Read cisena LEVITIKO 2 Bible Online

LEVITIKO 2 - cisena bible

LEVITIKO 2

¹Munthu onsene angafuna kudza na chakupereka cha mapira kuna MBUYA, iye athema chakutoma kuchipeya, towera chikhale ufa. Iye athema kuikha mafuta aolivi na pyakufukiza pyakununkhira padzulu pachepo.

²Kubuluka penepo adze napyo kuna ana a Aroni, anyansembe. Nyansembe anakwata kwene ufa pang'ono wakukwana m'manja na mafuta pang'ono pabodzi pene na pyakununkhirisa pyonsene mbapipisa paguwa ninga chidzindikiro kuti pyonsene pyaperekwa kuna MBUYA. Yeneyi ndi nsembe yakusasanywa na moto; khwemache imbamkomera MBUYA.

³Pyakusalira pyonsene pya chakupereka cha mapira chile ntcha Aroni na anache achimuna; icho ntchakupambulika pyakwanga, thangwi chakwatwa kubulukira pa chakuperekwa kuna MBUYA chakusasanywa na moto.

⁴Ngakhala chakuperekacho ntcha mkate wakuchita kuphikwa muuvuni, mkatewo wathema kukhala wakusowa chakufufumisira. Unakwanisa kukhala mkate wa ntchindu ikulu wakusasanywa na ufa wakuvungazwa na mafuta aolivi, penu pitumbuwa pyakusowa pyakufufumisira, pontho pakukhwazwa mafuta aolivi.

⁵Ngakhala chakupereka cha mapira ntchakuchita kukazingwa m'chiwaya, chathema kusasanywa na ufa wakuvungazwa na mafuta aolivi, mbwenye wakusowa chakufufumisira.

⁶Unyedze-nyedze na kukhuthulirapo mafuta; chenecho ndiye chakupereka cha mapira.

⁷Ngakhala chakuperekacho chachita kuphikwa m'supulia, chathema kusasanywa na ufa, pontho na mafuta aolivi.

⁸Idzani nacho ninga chakupereka kuna MBUYA mbuchipereke kuna nyansembe, ule anachikwata kwenda nacho paguwa yansembe.

⁹Nyansembe anakwata khundu pang'ono ya chakuperekacho ninga chidzindikiro kuti pyonsene pyaperekwa kuna MBUYA, tenepo iye anachipyereza paguwa yansembe. Yeneyi ndi nsembe yakusasanywa na moto; khwemache imbamkomera MBUYA.

¹⁰Pyakusalira pyonsene pya chakupereka cha mapira ntcha Aroni na anache; icho ntchakupambulika pyakwanga, thangwi chakwatwa kubulukira pa chakuperekwa kuna MBUYA chakusasanywa na moto.

¹¹Pyakupereka pyonsene pya mapira pyakuperekwa kuna MBUYA pileke khala na chakufufumisira; lekani phatisa basa chakufufumisira, penu uchi kupiikha muchakudya chakuperekwa kuna MBUYA chakusasanywa na moto.

¹²Mwathema kudza na pyakutoma kutokota chaka na chaka mbamupisimisa kuna MBUYA, kwache mbapileke piswa paguwa yansembe ninga khwema yakukomera MBUYA.

¹³Pa pyakupereka pyanu pyonsene pya mapira mwathema kupiikha munyu, thangwi munyu umbaimirira chiverano cha pakati pa imwe na Mulungu. Imwe mwathema kuikha munyu pa pyakupereka pyanu pyonsene.

¹⁴Mungasimisa kuna MBUYA pyakutoma kutokota ipyo pyathema kukhala pyakuchita kupeya, penu piwisi pyakuchita kuotcha.

¹⁵Thimizani mafuta aolivi na pyakufukiza pyakununkhira padzulu pachepo.

¹⁶Nyansembe anapyereza paguwa khundu ya mapira awisi akupeya na mafuta enewo kuti ikhale ninga chidzindikiro kuti pyonsene pyaperekwa kuna iye, pontho na pyakufukiza pyakununkhirapyo pyonsene ninga nsembe yakusasanywa na moto yakuperekwa kuna MBUYA.