Read cisena LEVITIKO 21 Bible Online

LEVITIKO 21 - cisena bible

LEVITIKO 21

¹MBUYA adapanga Mose kulonga kuna anyansembe, ana a Aroni, kuti, “Nyansembe mbaleke kupichitisa yekha ene munthu okhonda chena pakukwata nawo khundu pa mwambo wa maliro mbaleache angafa,

²mbwenye angakhala mbaleache chadi-chadi ninga mache, babache, mwanache wamamuna, mwanache wamkazi, mbaleache wa mimba ibodzi ene,

³penu nyamaingache okhonda sembwa wakukhala naye pabodzi m'nyumba mwachemo.

⁴Iye mbaleke kupichitisa yekha ene kukhala okhonda chena thangwi ya imfa ya abale ache akusemberana nawo.

⁵“Nyansembe mbaleke kuchinga tsisi yache, penu kuchinga ndevu zache, penu kupicheka-cheka m'manungo mwache kuonesa kusintili.

⁶Iye athema kukhala wakupambulika kuna Mulungu wache, pontho aleke lulupisa dzina ya Mulungu wache. Na thangwi yakuti iye ambapereka nsembe yakusasanywa na moto kuna MBUYA, pyakudya pya Mulungu wache, iye athema kukhala wakuchena.

⁷Nyansembe mbaleke semba puta, penu mkazi wakudziwa kale mamuna, penu wakulekana na mamunache, thangwi iye ngwakupambulika kuna Mulungu wache.

⁸Anthu athema kuyesa nyansembe munthu wakuchena, thangwi iye ambapereka nsembe zakudya kuna ine. Ine ndine MBUYA; ine ndine wakuchena pontho ndimbachitisa anthu anga kukhala akuchena.

⁹Ngakhala mwana wamkazi wa nyansembe asanduka puta, mwanayo achitisa babache manyadzo; natenepo iye athema kuphiwa na moto.

¹⁰“Nyansembe Wamkulu achita kudzozwa pakuchita kukhuthulira mafuta mumsolo, pontho iye apambulwa kuti avale nguwo za unyansembe, natenepo mbaleke siya kwene tsisi tundulu, penu kung'amba nguwo zache kuonesa kusintili.

¹¹Iye aperekwa kuna ine natenepo iye nkhabe kupichitisa yekha ene okhonda chena, penu kuswipisa nyumbanga yakuchena tayu pakuisiya mbakapita m'nyumba muna munthu wakufa mule, podi akhale kwene babache penu mache.

¹³Iye athema kusemba mkazi okhonda dziwa mamuna;

¹⁴mbaleke semba mamfelwa, mkazi wakulekana na mamunache penu puta. Iye mbasembe mkazi okhonda dziwa mamuna wa dzinzache,

¹⁵gopesera kuti anache, ale athema kukhala akuchena, anakhala okhonda chena pamaso pa Mulungu. Ine ndine MBUYA, pontho ndampambula iye kuti akhale Nyansembe Wamkulu.”

¹⁶MBUYA adapanga Mose

¹⁷kulonga kuna Aroni kuti: “Nkhabe mbodzi wa pidzukulu pyako wakukhala na chilema athema kudza na nsembe yakusasanywa na moto pamaso panga. Penepi pichitike podi na mifendu inadzayo.

¹⁸Munthu wakukhala na chilema mbaleke pereka nsembe; nee boli-boli, nyamfutete, nyakulamala, penu nyakupenaliki;

¹⁹nee munthu wakulamala dzanja penu dzinyalo;

²⁰nee nyanthuku penu kavira mphindo tayu, nee munthu wakukhala na utenda wa maso penu wa pamanungo pache tayu; pontho nee nyakukapalwi[11] tayu.

²¹Nkhabe mbodzi wa pidzukulu pya Aroni nyansembe wakukhala na chilema apereke nsembe zakusasanywa na moto kuna ine tayu. Iye ana chilema, tenepo hadatheme kudza chifupi na guwa yansembe dzapereka pyakudya pya Mulungu wache tayu.

²²Kwache munthu ninga weneyo anakwanisa kudya pyakudya pyakuperekwa kuna Mulungu wache, pyakudya pyakuchena pontho na pyakudya pyakuchenesesa.

²³Mbwenye na thangwi yakuti iye ana chilema mbaleke fika chifupi na chinguwo chakupambulika cha Chikhumbi penu kufedzera kuguwa yansembe. Iye mbaleke swipisa pinthu pyakuchenapi, thangwi ine ndine MBUYA, pontho ndimbapichitisa pinthupyo kuti pikhale pyakuchena.”

²⁴Penepi ndiye pidalonga Mose kuna Aroni nyansembe na anache ene pontho na kuna Aisraele onsene.