Read cisena LEVITIKO 18 Bible Online

LEVITIKO 18 - cisena bible

LEVITIKO 18

¹MBUYA adapanga Mose

²kulonga kuna Aisraele mbati, “Ine ndine MBUYA Mulungu wanu.

³Lekani kwatira makhaliro a anthu a ku Iguputo, kukhakhala imwe pakutoma kule, penu makhaliro a anthu a m'dziko ya Kanani kunakuendesani ineku.

⁴Verani mwambo wanga pontho chitani pinakutongani inepi. Ine ndine MBUYA Mulungu wanu.

⁵Tewezani mwambo na matongero pinakupasani inepi; pakuchita tenepo imwe munati mupulumuse moyo wanu. Ine ndine MBUYA.”

⁶Tenepo MBUYA adapereka mwambo ufu: Leka gonana na mbaleako na mbodzi ene.

⁷Leka lulupisa babako pakugonana na mako. Leka lulupisa mako nyakukubala.

⁸Leka lulupisa babako pakugonana na mkazache.

⁹Leka gonana na nyamaingako, penu nyamaingako wakunjira, penu wakukulira naye m'nyumba ibodzi penu tayu.

¹⁰Leka gonana na mdzukuluako wamkazi; kweneko nkhupilulupisa wekha ene.

¹¹Leka gonana na nyamaingako wa bele inango, thangwi weneyombo ndi nyamaingako.

¹²Leka gonana na nyamaingache babako, thangwi iye ntchiropa chibodzi na babako.

¹³Leka gonana na mbaleache mako, thangwi iye ntchiropa chibodzi na mako.

¹⁴Leka gonana na mkazi mbaleache babako, thangwi weneyombo ndi mako.

¹⁵Leka gonana na mkwenyako, weneyo ndi mkazache mwanako,

¹⁶penu na mkazi mbaleako.

¹⁷Leka gonana na mkazi pabodzi pene na mwanache wamkazi, penu na mdzukuluache wachikazi; mwinango iwo mbabale ako, penepyo mphyakudawika.

¹⁸Leka kwata nthena.

¹⁹Leka gonana na mkazi pandzidzi wache wakumwezi, thangwi iye ngokhonda chena pamaso pa Mulungu.

²⁰Leka gonana na mkazi mwanzako; penepyo pinakuchitisa kukhala okhonda chena pamaso pa Mulungu.

²¹Leka pereka anako kuti akaperekwe nsembe kuna milungu Moleki, thangwi kweneko nkhululupisa dzina ya Mulungu wako. Ine ndine MBUYA.

²²Leka gonana na mamuna mnzako ninga ukugonana na mkazi; Mulungu ambanyansirwa napyo.

²³Mamuna penu mkazi aleke gonana na nyama; kweneku nkhuzuda kukulu.

²⁴Lekani kupiswipisa mwekha ene pakuchita pinthu penepi, thangwi mwenemo ndiye mudapichitisa anthu okhonda dziwa Mulungu kukhala okhonda chena pamaso pache, ale akhakhala m'dziko muno imwe mbamudzati fikamo, pontho anafuna MBUYA kuathamangisa ale, towera imwe mukapitemo.

²⁵Makhaliro awo adachitisa dziko kuti ikhale yokhonda chena, natenepo MBUYA akutchunyusa dziko na kuichitisa kuti itapike anthu akhakhala mwenemo ale.

²⁶Iwo adachita pinthu pyonsene pyakunyansapi mbachitisa dziko kukhala yokhonda chena, mbwenye imwe lekani kupichita penepi. Monsenene, penu ndimwe Aisraele, penu alendo anakhala pakati panu mwathema kukoya mwambo wanga na matongero a MBUYA,

²⁸natenepo dziko nkhabe dzakutapikani ninga mudatapikira iyo anthu okhonda dziwa Mulungu akhakhala mwenemo pakutoma imwe mbamudzati fikamo ale.

²⁹Imwe mukupidziwa kuti munthu onsene anaphata pinthu pyakunyansapi nkhabe dzayeswave mbodzi wa anthu a Mulungu tayu.

³⁰Natenepo MBUYA adalonga mbati, “Verani matongero anakupasani inewa, pontho lekani kuteweza makhaliro a anthu akhakhala mwenemo imwe mbamudzati fikamo ale, pontho lekani kupiswipisa mwekha ene pakuchita pinthu penepi. Ine ndine MBUYA Mulungu wanu.”