Read cisena LEVITIKO 22 Bible Online

LEVITIKO 22 - cisena bible

LEVITIKO 22

¹MBUYA adapanga Mose

²kulonga kuna Aroni na anache kuti, “Mwathema kulemedza pyakupereka pyakuchena pimbapambulira Aisraele kuna ine, towera muleke lulupisa dzinanga yakuchena. Ine ndine MBUYA.

³Ngakhala mbodzi wa pidzukulu pyako afedzera chifupi na pyakupereka pyakuchena pimbapambulira Aisraele kuna ine uku ngokhonda chena pamaso panga, weneyo nkhabe kwanisave kutumikira paguwa yansembe tayu. Penepi pyathema kuchitika mifendu yonsene inadzayo. Ine ndine MBUYA.

⁴“Ngakhala mbodzi wa pidzukulu pya Aroni ana utenda wa pamanungo penu kubuluka mafinya, weneyo mbaleke kudya pyakupereka pyakupambulika mpakana munthuyo akhale wakuchena pamaso panga. Nyansembe onsene ngokhonda chena ngakhala anakhuya chinthu chokhonda chena ninga mtembo, penu ngakhala anabuluka umuna,

⁵penu ngakhala aphata nyama, penu munthu okhonda chena, podi kukhonda chenako kukhale pyako kwa mtundu wanji.

⁶Nyansembe onsene angasanduka okhonda chena ambakhala okhonda chena basi mpakana mawulo, pontho angamala penepo mbaleke kudya na chinthu chene cha pyakupereka pyakupambulika mpakana asambe.

⁷Kubuluka penepo dzuwa ingadoka, iye asanduka wakuchena, natenepo anakwanisa kudya pyakupereka pyakupambulika, ile ndi phoso yache.

⁸Iye mbaleke kudya nyama yakufa yokha, penu yakuchita kuphiwa na nyama zam'tsanga; penepi pinamchitisa kukhala munthu okhonda chena. Ine ndine MBUYA.

⁹“Anyansembe onsene athema kukoya mwambo onsene waapasa ine, gopesera iwo anadawa mbafa thangwi ya kululupisa mwambo wanga. Ine ndine MBUYA, pontho ine ndimbaachitisa kukhala akuchena.

¹⁰“Munthu ene wa m'banja ya unyansembe anakwanisa kudya pyakupereka pyakupambulika; munthu ene pyache aleke kudya, podi na munthu ene wakukhala naye pabodzi nyansembeyo penu nyaganyo wache.

¹¹Mbwenye bitchu wa nyansembeyo wakuchita kugula na kobiri zache zene penu wakubalwa m'nyumba mwachemo anakwanisa kudya phoso imbatambira nyansembeyo.

¹²Mwana wa nyansembe wamkazi angasembwa na mamuna okhonda khala nyansembe, mwana mkaziyo mbaleke kudya pyakupereka pyakupambulika.

¹³Mbwenye mamfelwa penu mwanache wamkazi wakulekana na mamunache wakusowa ana angabwerera kuna babache nyansembe kuti akhale naye m'nyumba mwache ninga wakudyeswa, weneyo anakwanisa kudya phoso imbatambira babache ninga nyansembe. Munthu wakubalwa m'banja ya unyansembe ndiye anakwanisa kudya pyakuperekapi.

¹⁴“Ngakhala munthu ene pyache okhonda balwa m'banja ya unyansembe anadya pyakupereka pyakupambulika mwasusudewu, iye athema kupagali kontache yakufunikayo, pontho athimizepo chachishanu cha kontache.

¹⁵Anyansembe mbaleke lulupisa pyakupereka pyakupambulika pimbapereka Aisraele kuna MBUYA

¹⁶pakutawirisa anthu ene pyawo kudya nawo pyakuperekapyo; penepi pinadzesa kudawa na kutchunyuswa pana munthu ninga weneyo. Ine ndine MBUYA, pontho ine ndimbachitisa kuti pyakupereka pikhale pyakupambulika.”

¹⁷MBUYA adapanga Mose

¹⁸kulonga kuna Aroni na anache pontho na Aisraele onsene kuti, “Ngakhala mbodzi wa Aisraele penu mlendo wakukhala pakati pawo anadza na mtukwa kuti ukhale nsembe yakupyerera, penu nkhufuna kuchitisa kudumbira kudachita iye kukwana-kwana, penu nkhupereka na kufuna kwache, nyamayo mbileke khala na chilema.

¹⁹Kuti nsembeyo itambirwe, nyamayo yathema kukhala ng'ombe, bira penu mbuzi yakusowa chilema.

²⁰Mungapereka nyama yakukhala na chilema MBUYA nkhabe kuitambira tayu.

²¹Ngakhala munthu anapereka nsembe yachiphatizano kuna MBUYA penu nkhufuna kuchitisa kudumbira kudachita iye kukwana-kwana, penu nkhupereka na kufuna kwache, nyamayo ikhale yakusowa chilema ngakhala munafuna kuti itambirwe.

²²Lekani pereka kuna MBUYA nyama yakusweka diso, penu yakukuwazika, penu yakulamala miyendo, penu yakukhala na chironda chakuchucha mafinya, ya chikulukuta, penu chikhokho cha pachironda. Lekani pereka nyama ninga yeneyo paguwa yansembe kuti ikhale nsembe yakusasanywa na moto kuna MBUYA.

²³Ngakhala nkhufuna kwache, munthu anakwanisa kupereka nyama yokhonda balwa mwadidi, penu yakungungumira, mbwenye yeneyi njokhonda tawiriswa ngakhala nsembe yache nkhufuna kuchitisa kuti kudumbira kudachita iye kukwane-kwane.

²⁴Lekani pereka kuna MBUYA nyama yakuti kumaso kwache kwakuvandika, kwapeyeka, kwachita kukhwadzulwa, penu kwatemeka. Penepi mphyokhonda tawiriswa m'dziko mwanu.

²⁵“Lekani pereka ninga nsembe yakusasanywa na moto kuna MBUYA nyama yakukwatwa kubulukira kuna alendo. Nyama zenezo nkhabe tambirwa m'mbuto mwanu, thangwi zimbayeswa ninga zakupenaliki pontho za chilema.

²⁶“Ngakhala mwanamphulu, mwanabira, penu mwanambuzi abalwa, nkhabe kumbulusa pana mache tayu kufikirana nsiku zinomwe. Nsiku zenezo zingamala anakwanisa kutawiriswa kukhala nsembe yakusasanywa na moto kuna MBUYA.

²⁸Lekani kupereka nsembe ng'ombe na mwanache ene, bira na mwanache ene, penu mbuzi na mwanache ene pansiku ibodzi ene.

²⁹Mungapereka nsembe yakupereka takhuta kuna MBUYA, tewezani mwambo wache towera itambirwe m'mbuto mwanu.

³⁰Nsembe yathema kudyiwa nsiku yonthoyo, pontho lekani kusiya na pang'ono pene kuti ifike mangwana mwache. Ine ndine MBUYA.”

³¹MBUYA adalonga mbati, “Verani matongero anga. Ine ndine MBUYA.

³²Lekani lulupisa dzinanga yakuchena; Aisraele onsene athema kudziwa kuti ine ndine wakuchena. Ine ndine MBUYA, pontho ndimbakuchitisani kukhala akuchena;

³³pontho ndidakubulusani m'dziko ya Iguputo kuti ndikhale Mulungu wanu. Ine ndine MBUYA.”