsene angachita penepyo hanayeswave mbodzi wa anthu a Mulungu tayu.

¹⁵Munthu onsene, mbodzi wa Aisraele penu mlendo, angadya nyama yakufa yokha penu yakuchita kuphiwa na nyama zam'tsanga, iye athema kufula nguwo zache, kusamba pontho kudikhira mpakana mawulo mbadzati khala wakuchena pamaso pa Mulungu.

¹⁶Iye angakhonda kupichita penepi, athema kuoneswa nyatwa.